Каспийск шагьрулул кIицI ларгунни цилла кьини – 78 шин шаву. Ва шагьрулул хIакьинусса кьини дучIан дуллай бивкIминнавух, ванил тарихраву цIа лирчIминнавух уссар ва шинал май зуруй аьпалул хьусса, ГьунчIукьатIрал шяравасса Мурадов Ярагъи Загьидинал арсгу.
Увну ур Ярагъи февральданул 24-нний 1936-ку шинал ГьунчIукьатIрал шяраву Загьидинал ва Аьишатлул хъунмасса кулпатраву. Загьиди ГьунчIукьатIрал «ЯтIул ттугъ» колхозраву бухгалтерну зий ивкIун ур. Буттал кIанттул цIанийсса Хъунмасса дяъви байбишайхту, лавгун ур душманнащал талан. Къанясивну лявкъуну бур ванан цала оьрчIал ва кулпатрал ялун махъунай учIан. Махъ аьпалул хьуну дур Ярагъинал нину Аьишатгу. Ярагъигу ниттил ниттичIа, СалихIатлучIа, хъуна хьуну ур. Оьрмулул 14 шинаву Ярагъинал, ФЗО-лул школа (махъ – ПТУ №1, цIанарив – Энергетический колледж) бувккуну, слесарьнал пиша кIунттил бувгьуну бур, зун ивкIун ур Каспийскалий «Дагдизель» заводрай. Гихунмай ванал лавхьхьуну бур токарьнал, фрезеровщикнал, литейщикнал пишардугу. Цалва бусса оьрмугу гьан бувну бур ва заводрай, аьзизсса коллективрайн хаин къавхьуна. Пенсиялийн увккун махъгума 3-мур цехраву литейщикну зий ивкIун ур. КаялувшиндарачIа ва архIал зузиминнал дянив цалла даву багьайкун дуллалисса, лагма-ялттуминнащал хIал бавкьусса, аьркинний кумагран учIан хIадурсса Ярагъинал хIурмат, бусрав лавайну бивкIун бур.
Каспийскалий Ярагъи чIявуссаннан кIулну ивкIун ур. Ва шагьрулийгу, цала буттал шяравугу Ярагъи ххирану ивкIун ур тIиртIусса дакIнихлу, тIайлашиву ххирашиврухлу, ччимур ишираву кумагран учIан хIадурну ушиврухлу.
Цалва оьрмулул ххуллулссану ванал язи бувгьуну бур цала шяравасса Гъази Штанчаевлул душ Роза. Вагу «Дагдизель» заводрай зий бивкIун бур экономистну. Вайннал дянив хьуну бур ххаллилсса душ Гулизар ва душнил душ Камила.
Ярагъи аьпалул хьун хьхьичI ванал ва Розал архIал ялапар хъанай хьусса 60 шинал тарихгу кIицI лавгссар. ЦIанакул Роза МахIачкъалалив душничIа, ГулизардучIа, бур.
Ярагъинал усттарну бищайсса бивкIссар аккордеон ва мандолина, балай учаврилгу гьунар бивкIссар.
Ванал шагьрулийгу, шяравугу цува кIулну ивкIминнал дакIурдиву цаява кьабивтун бур чаннасса аьпа. Ярагъи кунмасса цала гъанчув, шяраваллил инсантал дакIнийну, вайннал дурсса захIматрал виричувшивурттая пахрулийсса жагьилтуравасса ца бур ва хъун дакъасса макьала чичаврил сиптачи хьусса ХIажиева Камила Загьидинал душ.
Ярагъи кунмасса, захIматрая, кIусса ва кару дугъансса даврия нигьакъабусайсса инсантуралли жулва шагьрурдал ва шяраваллал тарихгу чивчусса, чIяву миллатирттал инсантурая сакин хьусса Дагъусттаннал цIа-кьини дуллайгу, дуручлайгу бивкIсса.
Лажин хIадур дурссар
Бадрижамал Аьлиевал
