Сентябрьданул 24-нний Каспийскаллал военкоматрай Чувшиврул орден дуллунни СВО-лий шагьидну жан дуллусса Марат Сулаймановлул кулпатрахьхьун, Мадинахьхьун, ва арснахьхьун, Шяпинахьхьун.
Мероприятиялий гьуртту хьунни шагьрулул мэрнал хъиривчу ХIусайн Ункилов, военком Марат Пашаев ва «Боевое братство» идаралул Каспийскаллалмур отделениялул каялувчи МахIаммадаьли Якьубов. ХIусайн Ункиловлул барчаллагь баян бунни иширачIа чувшиву ккаккан дурсса Марат тарбия увсса нитти-буттайн.
– Марат Ватандалийн дакI тIайлану лавгссар дунияллия. Билаятрал суверенитет дуручлай, щилчIав биялдарахьхьун билаят къагьан битансса мурадрал ххуллий, – увкунни МахIаммадаьли Якьубовлул.
Маратлул къуртал бувну бур Каспийскаллал 2-мур школа, яла – Шяраваллил хозяйствалул университет. Аьралий бурж бартбивгьуну бур МЧС-рал аьралуннаву. Зий ивкIун ур МахIачкъалаллал ххассал-бувултрал ва бакъа хьуминнах луглагиминнал базалий. КутIану ванийн РПСБ учай (ФКУ «Южный Авиационный Поисково-Спасательный центр»).
Ванал ичIувацириннал бувсмунийн бувну, ссавних эшкьи хьусса ва инсантал ххассал буллалаву оьрмулул мяънану чIалачIисса адамина ивкIун ур.
Цала оьрмулун нигьачIаву дунура инсантал ххассал буллалисса пиша язи бугьаву – му анжагъ даву яла дугьаву къахъанахъиссар, инсаннал дакIнил тIалавшиннар, призванияр. Ххассалбувул даву Маратлун бивсса бутIа, цува рязисса кьисмат хьуну бур. Ва ца яла кьянкьама, учIима, хьхьичIунма ххассалбуву ивкIун ур. Спортрал итххявхсса, кьянкьа-кьурчIисса, кIулшивуртту дусса, опыт бусса. Вай хасиятирттацIун инсантал ххассал буллан ччувччуну нанисса.
–Ттун ласнал къабигьасса даву душиву бувчIлан бикIайва, мудангу вас-ццахлий ялугьлан бикIайссияв ва шавай учIаннин. Ванал мудан учайва, инсантурал оьрмурду ябаврияр хьхьичIунсса ва бусравсса ци дикIан бюхъайссар, на ва давринна лявхъусса куну. Лас, арс, уссу, ппу хIисаврай ва хъинну аякьа дусса ия. Мачча-гъанналгу ххуйсса бакъа къаучинтIиссар. Цуксса мажал бакъасса даву дунугу, Маратлул лякъайва оьрчIащал игьалагансса чIун. Ххирая парашютный спорт, душнищалгума тIанкI увкуссар. Ххирая аьрххилий занан, цIу-цIусса кIанттурду ххал буллан. Ххирая зунттавух уклангу, – тIий бур Мадина.
Маратлул ппу Кьурбан Цалчинмур ЦIувкIратуссар, нину ПатIимат – Хъусращасса. Марат, 2024 шинал майрай контракт цIакь дурну, СВО-лийн лавгун ур. Донецкалий къизгъинсса талатавриву аьралий гьалмахтал ххассал буллай жан дуллуну дур. Оьрмулуву ххассалбувул пишалий зузисса ва аьрайгу дунияллия лавгун ур аслийсса ххассалбувуну. Цайми ххассал буван цалламур жан ххира къадурну. Ванал кьура шинавусса арсгу, ацIния ряхра ва ряхра шиннардивусса душругу бур. Вайннахьхьун, Мадинахьхьун, ниттихьхьун, ПатIиматлухьхьун, мачча-гъанцириннахьхьун ссавур Аллагьнал дулуннав.
Дунияллия гьарчагу, вирттал агьалинал дакIурдива къалагайссар.
Лажин хIадур дурссар
ПатIимат Рамазановал
