Щугълурду
ДуркIунни ттучIангу чIири чял шай чIун,
ЧIануцI чIалай ттигу оьчIара дуна.
Арцул щин дурккунни ттулми зунпайхгу,
Заманалун лащан дакI дуранура.
Ттуйнгу тти чIявунал буттауссий чай,
Буттал кахлихсса мякь лиххан бувана.
Мюхтаж хьунни ттулгу
ник оьрчIал оьрчIах,
ОьрчIну чIирттайх лахълан ттигу ччайнува.
Ччучлай, харж шавай бур
ттул чирахърал навт,
Чаргун дутлай дансса давурттал дуна.
Нану, дус, чавай бур бувкIун бивкIулул,
ДарцIуссарча вилгу чIумул щирипIай.
Тти ачавай ура щарнил та чулийн,
Хъювхъий, зул хъачIунттай чурттуй
чул бувну,
КIанттул шавай ура ттаттахъал чIарав,
ЧIумул гьивулия дагьсса кIал куна.
Тти ттунгу дурчIунни кьянкьасса кьанун,
Кьадарданул заллу Заннал дирхьусса.
Махъ дикIу, хьхьичI дикIу, дакI ци тIийнугу,
Дайдихьулул хъирив дайлитIу дусса.
Мукунни, личIлай бур анжагъ щукру бан,
Ща бутан ивтун тIий тарихрал улттуй,
Дазу дакъа ххуллий инсаннал бивтсса
ЛичIантIий буну тIий ттулмигу шару.
КIулливав?
Хъювхъий, зун кIулливав Исмяил цурив,
Къизилъярдал зунттуй ккуллалул увтсса,
ДакIнингу агьайвав зун Бакри такIуй,
Дикъалла ария зана къавхьусса.
Ккаккан дайвав щилчIав
ттун Расуллул гьав,
Шагьидну увччусса жула хIатталлий,
КIицIвагу лагайвав ихтилатраву
Инкьилабрал ххуллий харап хьун багьми.
Мяйжанну бакъарив язугъ-ялгъузми,
Я буччиннин оьрму къаккавккун лавгми,
ЦIа гьаз хьунсса гьану лув къаливчIунма,
ЧIавахьулттийх кунма, бурувгун лавгмий.
Ватандалуха
Дагъусттан, дакIнил дуаь,
Зукьлурдай чIаку мурад,
Бутавияв, шайния,
Хъазамрайн гьайчалину.
ЦIунилгу МГУ-лува ачлай
Агь, МГУ, ттигу ачавай ура,
Кьадиртун цIунилгу дикIул дакI вичIа,
ЦIу шавай бур ттигу ттул бухсса умуд
Занахьун дакIнийсса жагьилшивручIан.
Кюрттари зивурду цIунилгу кIучIав,
Элмулул щинная цIунилгу цIупI чав,
Уччинния чари, гуж хьусса ккашил
Базурду зурзу тIий авчура шавай.
Буттал шяраваллил муруллив кунма,
Мудан ккаклай ччисса МГУ чIалъаьй,
ХIачIлай, мякь къалиххай зийлул щиначIа,
ЩяивкIний укуна икIара чIалай.
Гьалакну нанисса зунттал неххаву
Оьрмулул лечрулул суратру кунма,
ЧIумуйн бичлачисса вичIасса гьантри
Кинорал бутIрину лапI-лапI тIий лагай.
ЗахIмат хьуссар мудан личIи хьун вия,
Бадалданух луглай дакъарцIуссар дакI,
КIунугу, хажалат личIи шай чIумал,
Загьрулун закъунгу лявхъссар ттун вичIа.
ДакI дан ттун дакъарив личIлай дусшиву
Шаппай зана хьусса зунттал оьрчIарал,
ЧIалайнма бакъарив кIулшиврул къала,
Вил цIакьсса гьанурдай гьаз хъанайнмасса.
Вияту дирмунил мархха куртIсса бур,
Вий хьусса дусшиву ликъаххайсса дур,
Дагъусттан зунттая Лениннул зунттайн
ДакI кIункIу тIийннасса ттул Альма-матер.
Рубайрду
Ссаву ци буссарив жунма къакIулссар,
ОьритIий, хъин шайссар, хъинтIий,
оь шайссар.
Аллагьнал чивчумур бувкIний
кIул шайссар,
ЧIатIий, аьсив хъанай пайда бакъассар.
Дуниял дакъарцIун гьанайри дусса,
БавцIунал багьлайнма, багьнал бацIлайнма,
ДарцIуний кьаралгу, дагьний ссавургу
Ссаяргу ларайссар багьлул ЗанначIа.
