МахIачкъалалив, Оьруснал театрданул хъунмур залдануву, хьунни «Две судьбы, одна дорога» тIисса Аьрасатнал лайкь хьусса артистка, Дагъусттаннал халкьуннал артистка Фаина Графченкол литературалул концерт.

Ва хас дурну дия шаэр, таржумачи ва ванил оьрмулул дус Станислав Сущевский увну 90 шин шаврин, мукунна Фаина Федоровнал цила творчествалул ххуллун 55 шин шаврин. Миксса шиннардий ккалай бур ва Дагъусттаннал шаэртурал шеърирду сахIналия. Концертрал режиссер ва ведущийгу цуппа Фаина Федоровна бия. Сайки кIира ссятрай ччаннай бавцIуну, перерыв къадурну, Фаина Федоровнал бувккунни сахIналия С.Есениннул, М.Цветаевал, Шекспирдул шеърирду, Чингиз Айтматовлул «Легенда о манкурте». Бувккунни С.Сущевскийл таржума бувсса Дагъусттаннал шаэртурал Расул ХIамзатовлул, Фазу Аьлиевал, Анвар Аджиевлул, Аткай Аджаматовлул, Юсуп Хаппалаевлул, Сулайман Рабадановлул, МахIаммад Сулаймановлул, Бике Кулунчаковал, Кадриял ва м.ц. шеърирду.
Лях-карах Фаина Федоровна буслай бия С.Сущевскийл ва цила оьрмулул ва творчествалул ххуллия, Дагъусттаннал шаэртуращалсса, хаснува Расул­ ХIамзатовлущалсса­ дусшиврия.

Ва кьини Фаина Федоровна барча бан бувкIун бия личIи-личIисса ведомстварттал ва школардал вакилтал, ванил учениктал, дустал ва коллегахъул. Фаина Федоровнал ва Станислав Сущевскийл творчествалун, Дагъусттаннал культура майшан чин вайннал бивхьусса захIматран лавайсса кьимат бишлашисса ихтилатру бунни Дагъусттаннал культуралул министрнал хъиривмур Мадина Жаватхановал, МахIачкъалаллал 9-мур лицейрал директор, Жяматийсса палаталул председательнал хъиривмур Шамсият Насруллаевал, шаэр, таржумачи, Аьрасатнал Чичултрал союзрал Дагъусттаннал отделениялул председатель, Ккавкказуллал Чичултрал клубрал президент Миясат Муслимовал, Гьунар бусса оьрчIансса чIяру профиллу дусса лицей-интернатрал( «РМЛИ ДОД») директор Альбина Шутуновал ва м.ц.

Миясат Муслимовал ихтилатрал хъирив Фаина Федоровнал бувккунни ванил лакку шяраваллаха чивчусса «Аулов лакских имена» тIисса шеъри. Ххаллилсса балайрдайну ва барча бунни Дагъусттаннал эстрадалул артистътал Лариса ХIажиевал, ПатIимат Кагировал, Ххадижат Жамалуттиновал, Рукьият ХIамзатовал, Наира РахIмановал. КъавтIавурттал композицияртту ккаккан дунни «Горцы» ансамбльданул.
Ахирданий Фаина Федоровнал оьвчаву дунни сахIналия артистътал, шаэртал, музыкантътал буруччияра тIий. Ванил барчаллагь увкунни цила кьини хъун дан бувкIсса артистътурахь, гъирарай вичIидирхьуну бивкIсса тамашачитурахь.

Андриана Аьбдуллаева