МахIачкъалалив «Дагестан» РИА-лий хьунни, цIуну итабавкьусса «Zащитник» тIисса журналдания бусласисса батIаву. Журналданий бур аьралийтуран ва миннал кулпатирттан кумаг буллалиминнаясса бутIагу.

Шикку гьуртту хьунни ДР-лул Информациялул ва печатьрал агентствалул каялувчи ­Арсен Юсупов, «Zащитник» журналданул хъунмур редактор Шуаьнат МахIаммадова, Дагъусттаннал Халкьуннал Мажлисрал хасъсса аьралий операциялул гьурттучитурал ва ветерантурал иширттал комитетрал председатель Аьбдулла МахIаммадов, ванал хъиривчу Шамил Оьмаров, «Книга боевой славы. Дагестан. Они сражались за Родину» тIисса проектрал ва «Дети героев, отдавших жизнь за Родину» тIисса фотовыставкалул автор, Чувшиврул ордендалул кавалер Убайдуллагь Ибрагьимовлул щащар ПатIимат Пайзуллаева, «Доблесть гор» программалул гьурттучи Медетхан ХIамдуллаев ва республикалул журналистътал.

Шиккува бувсунни Дагъусттаннал бакIчи Сергей Меликовлул чIарав ацIаврийну дунияллийн бувкшиву журнал. Ванал кIицI лавгуна, Ватандалул ххуллий жанну дуллусса аьралийтурал аьпа абад баву мурадрайсса, хъуннасса агьамшиву дусса журнал хъанахъишиву.
Арсен Юсуповлул барча бувна журналданул цалчинсса номердануха зий бивкIсса редколлегия. Ванал бувсуна ваний хасъсса аьралий операциялул гьурттучитурая хIакьсса информация бушиву.

Шуаьнат МахIаммадовал бусаврийн бувну, Ухссавнил Ккавкказнаву укунсса журнал цалчин итабавкьуну бур.
Ванил цалчинсса тиражгу тIайла дуккан най дур хасъсса аьралий операциялий гьуртту хъанахъиминначIан. Гьурттучитурал маслихIат бувна, патриот зумуну оьрчIру тарбия булланшиврул, хьхьичIва-хьхьичI ва журнал кIулшивуртту дулаврил идарарттайх бачIинсса.
Ахирданий презентациялул гьурттучитурайх бавчIуна журналлу.

Имара Саидова