Сентябрьданул 18-нний ДГУ-луву хьунни Щалагу Аьрасатнал элмийну-практикийсса «Между философией и политикой» тIисса конференция. Ва хас дурну дия Дагъусттаннал цалчинма президент, философиялул элмурдал доктор, профессор МухIу Аьлиевлул 85 шинал юбилейран.
ДР-лул БакIчинал ва ХIукуматрал, РАН-далул Философиялул институтрал кабакьулийну сакин дурсса конференциялийн бувкIунни 100-ннаха ливчусса гьурттучитал – Аьрасатнал хьхьичIунсса аьлимтал, паччахIлугърал ва жяматийсса ишккаккулт, философтал ва ахттарчитал. Вайннал мурад бия философиялул, политикалул ва социал элмурдал агьамсса масъалартту ххал бигьаву.
Конференциялул гьурттучитурахь аьла-ссалам бунни ДР-лул Халкьуннал Мажлисрал председатель Заур Аскандаровлул. Ванал тIимунийну, МухIу Аьлиевлун политика укуннасса управлениялул технология къадиркIссарча, га диркIссар куртIсса философиялул ва жаваблувшиврул гьанулийсса къуллугъ баву. Ванал мукунна дурккунни республикалул каялувчи Сергей Меликовлуясса аьла-ссаламрал адрес.
– Цува чув зурчагу – элмулуха ва дуккавриха, республикалул бакIчину, Аьрасатнал Федерациялул Советраву, ягу Европанал советрал КIанттул ва регионнал властирдал конгрессраву – МухIу Гьимбатовичлул цала циняв кIулшивурттугу, опытгу, элмулул потенциалгу ишла буллай ия аьзизсса улклухасса къуллугъран, мунийну ванал дия хъуннасса сийгу, дагъусттанлувтурал дянив лавайсса хIурматгу, – тIий бур адресрай.
«Между философией и политикой» тIисса лу хас бувну бур ттизаманнул дунияллул, тарихрал, теориялул модельлал, модернизациялул опытрал, терроризмалущалсса, диндалул ва политикалул экстремизмалущалсса талатаврил агьамсса масъаларттан. ЛичIинурасса къулагъас дурну дур региондалул лябуккулун. Авторнал тIимунийну, вай темарду личIлай дур Дагъусттаннан ляличIину агьаммину», – кIицI бувну бур Сергей Меликовлул.
Конференциялий «Обгонять, не догоняя!» тIисса доклад бунни МухIу Аьлиевлулгу. Ванал тIимунийну, вай мукъурттил мяъна хъанахъиссар аьлимчу Игорь Курчатовлул хьхьичIун ларсъсса принцип: ХХ-мур ттуршукулул дязаннив билаятрай лябуккулуву цакунусса хьхьичIуннайшиву хьун даву мурадрай, атомрал бутIул гьану бивзминнал хьхьичI билаятрал каялувчитурал бивхьуну бивкIссар хъинну захIматсса масъала – ччясса мутталий дузал буван лавайсса даражалул технологиялул атомрал бутIа (отрасль).
«Та чIумал мукунсса ялунбихьу бувну бивкIссар дунияллий чIурусса политикалул тагьарданул тIалавшин хIисаврайн ларсун, ихтилат бивкIссар Совет Союзрал кьадарданул хIакъираву», – увкунни МухIу Аьлиевлул. Конференциялий махъру лавхъунни республикалул цаймигу хьхьичIунсса философтурал ва профессортурал.
Форумрай хьунни МухIу Аьлиевлул монографиярттал выставкагу.
ХIасан Аьдилов
