Уттигъанну оьрмулул 90 шин хьунни ххаллилсса лаккучу, цIа дурксса аьлимчу-селекционер, шяраваллил хозяйствалул элмурдал доктор, ТтурчIиял шяравасса Хизрил арс Беков Рустамлун.
Ва ур щала цала оьрму шяраваллил хозяйствалун хас бувсса инсан.
Увну ур Рустам ТтурчIиял шяраву, Хизрил ва ХIабибатлул кулпатраву. Дагъусттаннал шяраваллил хозяйствалул институт къуртал бувну махъ (1958 шин) зий ивкIун ур «Путь Ленина» колхозрал хъунама агрономну, Къизлардал райондалийсса Чапаевлул цIанийсса колхозрал председательнал хъиривчуну. 1962-1965-ку шиннардий дуклай ивкIун ур Ахънилссаннул хозяйствалул элмийсса хъиривлаявурттал институтрал аспирантуралуву. Къуртал бувну махъ, миккува ацIан увну ур зун. Бивтун бур, аспирантная айивхьуну, шяраваллил хозяйствалул элмурдал докторнайн, лабораториялул хъунаманайн бияннинсса ххуллу.
Цала пишалуцIун бавхIуну, ва ивну ур личIи-личIисса билаятирттайн: Болгариянавун, Италиянавун, Испаниянавун, Китайнавун, Вьетнамнавун. Ца шинай элмийсса стажировкалий ивкIун ур Миланнал ва Флоренциянал университетирттаву (1971-1972ш.ш.)
1988-1990-ку шиннардий Рустам зий ивкIун ур Вьетнамнаву, Ханой шагьрулийсса Вьетнамнал ва Совет Союзрал цачIусса Шяраваллил хозяйствалул культурардал интродукциялул, генетикалул, селекциялул ва семеноводствалул центрданий хъунама элмийсса зузалану. Ванал ахтаршиннарду хъунмурчIин дур техникалийну бакIлахъия лакьин бюхъайсса ахънилссаннул селекциялул методика ххал дигьлагьисса. Ва ур томатирттал 35 сортрал ва 11 гибридрал автор. Аьлимчунал чирчуну дур 70-нния лирчусса элмийсса давуртту, миннувух бур 2014-ку шинал итабавкьусса монографиягу. Ванал каялувшиндаралу чирчуну дур 7 диссертация. ХIакьинусса кьинигу элмийсса пикри бусансса, мюнпатсса маслихIат бансса даражалий ур.
ЗахIматрал ххуллий Рустамлул лайкь дурну дур личIи-личIисса наградартту. Миннувух дур «Дружба», «За верность Дагестану» ва ВДНХ-лул медальлу. Аьрасатнал элму хьхьичIуннай дан, ххуйсса пишакартал хIадур бан чIярусса шиннардий бивхьусса захIматрахлу ларгсса шинал Аьрасатнал элмурдал академиялул Овощеводствалул элмийсса центрданул аьлимтурал советрай ванан дуллуну дур «300 лет Российской академии наук» тIисса медаль. Ва лайкь хьуну ур «Заслуженный работник сельского хозяйства Российской Федерации» тIисса бусрасса цIанин.
Рустам Беков бусравну ур Аьрасатнал шяраваллил хозяйствалуха зузисса аьлимтурал ва селекционертурал дянив. ЦинявннацIун базлай, жугу дакIнийхтуну барча тIий буру ххаллилсса аьлимчунахь оьрмулул юбилей. ЦIуллушиву дулуннав, бюхълай личIаннав.
