Сентябрьданул 26-нний Дагъусттаннал бакIчи Сергей Меликовлул дунни республикалул Мюхчаншиврул cоветрал заседание. Ваний гьуртту хьунни муниципал сакиншиннардал бакIчитал.

Ххал бивгьунни хасъсса аьралий операциялул тагьардануву информациялул мюхчаншиврул масъала. Сергей Меликовлул тIимунийну, ттизаманнул дунияллий, информациялул технологияртту гьартану ишла дуллалисса чIумал, муниясса нигьачIаврия мюхчан шаврил хъуннасса агьамшиву дуссар. Хъуними нигьачIавуртту дархIуну дур къадусъсса билаятирттал санкциярдацIун.
– КьатIаллил оборудование дуккан дайминнал ва программарттал щаллу байминнал дацIан дурну дур цалла сурсатру сервердал аьркиншин бартдигьаврил (обслуживаниялул) давуртту. МуницIун дархIуну нигьачIаву диллай дур информациялул технологиярттал циняв бутIран, – увкунни Меликовлул.
Региондалул бакIчинал личIину гьаз бунни чил билаятирттал спецслужбардал инсантурайн деструктивсса информациялул асарду биян буллалаврил масъала. Ванал тIимунийну, миннал, щялусса информация ппив буллай, властьрайн вихшала кьукьинсса хIарачат буллай бусса бур.

Сергей Меликовлул ихтиярду дуруччайми ва надзорданул органнайн тапшур бунни чялишну талан республикалий деструктивсса материаллу ппив дуллалаврищал.
– Цалчин ярглий жува аьркинссар буруччин аьралуннал хасъсса ва региондалий социал-политикийсса тагьар цалий дацIаврил хIакъиравусса информация, – увкунни ванал.
Региондалул бакIчинал тапшур бунни ми масъалартту дузал буван ччясса мутталий, ттинин хьусса опытгу аьркин бувну.
ЦIанасса ппурттуву дуллалисса давурттал ва ми ялунгу ххуй-хъин даврил хIакъираву махъру лавхъунни ДР-лул цифралул лябуккулул министр Юрий ХIамзатовлул, Дагъусттаннал виваллил иширттал министр Аьбдурашид МахIаммадовлул, республикалул Роскомнадзорданул каялувчи Сергей Шохиннул ва ДР-лул Информациялул ва печатьрал агентствалул каялувчи Арсен Юсуповлул.

ХI.Аьдилов