ЧIумуха
ЧIумул цилла даву мудан дувайссар,
РахIму цаннайвагу тачIав къабайссар,
ОьрчIал кIанттувату архIал увцуну,
Гьаттал буркIунттахун иян увайссар.
Уккувча виричу цияр ххув хьума,
ЧIумул никирттава уккан бювхъусса,
Ккаккан бувсса мутта ккалли къабувну,
Къаачин бювхъусса ссят дирсса чIумал.
Хьхьирцусса ччаву
Ччаврил гуж мяълум буллай,
Гьис кунни къюкIлил ттигу,
Вил ша бивзний ша бизлай,
Дарчунни ликри ттигу.
Вайва мурхьру шиккува,
Жула ччаврил бардултсса,
Вайва жегъир ххуллурду,
ЦачIуну ккуччу бувсса.
Вара чIара ратIнил кьарк,
ТIанк чин вил ка дургьусса,
Вава чурххавух зурзу,
Таний кунма, буллусса.
Вава кьун ва бунийва,
Жула дакIниймур бавсса.
Вара рахI, кьариртнийра,
На вийн ппай куну ккавксса.
КIара ялув някIсса ссав,
Тани кунна, зяй диркIсса,
Тти цIунилгу цIу ларгсса,
Хханххираву хажалат.
Яру бавчунни луглай,
КъюкIгу дарчунни ришлай,
Щаллу къавхьу хияллал
Щаву дурцунни оьтту.
Ина байтурман дивуй,
Хьхьирцуннаявкьай диркIсса,
Дахьра хIахIлих ялугьлай,
ЦIунил ламаран дизан.
Агь, цанъя на учIайсса
ЦIунил ва ччувччу кIанттайн,
Гьар хьунабавкьсса къатIух
Вил дас ттун дизлазисса.
ХьхьурукIрадушнихь
Гъилисса майрал хьхьу хъамакъаритай,
Ина тIайла буккан, вищал нанисса,
Вия ришлашисса марцIшиврул кьункьал
Гьанагьи бувсса бакI, гьалак дурксса къюкI.
Вил чIувусса хъазам лавну чIалай бур,
Ламусну тIиртIусса ттула каруннайн.
Адаврай гьаз бувсса яруннил гужрал
ЧантI чин дурсса хIая ттигу дур ттуву.
Вия личIи хъанай, барчаллагь тIийни,
Шайкун чIуен дурний кIирагу вил ка,
Хханххиравух бивщу гьавасрал лама
Шинну ларгун махъгу ливчIунни ттуву.
Биян бувну ина, шавай нанийни,
Цамур чIалачIийни лагма дуниял,
ЧIун дацIан дурнавав ялув Ххувзаннал,
ЦIакь бан ттул бакIраву та хьхьунил асар.
Мурадрайнгу бивру, цачIунгу хьуру,
Ччаврил ахъулссаннул оьрчIругу барду,
Амма хIакьинугу тара майрал хьхьу
Увцуну найнна дур на вил шаттирдай.
Тти хъювхъирищарсса вия хьунугу,
ОьрчIру хъуни бувсса хъазам хьунугу.
ТIинс бивтний зяй тIисса та хьурукIрадуш,
Ваталлагь, къалагай ттул дакIнивату.
Хъювхъиял
цIа дурксса ясаул
ХIаснихъал МахIмухь
МахIмуй, лавкьуссарив, мяйжанну, мажлис,
Мудан тIивтIунмасса ина авцIуний.
Лажинни, багьссарив ясаулнал мархь,
Виричунал канихь мудан бавкьусса?
Бувну къурталссарив ташурду циняв?
Тти къааьркинссарив ххуй бан ини-ччатI?
Мудан тIиртIуннасса дакIнил залуннан,
Заннаху, лайкьссарив лакьин гьарца зат?
Изу, дус, баннуча ца мажлис ттигу,
Ссупрагу тIивтIуну Хъювхъиял ккурчIай,
Изу, учиннуча ца гьурра-гьайта,
КIай жула муруллал зана битанну.
Изу, бугьи канил ттигу вила мархь,
Мажлисрайн най бурча цIусса къучагътал,
Ттигу бурча жула буттал жяматрай
Цикссагу жагьилтал хъатIив бувансса.
Ачу, та изан а, цIунил щяити,
КIама зана ува, ссалам булун а.
Уца та, чIал хьума, ялтту-вивх марцI а,
Хъуни ссирссилттава уча вила пурх.
