Октябрьданул 5-сса кьини щалагу дунияллий кIицI лагай Учительнал кьини. Лахъа-хъун бай ва бигьа бакъасса пишалул ххуллий захIмат бихьлахьими. Замана цукун баххана хьурчагу, гьарица чIумал оьрчIру тарбия баврил ва миннан кIулшивуртту дулаврил ххуллий учитель хъуннасса хъар лахълай ур. Ххуйсса хIакиннал, инженернал, строительнал, цума-цагу пишакарнал кIулшивурттал гьану школалийри бизайсса. Мунияту, оьрчIру ххуйсса учительначIан багьарча, хъунмасса бахтти хьушиврун ккалли бан бучIиссар.
Мяйжаннугу бахтти хьуну бур ХIасанова Маликат Шяъвановнал дарс дишин кьисмат хьусса оьрчIангу. Ккуллал, Вихьуллал школардай, МахIачкъалаллал 37-мур гимназиялий зий, ванил цикссагу оьрчIру итабавкьуну бур ххуйсса кIулшивурттал гьану бивзун. КуртIсса кIулшивуртту дусса ххаллилсса учитель ва оьрчIал дакIурдивун ххуллу ласун кIулсса, миннах ччаву дусса тарбиячи. Цикссагу барчаллагьрайсса оьрчIру ва нину-ппу. ХхюцIалуннийн дирсса шиннардий дарсру дихьлай, цикссагу оьрчIру, кIулшивурттугу дуллуну, тIайласса ххуллийн бивчуну бур Маликат Шяъвановнал.
Бувну бур ва Вихьуллал шяраву, щалагу райондалий хIурматрайсса Шяъван ХIасановлул кулпатраву. Бюхъу-бажар бусса, гьарица затрал сант кIулсса адамина ивкIун ур Шяъван. Ванал къуртал бувну бур Харьковрай МВД-лул аьралий училище партиялул лавайсса даражалул школа, Дагъусттаннал университетрал филологиялул факультет. Циняв — ЯтIул дипломирттай. МуницIун, ва ивкIун ур иш багьний инсаннал чIарав ацIайсса, бивкIу-букку хъун байсса, аьркинний махъ бусайсса, къалмакъал хьуний маслихIат байсса, шяраваллил ттарцI хьусса, райондалунгу акъа чара бакъасса инсан.
Нину Аьйшатгу ххуйсса агьлу-авладраясса, аьрабрай дурккусса, щалагу Ккавкказнаву цIа машгьурсса аьлимчу Аьшав МахIаммадовлул душ бивкIун бур.
Укунсса нитти-буттая цамур куццуйсса душ бизангу къабучIия. МарцIну ххювардай Вихьуллал школагу къуртал бувну, Маликат бувххун бур Дагъусттаннал университетрал филологиялул факультетрайн. Бюхъу-хъит бусса душ, най буна итталун багьну, факультетрал комсомол организациялул секретарьну бивтун бур. Ва танийва лагма-ялттуми цичIанма кIункIу бан, лагма лаган бан кIулсса, каялувчишиву дан гьунар бусса бивкIун бур. ЛичIи-личIисса мероприятиярттал сиптачину ва сакиншинначину буккайсса бивкIун бур. Ххуйну дуклакисса ва жяматийсса давурттаву чялишну гьуртту хъанахъисса Маликат студентну бунува кьамул бувну бур коммунист партиялувун. Университетгу ванил къуртал бувну бур лавайсса кьиматирттай. ТIайла бувккун бур зун Ккуллал 2-мур школалийн. Шикку ва, учительнал даврицIун, парторганизациялул секретарьнугу бивтун бур. Цила ласнащал, математикалул учитель Кьубилав Оьмаровичлущал, Ккуллал школалий зий 10 шин дурну дур Маликатлул. Щалагу шяраваллил жяматрачIа, учительтурачIа ва дуклаки оьрчIачIа хъинну лавайсса хIурмат бур вайннал хIакьинусса кьинигу.
Школалия Маликат Шяъвановна бувцуну бур райкомрайн орготделданул инструкторну. Аьдатсса куццуй, шиккумур даврил бигардугу жаваблувну, лажин кIялану бартбигьайсса бивкIун бур. Райондалийсса 14-гу шяравун собранияртту дан занай, ва ххуйну кIулну бивкIун бур райондалул жяматран, хъунмасса бивкIун бур ваничIансса хIурмат.
1991-ку шинал, парторганизацияртту ларкьувкун, ва бивтун бур райондалул Искусствардал школалул Вихьливсса филиалданул хъунмурну, архIала школалий дарсругу дуллуну. ЦIанасса «Вихьлинка» тIисса ансамбльданул та чIумалва гьану бивзун бивкIссар. Цила ниттил яннагу дуруххан дурну, концертрал программарду хIадур дуллай, хъуннасса даву шиккугу дурну дур Маликатлул. 1998-ку шинал, хъунама оьрчI университетрал юридический факультетрайн дуклан увххукун, Маликат Шяъвановнагу кулпатращал шагьрулийн бивзун бур. Ца шинаварив вайми мукьвагу оьрчIащал ласнал Чехиянавун бувцуну бур. Му ппурттуву ванил лас, бизнесрахун агьну, тийх зий ивкIун ур. Гъурбатрайгу дакIнил ларсъсса учительнал даву ляркъуну, «Дом Филиппа» тIисса частный школалий зун бивкIун бур. Цилами оьрчIру посольствалул школалий дуклай бухьувкун, тиккугу ларсун дур дарсру. Вай школардайгу цила даража ккаккан бан бювхъуну бур.
