«Куркли» тIисса ихIсандалул фонд тIивтIуну бур 2024-ку шинал мартрал 21-нний. Мунияр шихунмай чирилул давурттавух чялишну гьуртту хъанахъисса 118 инсан усса фондрал чIявусса кумагру бувну бур цIуллу-сагъшивруцIун ва цаймигу иширттацIун бавхIуну, захIматсса тагьарданувун багьсса ккурккуллан ва цаймигу инсантуран, цимилагу тIайла бувккун бур кумаг Палестиннал халкьуннан.
Шин ва дачIиннул дянив ва чIивисса фондрал 2 миллиондалия лирчусса арцу харж дурну дур инсантуран кумагру буллай. Ванияр ца зурул хьхьичI фондрайн бувккунни «Жизнь без слез» тIисса ДРООПИ-лул (Дагестанская региональная общественная организация помощи инвалидам) вакилтал ва шиккун заназисса мушакъатсса оьрчIал нину-ппу. Вайннан аьркин дагьлай дия оьрчIру буцлансса ва биян буллансса транспорт. ЧIявусса къуллугъчитурайн бувккун, цичIав кумаг къавхьуну бия. Мунияту нитти-буттал баян бувна арцу датIинсса акция. Ва акциялувух гьуртту хьуну «Куркли» фондрал дирчунни кумагран 100 азарда къуруш арцул.
Му бакъассагу вайннан кумаг бунни фондравуминнал гъан-маччаналгу. Вайнналгу, вай кунмасса чумартсса инсантуралгу, цивппа нитти-бутталгу шанна нюжмардул дянив шанма миллион арцул бавтIун, мушакъатсса оьрчIру буцлансса Газель лавсунни. Ахиргу дакIнийсса мурадрайн бивсса организациялул зузалт ва оьрчIал нину-ппу дакIнийхтуну барчаллагьрай бур «Куркли» фондрал каялувчи Жанна АькIиевайн ва фондрал члентурайн.
Чирину бацIаннав зу бувмур, Хъунасса Заннал гьарнал кулпатравун ттуршийла ххишалану зана баннав бувсса хъинбалартту.
Андриана Аьбдуллаева
