Октябрьданул 1-3-нний МахIачкъалалив Дусшиврул къатлуву лавайсса даражалий хьунни «Устойчивое развитие горных территорий» тIисса дунияллул халкьуннал дянивсса 2-мур форум ва «Содружество» TraveL NUB туристический форум . Ваний гьурттушинна дунни Азирбижаннал, Къиргъизиянал, Таджикисттаннал, Узбакисттаннал, Къазахъисттаннал республикарттаясса, Индиянал, Ираннал, Пакистаннал, Белоруссиянал, Адыгеянал ва Алтай крайраясса делегациярттал, машгьурсса аьлимтурал, дунияллул халкьуннал дянивсса идарарттал экспертътурал, властьрал органнал вакилтурал.
Форумрал хьхьичI бивхьусса агьамсса мурадну бур, дунияллул халкьуннал опытгу ишла бувну, зунттал районну хьхьичIуннай даву, федерал даражалий зунттал кIанттурду ябансса политика хIасул даву. Му бакъассагу, региондалул агьалинал социал-экономикалул ахIвал лавай баву, тIабиаьтрал сурсатру дуруччинсса ххуллу-чаранну лякъаву.
Форумрал сакиншинначиталну бия МПА СНГ, Аьрасатнал Федерал Мажлисрал совет, ДР-лул ХIукумат, Аьрасатнал элмулул академия, Аьрасатнал Федерациялул жяматийсса палата.
Шиккува кIицI лаган, ДР-лул ХIукуматрал, Экономикалул министерствалул лавайсса даражалий сакин дурну дия шанма гьантлийсса, сайки 1000 инсан гьуртту хъанахъисса, форумрал программа: пленарный заседанияртту, ккуркки столлу ва цаймигу мероприятияртту.
Шадлугърал даражалий форумрал даву дайдирхьуна Аьрасатнал Федерал Мажлисрал советрал председатель Валентина Матвиенкол чулухасса барча баврийну.
Гьурттучитурахь ва хъамаллурахь барчаллагь увкуна республикалул бакIчи Сергей Меликовлул.
– Аьрасатнаву Дагъусттаннай цалчин кьамул дурссар зунттал кIанттурдан хасъсса закон. Кьамулгу дурну, нирхиравун дагьну зий дуссар «Социально-экономическое развитие горных территорий Республики Дагестан» тIисса, зунттал районну ядаву мурадрайсса паччахIлугърал программа. Аьмну ва программалувун духлай дур 7 направление. Ва программалувух хIала бухлахиминнан буллай буссар паччахIлугърал чулухасса кумаг.
Дагъусттан бур зунттал, экологиялул, экстремал ва цаймигу журардал туризм зузи дуллансса, ляличIисса тIабиаьтрал шартIру ва гьавалул тагьар дусса кIану. Форумрал кумаграйну властьрал органнал, бизнесрал ва жяматийсса идарарттал вакилтал, хьхьичIунсса экспертътал цIачIун хьуну вай масъаларттаха зунсса сант ххишала хъанахъиссар, – увкунни Сергей Меликовлул.
МПА СНГ-лул генеральный секретарь Дмитрий Кобицкийл кIицI лавгуна кIива форум цачIун баврия хъунмасса мюнпат хьунтIишиву зунттал кIанттурду ва туризм хьхьичIуннай даврин.
– Дагъусттаннай жу хIурмат-кьиматрай кьамул бунну. Сант дирирну дунура барчаллагь учин ччай ура республикалул бакIчинахь ва хъамал ххирасса Дагъусттаннал агьалинахь, – увкунни Дмитрий Кобицкийл.
Форумрай ххал бивгьусса масъалартту хъамаллурал тIимунийн бувну, СНГ-лул парламентирттал дянивсса Ассамблеялул хьхьичIун ласун тIий бур.
– ХIакьинусса оьрмулул тасттикь буллай бур зунттал кIанттурдал буруккинтту хIала-гьурттуну ва чялишну дузрайн буккан буллан аьркиншиву. ХIасул дан багьлай бур тIабиаьтрал сурсатру рахIму-цIими буну ишла дуллансса комплексный программа. На барчаллагьрай ура зунттал кIанттурдал буруккинттаха зузисса элмийсса сообществалийн, циняв цачIун бавтIун, зунттал кIанттурдайн багьайсса масъалартту щаллу буллансса хIалу дулаврихлу, – увкунни Узбакисттаннал вакил Борий Аьлихановлул.
