Сочилий Зимний театрданул къатраву хьунни ттизаманнул журналистикалул 29-мур «Вся Россия-2025» тIисса форум.
Гьарца шинах шайсса ва форумрайн бавтIунни щалагу Аьрасатнавасса Медиасообществарттал зузалт, журналистътал, кказит-журналлал редактортал, биснесрал ва властьрал вакилтал, Индиянал, Китайнал, Къиргъизнал, Абхазиянал делегацияртту.
Форумрай ххювагу гьантта хьунни заседаниярттал, «ккуркки столлал», дискуссиярттал, мастер-классирттал, творчествалул хьунабакьавурттал вибувцIусса. Форумрал программалуву дия 60-нниха лирчусса давуртту: проектирдал презентацияртту, выставкартту, кинорду ва мукунна цаймигу.
Фестивальданийн бавтIцириннал хьхьичI махъру лавхъунни 50-ннийн бивсса экспертътурал ва лидертурал, миннавух – политиктурал, жяматийсса ишккаккултрал ва медиаменеджертурал. Ва хьунни Аьрасатнал гьарцагу региондалия бувкIсса 1000-нниха ливчусса журналистътурал цала гьунар ккаккан бансса ва даврил пагьму кIибачIинсса кIану.
Форумрал агьаммур бутIану хьунни Аьрасатнал Журналистътурал союзрал баян бувсса конкурсру. Жюрилул хьхьичIунну ккарксса давурттавух дия Краснодарский крайрал «Комсомольская правда» радиолул хъунама редактор Дмитрий Михеевлул хIадур дурсса «Персона недели» тIисса программа. Ва хас дурну дия хирург Владимир Порхановлун. Мура куццуй жюрилул лавайсса кьимат бивщунни Кубаннал Журналистътурал союзрал хIадур дурсса «Море, живи!» тIисса суратирттал выставкалун. Ва дия 2024 шинал Анапалий экьилавгсса мазутрацIа хьхьири марцI баврицIунсса даву.
Махъ лахълай, Аьрасатнал Журналистътурал союзрал председатель Владимир Соловьевлул кIицI бунни ва, так ца форумрал хIасиллу дуллалаврицIунсса дакъассагу, медиасообществарттал даврил даража лавай шаврицIунсса ятIапнугу хъанахъишиву. Ванийну журналистътурал дянивсса дахIаву, медиалул даврил ялун бучIантIимур ва мунил дазурду гьарта хъанахъишиву. Бувсунни «30-мур юбилейный форум — 2025» дувантIишиву шиккура Сочилий 2026 шинал, хIадур дуллай бушиву муниннинсса личIи-личIисса проектру.
Фестивальданул ахирданий ккаккан дунни «Культурная столица России – 2027» видеозаявка. Сочи шагьрулул бакIчинал хъиривчу Александр Митниковлул дакIнин бувтунни курорт ляличIисса каши душиврун ккаллину бушиву культурныйсса мероприятияртту, Олимпиадартту, Дунияллул халкьуннал дянивсса искусствалул ва музыкалул фестивальлу дуллан бюхълахъаву хIисавравун лавсун. ЧIурчIав дунни умудрай бушиву 2027 шиналсса форум агьамсса ишну хьунтIишиврий ва Сочи лавайсса хIурматрал статусран лайкь хьунтIишиврий.
Форумрая ххувшавурттащал зана хьунни Дагъусттаннал журналистъталгу. Ттизаманнул форумрал давриву дуллалисса чялишсса гьурттушиннарахлу ва региондалийсса медиапроектирттал хьхьичIунсса презентациялухлу Дагъусттаннал Журналисътурал союзрал хъунама МахIаммад Ибрагьимовлун диплом буллунни Владимир Соловьевлул. КIицI къадурну къабучIихьунссар «Дагестанская правда» кказитрал корреспондент Хасайбат Мажидовалмур ххувшавугу. Ванил хьхьичIунсса кIану бувгьунни творчествалулмур конкурсрай: «Та лухIи кьини… Лакрал театрдануву бивхьусса премьералул тамашачитал зана бунни 1944 шинал халкьуннал бакIрачIан дуркIсса бала-мусиватсса кьинирдайн» – «Лучшая авторская публикация/программа» номинациялий жюрилул ва хьхьичIунмунин ккалли дунни.
Чялишсса гьурттушинна дунни форумрай Дагъусттаннал делегациялул. Форумрай гьарца региондалул цалла-цалла экспозицияртту ккаккан дунни.
Дагъусттанналмур стенд тIитIлатIисса шадлугърай гьуртту хьунни Владимир Соловьёв. Шикку хьхьичIун ларсун дия Ватан дуруччултрал шинацIун ва МахIачкъалаллан 168 шин шаврицIун дархIусса давуртту. Дагъусттаннал Информациялул ва печатьрал агентствалул хъунама Арсен Юсуповлул бувсунни СВО-лул тема аьч дуллалисса проектирдая, ватандалул мурадру буручлачисса дагъусттанлувтурая ва вайннан хасъсса лу итабакьин дакIний бушиврия. МахIаммад Ибрагьимовлул балжину бувсунни цIанасса заманалун агьамсса «Доблесть гор» тIисса проектрая. Ккаккан дунни шиккура гьунар бусса жагьилсса режиссер Ислам Сатыровлул «Авдарыс» тIисса киносуратгу. ХIасил, Медиафорумрай хIурматрай кьамул бунни Дагъусттаннал делегация.
ДакIнин бутанну, ттизаманнул журналистикалул форум «Вся Россия-2025» хьушиву Сочилий сентябрьданул 16-нния 21-ннийнин ва тикку гьуртту хьушиву Аьрасатнавасса 1000-ннийн бивсса журналистътал.
Аминат АхIмадова
