Октябрьданул 7-нний МахIачкъалалив Дусшиврул къатраву дурунни Аьрасатнал дянивмур даражалул профессионал кIулшиву ласаврил системалун 85 шин шаврин хасъсса шадлугърал мероприятие. Ванийн пишарду лахьлахьими барча буван бувкIун бия педагогтал, студентътал ва хъамал.

Педагогтал ва студентътал барча бунни Дагъусттаннал дуккаврил ва элмулул министр ЯхIия Бучаевлул. Ванал мукунна дурккунни ДР-лул ХIукуматрал председатель Аьбдулмуслим Аьбдулмуслимовлул цIаниятусса барча баврил адрес.

– Дянивмур даражалул профессионал образованиялул хIакьину кIулшиву ларсъсса пишакартал хIадур бавриву бугьлай бур агьаммур кIану, му хъанай бур экономика лядуккан даврил гьануну. Миннал бугьлай бур профессионалтурал ва наставниктурал кIанттурду. Миннал кIулшивурттайн хъар хъанай дур ялун дучIансса чIумал азарахъул жагьилтурал цала сянатрай дакI дацIаву ва сивсуну хьхьичIунмай нанаву. Зу хъанахъиссару хIакьину захIматрал качествалул, творчествалул ва жаваблувшиврул цIусса стандартру ккаккан дуллалимину. Зуща гьарцаннаща бюхълай бур зува дуклакисса кIанай, зузисса бутIуву хьун лидертал, асар биян буван ттизаманнул республикалул тагьар даххана даврийн, – увкунни премьер-министрнал.

ХIадур бувссар ХI.Аьдиловлул