Октябрьданул 21-нний МахIачкъалалив Расул ХIамзатовлул цIанийсса Миллатрал библиотекалуву хьунни Дагъусттаннал мазурдил ва культуралул кьинилун хас дурсса «Народ жив, пока живы его языки и культура» тIисса цIанилусса литературалул ва музыкалул вечер.

Шикку гьуртту хьунни «Зунттал хъами» журналданул хъунмур редактор Хамис Шамилова, жяматийсса ишккакку ва чичу Саэд Ниналалов, мазрал ахттаршиннардаха зузисса Макьсуд ХIажиев, Дагъусттаннал Чичултрал союзрал лакрал литературалул секциялул каялувчи Супиян Оьмаров ва КаратIиял шяравасса вакилтал.
Дагъусттаннай миллатирттал мазру, культура, аьдатру дуруччаву ва хьхьичIуннай даву мурадрайсса байран кIицI лаглансса хIукму бувну бур Республикалул бакIчину ивкIсса Рамазан АьбдуллатIиповлул.

Мероприятиялул гьурттучитурал бувсунни цала-цала миллатрал аьдатирттая, магьирлугърая, кIибавчIунни Дагъусттаннал мазру сахъла баврил опыт. КIицI лавгунни миллатирттал мазру паччахIлугърал аякьалий бикIан аьркиншиву. Мазру машгьур баврин хъунмасса кумаг хъанахъишиву шаэртурал, чичултрал произведенияртту дунияллийн буккан баврийну.

– Жува мудан тикрал буллайнма буру миллатирттал мазру ябан аьркиншиву. Мазру бухкъалаганшиврул ми аьркинссар ишлану бикIан. Ниттил маз чIиви оьрчIал мазрай бикIаншиврул аьркинссар ганахь мудан ниттил мазрайсса гъалгъа буллан, миллатрал кказит-журналлу ккалан, школалий мазру лахьлан. Дагъусттаннал халкьуннан цалчинма-цалчин кIулну бикIан аьркинссар жулва ниттил маз, миллатирттал багьу-бизу. Лакрал миллатрая тIурча, мазру буруччаву мурадрай агьамсса даву дайдирхьуну дуссар. Дагъусттаннал Жяматийсса палаталул председательнал хъиривчу Сапарбаг Аьбдуллаевлул кабакьаврийну тIивтIуссар Эса Аьбдуллаевлул цIанийсса Лакку мазрал центр, – увкунни Супиян ­Оьмаровлул.

Хамис Шамиловал цила ихтилатраву кIицI лавгунни, Дагъусттаннал миллатру миллатруну личIаншиврул, миллатирттал мазру ва культура ядавриха ва хьхьичIуннай давриха зузими цачIун хьуну, ца хьуну зун багьлай бушиву.
Ва ххуллухьсса мероприятиялий хъуннасса къулагъасрайн лавсун бия Дагъусттаннал мюрщи миллатирттал мазру буруччаврил масъала. Мюрщи миллатирттал мазру школардай лахьлай бакъар. Вай ишлану бур так ужагъирттай, – мугу бачIи-кьачIину.

Имара Саидова