Форумрай гьуртту хьунни Федерациялул Советрал вице-спикер Инна Святенко, АьФ-лул АПК ва Шяраваллил кIанттурду хьхьичIунмай баврил комиссиялул председатель Айгун МахIаммадов, РАН-далул Географиялул институтрал директор Ольга Соломина, РАН-далул Географиялул институтрал хьхьичIунсса зузала Алексей Гуня, Аьрасатнал Шагьрурдал союзрал директор Андрей Максимов, БРИКС хIукуматирттал форумрал президент Ананд Пурнима.
Ванал кIицI лавгунни, зунттал кIанттурду хьхьичIунмай баврийну Дагъусттаннал ва БРИКС хIукуматирттал дянивсса дусшиврул ламурду бихьлахьишиву. Дагъусттаннащал хIала-гьурттушиврийсса арарду хIасул даву мурадрай Ананд Пурнимал Индиянавун хъамалу оьвкунни Сергей Меликовлуйн. Чялишсса гьурттушинна дунни форумрай Къазахъисттаннаясса делегациялул.
Дагъусттаннал ХIукуматрал председатель Аьбдулмуслим Аьбдулмуслимовлул кIицI лавгунни Аьрасатнал регионнай так ца Дагъусттаннай кьамул дурну душиву зунттал районну ядаву мурадрайсса программа.
– Ххарину ура жула республикалийсса форумрай гьуртту хьун чIявусса бусравсса хъамал бувкIун тIий. ЧIалай бур цинявппа цачIун хьуну зунттал кIанттурдал масъаларттах къулагъас дан багьлай бушиву. Санкт-Петербурглив хьусса 1-мур форумрай чIявусса докладчиктуравух ца яла хъунмур секция буссия Дагъусттаннаясса.Тийх жула делегация итталун багьаву хIасаврайн лавсун, 2-мур форум Дагъусттаннай бан маслихIат ккавкссия, – увкунни Аьбдулмуслим Аьбдулмуслимовлул.
Журналистътурал суаллахьхьун жавабру дуллай, премьер-министрнал бувсуна республикалий агротуризм хьхьичIуннай даврин 80 млн къурушрал итадаркьушиву.
Форумрал лагрулий хьунни «Голос гор» тIисса жагьилтурал форум, «Северо-Кавказское научное сообщество. Опыт и перспективы развития» тIисса ккуркки стол, «Экологический туризм: комфорт, безопасность, гармония с природой» тIисса сессия ва «Межгосударственный горный туристический маршрут» тIисса дискуссия.
Форумрай шаннагу кьини ххал бивхьунни зунттал районнай АПК хайр буну зузи баврил, шяраваллил хозяйствалувусса цIушиннардал, туризм хьхьичIуннай даврил, кIанттул цилакаялувшиврул реформалул хIакъиравусса масъалартту. КIицI лавгунни зунттал кIанттурду хьхьичIунмай баву мурадрайсса программарттавух жагьилтал гьуртту хъанан аьркиншиву.
Дагъусттаннал экономикалул министр ХIажи Султановлул ва «Росконгресс» фондрал проектирдал каялувчи Всеволод Шевелевлул ххал бивгьунни зунттал кIанттурду хьхьичIунмай баврин хасъсса масъалартту.
Форумрал кIилчинмур кьини хъамаллуран ккаккан бунни «Лезгинка» ансамбльданун цIуну бувсса идара. Ананд Пурнимал бувсунни дунияллийх машгьурсса «Лезгинка» ансамбльданул коллектив цимилгу Индиянавун бувкIшиву. Артистътурал ккаккан дунни ансамбльданул мусил фондравасса къавтIавуртту.
Хъирив Сергей Меликовлул, Аьбдулмуслим Аьбдулмуслимовлул ва бусравсса хъамаллурал тIутIив дирхьунни Ленинский
