Ттигъанну, Дагъусттан Республикалул ХIукуматрал ХIукмулийн бувну, республикалул кIулшиву дулаврил идарарттал зузалтран дуллунни наградартту. Дагъусттан Республикалул ХIукуматрал чулухасса ХIурматрал грамоталун лайкь хьунни МахIачкъала шагьрулул Р.С. Рамазановлул цIанийсса 18-мур школалул директорнал хъиривмур Маммаева (Нурдуева) Тамара ХIажимурадлул душгу.

Бувну бур Тамара 1965-ку шинал Хасавюрт шагьрулий Читтурдал шяравасса ХIажимурадлул ва КIулушацIрал шяравасса Жансиратлул кулпатраву.1970-ку шинал вайннал кулпат бивзун бур МахIачкъалалив. 1972-ку шинал Тамара лавгун бур 1-мур классравун МахIачкъалаллал 27-мур школалийн. 1982-ку шинал, школа къуртал бувну махъ, бувххун бур Дагъусттаннал паччахIлугърал университетрал филологиялул факультетрайн. Ва къуртал байхту, 1987-ку шинал, тIайла бувккун бур Гъумучиял дянивмур даражалул школалий зун. Шикку оьрус мазрал ва литературалул дарсирдал учительну зий бивкIун бур шанна шинал мутталий. 1990-ку шинал, кулпатрал хьуну, Тамара бивзун бур МахIачкъалалив. Ванил оьрмулул дуснугу хьуну ур райондалий ва ванил кьатIув цIа дурксса муаьллим Маммаев Нураттиннул арсурвавраясса ца Зайнуттин.

Шагьрулий жагьилсса пишакар зун бивкIссар Дагъусттаннал паччахIлугърал университетрал «Русский язык в национальной школе» кафедралий лаборантну. 1995-ку шинал – муххал ххуллул Ухссавнил Ккавкказуллал отделениялул 85-мур школа-гимназиялий оьрус мазрал ва литературалул учительну. Ца-кIира шинавун – МахIачкъалаллал шагьрулул 22-мур лицейраву. Шикку зузисса чIумал Тамара ХIажимурадовна гьуртту хьуссар «Учитель года-1999» тIисса конкурсрай, бувгьуссар 1-сса кIану.

2003-ку шинал Тамара ХIажимурадовна бивтссар МахIачкъала шагьрулул 18-мур школалул директорнал хъиривмурну. Муния шинмай лайкьну му къуллугъ биттур буллайгу бур ва. ДакI марцIну бувсса ва буллалисса захIматрахлу лайкь хьуну бур личIи-личIисса наградарттан ва цIардан, вайннувух – Аьрасатнал Федерациялул КIулшиву дулаврил ва элмулул министерствалул чулухасса ХIурматрал грамоталун, «Почетный работник общего образования Российской Федерации» ва «Отличник образования Республики Дагестан» лишаннан, МахIачкъала шагьрулул КIулшиву дулаврил управлениялул чулухасса грамотарттан.
Педагогнал даврил ванил аьмсса стаж хъанай бур 36 шинайсса, директорнал хъиривмурну – 21 шинайсса. Ванил ва Зайнуттиннул дянив хьуну бур кIива душ, ур ца душнил оьрчI. ПатIимат тIимур душ зий бур Пенсион фондрай отделданул начальникнал хъиривмурну, Наина тIимур душ Москавлив Хъамитайпалул цIуллу-сагъшиврул центрданий гинекологну бур.

Тамарал буттал, Читтурдал шяравасса Нурдуев ХIажимурад Исуплул арснал, Ленинградрай къуртал бувну бур Вознесенскийл цIанийсса Экономикалул институт. Зий ивкIун ур МахIачкъалаллал 1736 автоколонналул начальникнал хъиривчувну. Жагьилсса шиннардий комсомолданул давурттайгу ивкIун ур. 80-ку шиннардий Нурдуев ХIажимурад зий ивкIссар Лакрал райондалул ххуллул участокрал начальникну.

Тамарал нину Нурдуева (Камалова) Жансират Бадруттиннул душ оьрмулухун зий бивкIун бур Дагъусттан Республикалул Шяраваллил хозяйствалул министерствалий личIи-личIисса къуллугъирттай, вайннувух – отделданул начальникнугу. Цилла даву ххуйну кIулсса, пасихIну ихтилат буван шайсса Жансират 70-ку шиннардий телевизордал экраннай чIявуну ккаккан бувайсса бивкIссар, Минсельхозрал чулухасса комментатор хIисаврай, республикалул шяраваллил хозяйствалул иш-тагьардания «Дагъусттан» хавардал программалий буслай. ХIажимурад ва Жансират цаннан ца кIул хьуну бур аэродромрай, Оьллаарив, зунттал шяраваллава шагьрулийн ва махъуннай самолетру лехлахисса тай шиннардий. ЦачIу нахIуну ва хIалалну 49 шинай оьрмугу бувтун, аьпалулгу хьуну бур вай ца шинал (2013 ш.) ца зурул дянив, цаннал хъирив ца. Вайннал дянив хьуну бур 4 оьрчI. Вайннавасса чIана-чIивиманал Сагидлул оьрмулул 45 шинаву СВО-лий виричувнал кунна жан дуллуссар цаппарасса зурдардил хьхьичI.
Школалий дуклакисса чIумал гьарцаннал икIайхьунссар ххирасса учитель.

Тамара ХIажимурадовнагу ттун ххирами учительтуравасса цар. Учитель хьуншиврул анжагъ институт къуртал баву къагьассар, бити му ЯтIул дипломрайсса бухьурчангума. Дуклаки оьрчIан учитель ххира шайссагу, анжагъ ца хасиятрайну, учиннуча, дакI хъиншиврийну, цалла дарс ххуйну кIулшиврийну ягу янна марцIну ва цIу буну лаххайшиврийну бакъача, цавура цачIун хьусса ххуйсса цимирагу хасиятрайнур. Дахьва вузгу къуртал бувну, Гъумучиял дянивмур даражалул школалий дарсру дихьлан бувкIсса Тамара ХIажимурадовнагу ларай кIицI ларгсса лишаннацIунсса цайминнуйнугу ххира хьуна жун. Жун бахтти хьуна ванил кумаграйну оьрус мазрал литературалул классиктурал язими произведениярттал мяъна-мурад лаласлан, ванил пасихIсса, экьинанисса, марцIсса ихтилатрах вичIи дихьлан. Тамара ХIажимурадовна жул классрал каялувчигуя. Хъунмасса гъирарай бачайссияв жу ванил дарсирдайнгу, личIи-личIисса мероприятиярттайнгу.

Учитель – му пиша бакъар, му призваниер, оьрмулул кьаралли. НахIакь дан бакъархха учайсса, цал учительну ляхъан аьркинссар, яла учитель хьун куну. Укун учительнува лявхъусса бур Тамара ХIажимурадовнагу.
Барча тIий наградагу, Учительнал кьинигу, чIа тIий буру Тамара ХIажимурадовнан цилла дакIнил ларсъсса даврий ттигу чIярусса шиннардий зунсса цIакьсса цIуллу-сагъшиву, бусрав-барчаллагь бусса дуклаки оьрчIру, кулпатраву нахIушиву ва ххаришивуртту.

Бадрижамал Аьлиева