Октябрьданул 9-нний хьунни МахIачкъала шагьрулул собраниялул сессия. Муний ххал бигьлай бия бувагу ца масъала – шагьрулул бакIчи увчIаву.
Августрал 28-нний Дагъусттаннал бакIчинал ва ХIукуматрал Администрациялул баян бувну бия МахIачкъала шагьрулул бакIчинал къуллугърайнсса кандидатътурал хIакъираву предложенияртту кьамул дуллай байбивхьушиврия. Документру кьамул буллай бия сентябрьданул 17-ннийнин.
Дагъусттаннал бакIчи Сергей Меликовлул шагьрулул собраниялийн ларcун дия шама кандидатнал цIарду: шагьрулул бакIчинал кIанайма Жамбулат Салавов, шагьрулул бакIчинал хъиривчу Хаким Ашикьов, «Справедливая Россия – патриоты За правду» партиялул чулухасса Халкьуннал Мажлисрал депутат Марат Пайзуллаев.
Цала программалул хIакъираву депутатътурал хьхьичI махъ лахълай, Жамбулат Салавовлул бувсунни хъунмур къулагъас дуван най ушиву шагьрулул жяматийсса ва политикийсса тагьарданух, шагьрулул ялапарлувтурал социал иширттах, багьу-бизулух, СВО-лул гьурттучитурал кулпатирттан кумаг баврих, медициналул хIаллихшинну цинявннан архIалну дуллалаврих, жагьилтурал сиптарду лядуккан даврих, инвестицияртту дучIан даврих, шагьрулул доходрал бутIа гьарза баврих.
Салавовлул пикрилий, яла агьамми масъаларттуну хъанай бур шагьрулул дазурду ккаккан даву, агьалинал аьдад кIул даву, шагьрулул хозяйство низамрайн дуцаву. «Масалдаран, 300 азара инсаннан хIисавсса инфраструктура дусса шагьрулий цIана ялапар хъанай ур дянивну 1 млн ва 200 азара инсан. Шагьрулий ялапар хъанахъисса агьалинал аьдад къакIулсса чIумал, ганил бюджетрая ва ялапарлувтурал багьу-бизу ххуй баврия гъалгъа тIун къашайхха», – увкунни Салавовлул. Ванал мукунма бувсунни шагьрулувун духлай душиву 14 поселокгу, миннух уттинин къулагъас дуллай бивкIун бакъар. Утти вайннух личIинурасса къулагъас дикIантIий дур.
Кандидатнал бувсунни шагьрулул бакIчинал кIанайману зий ивкIсса шанма зурул мутталий цалла дурсса давурттаягу.
Лавсун бур автобусру, ми зунтIий бур 2026 шинал январьданул 1-нния тинмай. Зузи дурну дур жяматийсса транспортрах нагъдасса арцу къадулайсса система 10 къурушралгу кьювкьуну. Зий дайдирхьуну дур багьлухсса парковкардал пилотрал проект. Бакьин буллай байбивхьуну бур имам Шамиллул проспект.
Хъуншагьрулул бакIчинал къуллугърайн тамахI бивхьусса Мурад Пайзуллаевлул бувсунни махъсса зурдардий МахIачкъалалив хъинчулийсса дахханашивуртту хьуну душиву. Ванал депутатътурахь тавакъю бунни Жамбулат Салавовлухлу чIурду булун.
Хаким Ашикьовлул цала программалуву бувсунни аьркинну бушиву налогру гьарзану датIлан, бюджет гьарта-гьарза буван.
Кандидатътурал махъру лавхъун махъ ихтилатру бунни депутатътурал ва жяматрал чулухасса вакилтурал: шагьрулул 2-мур азарханалул хъунама хIакин МахIаммад Иманаьлиевлул, СВО-лул гьурттучи ХIабиб ХIанапиевлул, МахIачкъалаллал Ветерантурал советрал председатель Ферзулла Кьагьримановлул, шагьрулул Жяматийсса палаталул председатель Салим Аьбдулкьадировлул ва цайминналгу.
Миннал депутатътурахь тавакъю бунни чIурду булун Жамбулат Салавовлухлу.Аьчухну чIурду буллуну, 45-гу депутатнал МахIачкъалаллал бакIчину увчIунни Жамбулат Салавов Шяпинал арс.
Сергей Меликовлул Салавов барча унни шагьрулул бакIчинал къуллугърай цIакь аву.
Муния махъ хьунни пресс-подход, муний Жамбулат Салавовлул жавабру дуллунни журналистътурал суаллахьхьун.
Лажин хIадур дурссар
ХI. Аьдиловлул
