Октябрь зурул 18-нний, кIюрххил ссят 10-нний, МахIачкъалалив «Россия – моя история» тIисса тарихийсса паркравун батIантIиссар гьашинугу чIявусса лак, лакку мазрайсса хъун диктант чичин.

ДакIнин бутанну дукIусса шин диктант къачирчуну лях ларгшиву. Буттал кIанттул цIанийсса Хъун дяъвилий Ххувшаву ларсун 80 шин хьуну духьувкун, диктант хас дуллалиссар ва юбилейран, ппухълуннал чувшиврун ва ниттихъал къинттуллухсса захIматран.

Сакиншинначитурал актив ххуйсса даражалий даву щаллу дансса мурадрай зий буссар. Сакиншинначиталгу хъанахъиссар ДИРО, Ися Аьбдуллаевлул цIанийсса Лакку мазрал центр, Дагъусттаннал Чичултрал союзрал лакрал литературалул секция Лакрал райондалущал, Лакрал театрданущал, «Илчи» кказитращал ва Мариян Илиясовал цIанийсса «Дараччи» фондращал уртакьну. Диктантрал ххуйшивуртту таманссар. Лакран лакку маз кIулшиву ци даражалий бурив хIисавравун ласунсса сант рутлатиссар. Диктантрал гьанумур мурадгу варихха. Диктант чичаву дакъа, цаймигу бахшишру дуссар.

Лакрал агьалинал, зунттал халкьуннал оьрму, ичIаллил багьу-бизу чIалачIи буллалисса Лакрал райондалул майдан, концертрал программа. КIурссану хьхьичIунсса гьурттушинна дурссия ЦIуссалакрал райондалул Культуралул управлениялул вакилтурал. Вайннайн оьвкуссия культуралул программалийну диктантрал даву чIюлу дуван. Гьашину кIула – Лакрал райондалухьри. ЯлунчIин – Ккуллалмур райондалухь. Балайрду учинтIиссар машгьурсса балайчитуралгу.

Умудрай буру ва мероприятиялий исватну ккакканссар тIий лакку мазрахсса ччаву жула халкьуннаву ядурну душиву, лакку мазрайсса диктант чичингу гъира бушиву ва миллатрал маз яшаврил цIаний батIингу кIулсса бушиву. Диктантрал гьанумур мурадгу маз ябаврил агьамшиву духьувкун, ябаврил ххуллийсса ца чIири-хъунсса давугу хъанай духьувкун.

ПатIимат Рамазанова