Хъунмасса тIайлабацIулущал гьуртту хьунни А. Къапиевлул цIанийсса Лакрал музыкалул ва драмалул театр махъсса зурул дянив кIира-кIира сий лахъсса театрал фестивальданий. Ч. Айтматовлул «Ниттил хъу» произведениялийсса спектакль ккаккан бунни Грозный шагьрулий «Федерация» тIисса щалагу Аьрасатнал миллатирттал театрдал арилчинсса фестивальданий ва Нальчик шагьрулий «Южная сцена» тIисса дунияллул халкьуннал дянивсса театрдал фестивальданий.
Фестиваль «Федерация» дуллалиссар 2019 шиная шиннай лув-ялув гьаршинах билаятрал театрал ишккаккултрал сипталийну Аьрасатнал культуралул министерствалул кабакьаврийну. Фестивальданий гьуртту хьун Экспертный советрал личIи байссар Аьрасатнал кIиттуршва миллатрал театрданува ацIния мукьва яла язими. Мукьилчинни Лакрал театрданун билаятрал язими театрдал сияхIравун багьансса тIайлабацIу хьусса.
Уттинингу Аьрасатнал хьхьичIунсса театрал критиктурал лавайсса кьиматран кIицI лавгссар А. МахIаммадлул «Камаллил Башир», Ж. Мольердул «Жорж Данден» ва У. Шекспирдул «Тарс мютIи баву».
Ва базилухь ккаккан бувсса «Ниттил хъу» спектакльданунгу хьхьичIунсса театрал критиктурал: Аксинья Норманскаял ва Ксения Стольнаял бивщунни лавайсса кьимат.
Вай гьантрай Къабардин-Балкьарнал хъун шагьрулий къуртал хьусса «Южная сцена» тIисса дунияллул халкьуннал дянивсса театрал фестивальдания тIурча, Лакрал театр зана хьунни кIира-кIира наградалущал.
«Ниттил хъу» спектакльдануву ниттил роль дургьусса Дагъусттаннал халкьуннал артистка Луиза Шагьдилова лайкь хьунни «Лучшая женская роль» дипломран, постановкалул къюкIну хьусса, Толгонайл сипат куртIну дюхханну ккаккан даврихлу.
Дагъусттаннал лайкь хьусса артистка Зинаида Чавтараева лайкь хьунни «Лучшая женская роль второго плана» дипломран, Алиманнул роль хъамитайпалул къюву ва дакIнил чани асар хьунну дагьаврихлу.
ДакIнин бутанну, «Ниттил хъу» спектакль бивхьуссар Аьрасатнал Федерациялул Президентнал ГрантрацIух ва Дагъусттан Республикалул бакIчинал кабакьаврицIух.
Режиссер-постановщик — В.Тхапсаевлул цIанийсса Ухссавнил АьсатIиннал паччахIлугърал академический театрданул каялувчи, Ухссавнил АьсатIиннал ва Къабардин-Балкьарнал халкьуннал артист Гиви Валиев.
КIицI бан багьлай чIалай бур, «Ниттил хъу» спектакль багьну бушиву «Золотой фонд театральных постановок России» тIисса
Аьрасатнал Театрал ишккаккултрал союзран 150 шин шаврин хас бувну итабавкьусса проектрал сияхIравун.
ДакIнийхтуну барча тIий жула ххирасса актрисахъахь – Луиза Шагьдиловахь ва Зинаида Чавтараевахь ларайсса наградартту, чIа тIий буру ттигу чIярусса шиннардий ххаллилсса рольлайну жува хIайран буллансса цIуллушиву ва тIайлабацIу.
Зулайхат Тахакьаева
