МахIачкъалалив найнна дур чIявусса квартирарду бусса къатри дакьин дуллалисса программалул лагрулийсса давуртту. 2025-ку шиналсса пландалийн бувну, бакьин бан аьркинссия 84 къатта. ХIакьинусса кьини гьануцIакул бакьин бувну къуртал бувну бур 8 объект.

ЦIанасса чIумал 23 къатлуву най дур давуртту. ЛяличIисса къулагъасрайн ларсун дур 21 къатлувусса лифтру. Ми зузи дантIий дур октябрь зурул ахирданийнин.
Мирзабековлул цIанийсса кIичIиравусса №171 къатлуву «М-строй» ООО подрядная организациялул 90% щаллу дурну дур магъи дакьин дуллалисса давуртту. Къуртал дантIиссар октябрь зурул 12-ннийнин. ЧIаравсса къатлувугу (Мирзабекова №169) магъи дакьин дуллалисса давуртту вара компаниялул 30% щаллу дурну дур. Вагу октябрьданул 12-ннийнин къуртал дан аьркинссар. Манташевлул цIанийсса кIичIиравусса 15-мур къатлуву лажин чIира бакьин бантIиссар октябрь зурул 15-ннийнин.
Стояна Джорова кIичIиравусса 5-мур къатлуву ООО «Строитель» подрядчиктурал организациялул даххана дуллай бур электричествалул ва гъилишиврул системарду. ЦIанасса чIумал 35% давурттал дурну дур. Укуннасса давуртту дуллай бур Радужная кIичIиравусса №21а къатлуву ООО «Монолит-группа».
Ирчи Къазахълул цIанийсса кIичIиравусса №22 б къатлуву ООО «Стройбут» компания дакьин дуллай бур магъи, 60% давурттал дурну дур. Подрядчиктурал бусласимунийн бувну, ва зурул ахирданийнин къуртал дантIий бур.
– Жу ялув бавцIуну буру циняр давуртту ххуйну ва цила чIумал даншиврул, агьалинан бигьа-рахIатсса шартIру дузал даншиврул. Инсантуран бувчIин аьркинни, капитал ремонтрахсса взносру чIумуй дулурча, вай давуртту хъиннура анаварну щаллу дуллан бюхъантIишиву, – тIий ур Фондрал каялувчи Нажмуттин Ханбалаев.
Андриана Аьбдуллаева