Аьдатравун багьсса куццуй жула ххаллилсса, чумартсса лакку душру –«Дагестан» МЦК-лул ва М.Ильясовал цIанийсса «Дараччи» фондрал Москавливсса филиалданул вакилтал ччя-ччяни бияйссар хасъсса аьралий операциялий щавурду дирну госпитальлайн багьсса аьралийтурачIан, хаснува дагъусттанлувтурачIан. Ва ххуллухь вайннал аьрххи багьунни Дяъвилул ветерантурал 2-мур госпитальданийн.
Душвавран кIул хьуну бия шикку чIявусса дагъусттан оьрчIру бушиву. Шавлукь Ильясовал, Басират Билаловал, Ххадижат Цаххаевал, ПатIимат Садыкьовал чIирисса чIумул дянив 15-гу Дагъусттаннаясса аьралийчунан нахIу дукрардугу дурну, гьарнан ахъулссаннул, нацIу-кьацIулул кьуцурттугу хIадур бувну бувкIунни госпитальданийн. Шиккун бучIаннинма аьралийтурачIан оьвкуну, кIул бувну бия вайннан ци аьркинну дуссарив, ци ччай буссарив.
Гьай-гьай, аьралийтурал тамахI дагъусттан дукрардах бия. Жула душвавралгу карчI къадунни. ЦIу дикIухунсса ва кьаркь дикIухунсса яруссаннал ххункI, буркив, бувцIу ххункIру, дикI ва нувщи – дагъусттанлувтал аьдатсса нахIу дукрарду. Гьар мудан кунма аьралийтурачIан нанисса душваврал чIарав ва ппурттувугу ххуйну бавцIунни Басиратлул лас Багьауттин ва Ххадижатлул ссийл арс Сагид. Аьркинмур ласун, гьаз дан, диян дан арамтурал кумаг аьркин къабагьну къабикIайхха. МуницIун вайннал мудан арцуйнусса кумаггу байссар.
– КIицI къабувну къабучIир, аьралийтуран аьркин дагьлагьимур ласун мудан арцуйнусса кумаг байссар Гульшан Хасаевал каялувшиннаралусса «Дараччи» ихIсандалул фондрал, Хъусращиял шяравасса НурмахIаммад Шихаьлиевлул душваврал Анфисал ва Зираял, – тIий, буслай бур душру.
Госпитальданийн бучIан сант къахьурчагу, ва ххуллухьгу арцуйнусса кумаг бунни чумартсса, Москавлив дагъусттанлувтурал дуллалисса гьарица давурттавух чялишну гьуртту шайсса медициналул элмурдал доктор Жаруллагь Аьшуевлул ва Пери Магриевал. Цинявннан цадакьану бацIаннав.
Ссайгъатирттащал бувкIсса делегация цал гьаз хьунни ялувмур зивулийсса шанийн багьсса аьралийтурачIан. Вайннавух ия лакку оьрчIгу, Хъювхъиял шяравасса Эльдар. Аллагьнал цIимилийну ччяни хъин хьуннав.
Бизан, цайнува цивппа занакьулу бикIан бюхълахъисса аьралийтуран Дагъусттаннал зумуну архIал щябикIан ччан бивкIунни. Миннан аьмсса ссупра тIивтIунни фойелувусса буруган бувкIминнащал щябикIан личIи бувсса кIанттурдай.
Дагъусттан дукрардал шардалу дакIнин дуртсса аьралийтал барчаллагьрай бия хъамаллурайн.
– ТIааьнссагу, пашманссагу асарду хIала бувхсса аьрххи бия. АьралийтурачIан биян, тай ххари бан бювхъуну тIий дакIниву ххаришиву дия, амма щавурду дирсса, цIунцIияртту хьусса тайннайн я щувкун пашман хъанай бияв, – тIий бур Ххадижат.
Я Аллагь, вай чумартсса лакку оьрчIал ва душваврал каши ххи даннав. Щавурду дирмигу ччяни ччаннай бацIаннав, хьхьичI ххуттай бавцIуну талатимигу, сагъ-саламатну цала кулпатирттавун зана хьуннав.
Андриана Аьбдуллаева
