МахIачкъалалив Учительская кIичиравусса №3в къатлул шамилчинмур корпусраву ялапар хъанахъиминнащал хьунабавкьунни къуллугъчитал.
Ванин багьана хьунни «Черновикрал» Телеграм каналданийн квартирардал заллухърунная бувкIсса захIматсса шартIирдал хIакъиравусса чIявусса аьрзарду. Къатлуву чIявуну лешлай бур чани, дакъар щин. Шиву ялапар хъанахъиминнаясса цаппара бур ва бакьин бувну пайда къахьуншиврия, лекьан бан аьркиншиврия тIий.
Къатта аварий тагьарданийссаннун ккаллину бакъанугу, 2025-ку шинайнсса кутIасса чIумул пландалувун бувтун бур. Подрядная организация «Дагстрой М» ООО-лул пишакартал электричествалул, щинал, гъилишиврул системарду дакьин дуллай, зий бур.
КIицI лавгсса къатлуву ялапар хъанахъиминнащалсса хьунабакьаврий гьуртту хьунни Капитал ремонтрал фондрал хъунаманал хъиривчу Заур Бахмудов, Дагъусттаннал строительствалул министерствалул, Жилищная инспекциялул, «Махачкалаводоканал» ООО-лул, Управляющая компаниялул, ЖКХ-лул сфералувусса Жяматийсса контрольданул региондалул центрданул вакилтал.
Цавай квартирардал заллухъру бур къатта нигьачIисса тагьарданий бушиврий мукIруну, ва лекьан бан аьркинссар тIий, цавай рязийну бур гьануцIакул бакьин баврий.
Цинявппа аьрзирай бур ялув къатта бувсса магистральный щинаххуллува щин экьи най дур тIий. ЧIярусса шиннардий мукун экьи нанисса щинал лувчIинниялу буцIин бувну, къатлул чIиртту вивату ва ялату зия бувну бур. Подъездирттаву ва квартирардаву хъатрулул кьанкь дур ва чIирттайх мяххи даркьуну дур. КьатIа тIий дур штукатурка, бизлай бур сир ва обои. Хасъсса организациярттал вакилтурал, заллухъруннал суаллахьхьун балжисса жавабругу дуллуну, хIукму бунни къатта гьануцIакул бакьин бан, чялишсса заллухъругу, Фондрал зузалт ва подрядчикталгу ца хьуну.
– Хасъсса комиссиялул агьалиная аьрзарду бувкIун махъ, бувтунни кIицI лавгсса къатта капитал ремонтрал программалувун. Къатлул вивсса инженер системарду чIумуй дакьиндантIиссар, агана бахчилачисса инсантал къабуккарча. Хьунабакьаврий гьаз бувсса масъалартту щаллу бан хьунтIиссар чан-чанну тIий, – бувсунни Капитал ремонтрал фондрал хъунаманал хъиривчу Заур Бахмудовлул.
Ванал мукунна оьвчаву дунни квартирардал заллухъруннайн капитал ремонтрахсса взносру дулаву чялиш дуккан дан (хIакьинусса кьини- 43%) ва масъала ччяни щаллу шаву мурадрай подрядчиктурал организациярттащал хIала-гьурттуну зун.
Андриана Аьбдуллаева
