Вай гьантрай Тарихийсса паркравун ниттил мазрайсса диктант чичин бавтIунни лакрал миллат. Жула дакIру, зунттал гьаварал кунна, ххуйсса асардал дуцIин дунни. Диктант чичин бувкIунни буттал аьрщигу ххирасса, иш багьний миллатрахлу махъ учингу, чIарав бацIангу бюхъайсса, ниттил мазгу ххирасса лакрал вакилтал.

Укунсса иширттай та-ухьурчагу чан акъасса, хIурмат лавайсса Сапар Аьбдуллаевлул ва даву цалва бакIрайн ларсун, щаллу дунни. Хъуннасса хъар ларсун, хIарачатрай бия АхIмад Кьурбанов, Супиян Оьмаров, ПатIимат Аьлиева ва цаймигу даврил чIаравбацIултгу. ЧIяву баннав жула дянив уздансса инсантал.

Ихтилат диктантрая, лакку мазрая бухьувкун, ва ниттил маз жула хъирив наниминнан хъамабитлайгу бухьувкун, жула ниттил маз лахьхьингу, му ябангу литературалухь – шаэртурахь, чичултрахь хъунмасса бияла буссар. Цанчирча, ччимур чIумал луттирду канил бувгьуну, хавар бикIу, магьа бикIу, назму дикIу, ниттил маз хъамакъабитансса къаралчину хъанай дуну тIий. Ниттил маз ябаншиврул, цумур миллат бунугу, ниттилмур мазрайсса луттирду, чичрурду чара бакъа канилу дикIан аьркинни. Хаснува мюрщисса оьрчIансса луттирдугу, мультфилмьругу.

Лакку мазрал диктант чичаву ххуйсса даражалий хьунни, цума-цагу ххарину, рязину ия. Бия архсса шагьрурдая бувкIссагума.
Миллатгу, миллатрал мазгу, магьирлугъгу ххирасса цIанихсса балайчи, гьунар бусса артист, инсантуран бусравсса АхIмад АхIмадовгу ия кулпатращал увкIун. Цир дусса ва дунияллий ванияр хъуннасса аваданшиву. Вана варихха инсаннал хIакьсса ххуйшиву, дакIнил хъиншиву.
Лакку мазгу, ххаллилсса балайрдугу, шеърирдугу ххирасса, мазралгу, мукъулгу кьадру-кьимат бусса диктант чичин бавтIцириннахь барчаллагьгу тIий, чIа тIий бура дунияллий паракьатшиву, кулпатирттаву ххаришиву ва цIуллушиву.

Булбул Оьмариева