Цинмагу, оьрчIангу ххуйну лавхьхьуну бур чехнал мазгу. Ххюра шин дурну дур Маликат Шяъвановнал чил билаятрай зий, аммарив цилагу, оьрчIалгу дакIру мудан кIункIу тIий диркIун дур ватандалийн. Жула маз, культура, багьу-бизу, аьдатру оьттувух ларгсса Маликатлун цила оьрчIру миннуя тархъанну аьдат хъанай ччай бивкIун бакъар. Мунияту, 2003-кусса шинал Маликат кулпатращал зана хьуну бур Дагъусттаннайн. Мура шинал зун байбивхьуну бур МахIачкъалаллал 37-мур гимназиялий, цил директорнугу зузисса архIал дуклай бивкIсса дус Индира Нураттиновна. Тания шинмай, хIакьинусса кьинигу Маликат Шяъвановна зий бур гимназиялул учительну. Ва бур цила пишалух эшкьи хьусса, Заннала учительну ляхъан бувсса инсан. Ванил мяйжаннугу хъунмасса захIмат бивхьуну бур школалул даража гьаз бан.
Цила дарсирдал куртIсса кIулшивуртту дулаврицIун, ва чялишну гьуртту хъанай бур школалул жяматийсса давурттаву. ЧIярусса шиннардий зий бивкIун бур школалул методический объединениялул хъунмурну, бачин бувну бивкIун бур школалий «Фольклорданул театр». Ванил сипталий ва сакиншиннарай шикку дурну дур чIярусса ххаллилсса мероприятияртту. Гьаз хьуну бур оьрус мазрал ва литературалул кIулшивурттал даража. Маликат Шяъвановнал дарсру дихьлахьисса оьрчIал хьхьичIунсса кIанттурду бугьлай бур республикалул, Аьрасатнал даражалийсса личIи-личIисса конкурсирттай, фестивальлай, мукунма оьрус мазрал ва литературалул олимпиадарттай. ЕГЭ-дай 100 балл лавсъсса оьрчIру чансса бакъар ванил выпускниктураву. Масалдаран, махъсса ванил выпускрал оьрчIараву оьрус мазрал ЕГЭ-лий «мукьва» лавсъсса увагу шама оьрчI ия, гайминнал цинявннал «ххюварду» бия. Ва ккаккиялун дишин бучIисса хIасилли.
Маликат Шяъвановная ххуйсса кумаг хъанай бур школалийн практикалий бувкIсса студентътурангу. Ялун зунтIисса жагьилсса учительтуран ванил лахьхьин дуллай бур дарс дишаврил методика, тарбиялул даврил кьюлтIшивуртту. Мунихлу ДГУ-лул филологиялул факультетрая ванин цимилагу Барчаллагьрал чагъарду бувкIун бур.
Маликат Шяъвановнал захIматрангу лайкьсса кьимат бивщуну бур. Ккуллал школалий зузисса чIумалла ванин дуллуну дур РСФСР-данул ХIурматрал грамота. Мунияр махъ пишалул ххуллий бивхьусса захIматрахлу ва ххуйсса ккаккиярттахлу Маликат Шяъвановна лайкь хьуну бур цикссагу ХIурматрал грамотарттан ва Барчаллагьрал чагъардан. Ва бур лавайсса даражалул пишакар, «Аьрасатнал аьмсса кIулшивуртту дулаврил хIурматлувсса зузала», «ЗахIматрал ветеран».
Нанисса шинал июльданул 7-нний хьусса республикалул хьхьичIунсса зузалтрал батIаврий Дагъусттаннал бакIчи Сергей Меликовлул дуллунни Маликат Шяъвановнан «Заслуженный учитель РД» тIисса хIурматрал цIа.
Учительнал кьимат, дуклаки оьрчIах бурувгун бакъасса, цалами оьрчIайнугу бищай. Му чулухагу Маликат Шяъвановнан ххаллилсса нину, тарбиячи хIисаврай яла бюхттулмур кьимат бищун бучIир.
Кьубилавл ва Маликатлул ххювагу оьрчIая нитти-буттан лайкьсса, миннал цIа гьаз дансса наслу хьуну бур
ХIурмат бусса Маликат Шяъвановна, ина ми вила оьрчIал ххари буллай битаннав уттиния тихунмайгу. Миннаягу лайкьсса наслу бизаннав.
Лажин хIадур дурссар Андриана Аьбдуллаевал