Шампанскийлул шуша ласи, хъюлчу да,
Букки чIутI, дурган да вечI
тIисса хъаннийн,
«Пройдемте, гражданин», – тIул дакъу уца,
Тямаданал хьхьичIун, цIакьсса танмихI бан.
КIана кIикку ца ур «шанан» пикрилий,
Нани ххуллий щунба бянив вила мархь,
ЧIаххувчунащал ур тинай та жапрай,
Лаян дан ца къапаз та къинттуллухун.
Та мугь ивкIсса та цур, ссаяр цал ябакI?
Тти таналлив ливчIсса гьав буллан мажлис?
Изан а, учин а шамилла гьурра,
КъатIурча, бувчIин ба хьхьури щичIарив.
Тиннай та ци нетIар, энчI ивкIсса цир та?
ХIурмат цан къабайссар тIисса балайлул?
Уккан а, ацIан а хIалучIалтрал хьхьичI,
Ххяукканнин тIи а буттахъал балай.
Тиха дикIан дурсса сичча ва цува,
ЧIалай, къашавай ур кIикку маччачу.
Вилла рурну, гьаз а, тIитIи акьин а,
ХIадур а бан лякьлуй «операция».
Бугьа цIуцIи чурххайх хъинсса хIалахIу,
ДутIа гьарччалттувух дякьултрал къячIи.
Уккан а хъин увма ккурандалувун,
Зунняв-дачIулухун шавкьирай динг бан.
Увххунни тямада, инава буси
«Следующий номер программы» цирив.
Буккан бува дянив наврузбаг, жалин –
КъавтIаву дан, хъартI дан, гьали-галин дан.
Вальс, буги-вуги дан, минналва хъирив
Къари, къужа буца – миннал нину-ппу.
Изан а тямада архIалщарнищал,
Аькьлукар уккан а цала щарнищал.
КIилчинма ясаул – щарнил ниттищал,
Цалчин замисттитIил – чIаххувщарнищал.
Щархъаясса хъамал – ххуй душвавращал,
Къуппузтурал бакIчи уца махъ лахъан.
УрцIив кьамул дува, къачагътал бугьи,
АькIлун бувкI куннащал къавтIунгу изу.
«Гуляй, Вася, играй гармонь», – тIий, уклай,
ЦIу лаган дуллалу хIалучIалтрал шавкь.
ХъатIай гьурра тIисса лак лак бакъанал
Авлияшиврухун бихьлай къабуккан,
БувчIин бува шанма кусса гьурралул
Ца рунккалун кIану бачIва байшиву.
Лакку маз къакIулма, начлилма аьйххин
Цил чIумал баян ба хъиривмур «номер».
«Употребление спиртных напитков
В неограниченном количестве», – тIий.
Тинмай «анархистътал» гьарза буллай бур,
Инкар буллан кьастну тямаданал махъ,
Уца бакIчи хьхьичIун, ца ччан гьаз бан а,
ТIутIи а «тямада савлугъиннаран».
Дуца чIарав вилла «зараза души»,
«Пуй, пуй!», усттартурайн руцин амру ба:
Лихъангу къадитлай, ххирагу дуллай,
Дуккан да вищалла шамийлла лагма.
Изукьай, жун вищал бивзун ччай бурча
Къума гьаттардива хъин тямадатал,
Мажлисрай усттарсса, мукъуй цIу бусса
Рамазан, Шалласу, Оьмари, Сиргай.
Изу, вищал бурча мархь бугьан ччисса:
ПпяпIил Мямма, Давди, та ЧIиви-Бутта.
Изу, ка сававсса жулва духтуртал
Даву дакъа бурча – ХIасни, Насруллагь.
«Ай, аьлагуз» чин ччай Камалуттин ур,
«КIуллул балай» чин ччай ХIасан ттатта ур,
Лахъ чIу буккан бан ччай Нахал Рамуз ур,
Такьва ккаккан дан ччай Худул Саэд ур.
«Оькки къяннан» банмур
лякъин къавхьуна,
Ххуй Залиххалшиврий ачин къавхьуна,
Кивалинай гьансса тагьар къархьуна,
Ирба лавгуннича мажлисрах мякьна.
Агь, дус, щища шайссар чIун зана дуван,
Ясаулнал мурхьхьах мютIи бан кьадар,
КIа Хъунтямаданал дирхьусса низам,
Гьурра тIий, гьайта тIий, даххана дуван?
Лавгунна инагу, гьанссару жугу,
ХIарчIусса хIан кунма, гьанссар оьрмугу.
Мурадирал гьантрай шайкун сий дуртсса
Вил захIмат личIанссар даиман дакIний.
