Сентябрьданул 21-нний Дагъусттаннал ХIукуматрал председатель Аьбдулмуслим Аьбдулмуслимов гьуртту хьунни Дагъусттаннал халкьуннал Спартакиада тIитIаврий.
МахIачкъалаллал «Труд» стадиондалий салкьи хьуну бия цала-цала командарттацIун кабакьин республикалул личIи-личIисса шагьрурдаясса ва районнаясса спорт ххирами, цIа дурксса спортсментал, властьрал вакилтал, СВО-лул гьурттучитал.
Ттизаманнул тарихраву Спартакиада цалчинни дуллалисса 16 журалул спортраву: лачIун буккаву, бокс, дзюдо, волейбол, мини-футбол, тхэквондо, шахматру, самбо, куклумур атлетика, архъан кIункIу даву, столданийсса теннис, баскетбол, ка дишаву, гиралул спорт, чIатIаракI ритаву, миллатирттал журалул спорт (чару личаву, лахъишиврий тIанкI даву).
Бяст-ччаллу байбишин хьхьичI Спартакиада тIитIаврил лагрулий парадрай лавгунни республикалул цIа дурксса спортсментал. Миннавух бия МахIаммадхан Арацилов, НурмахIаммад Шагьнавазов, Сайпуллагь Абсаидов, ХIайдарбаг ХIайдарбагов, Шарип Шарипов, МахIаммад-ХIасан Абушев, МахIач Муртазялиев, МахIаммад Ибрагьимов, Бахтияр АхIмадов, Марид Муталимов, Жавид ХIамзатов, Султан Ибрагьимов, Ширвани Мурадов, Зайнуттин Атаев, Мадина Казакова, Руслан Аскаров, Зенфира МахIаммадаьлиева, Сажид Сажидов ва чIявусса цаймигу.
Яла хьунни Спартакиадалий гьуртту хъанахъисса командарттал шадлугърал парад. Ваний гьуртту хьунни Дагъусттаннал муниципалитетирттаясса циняр цачIундур командартту.
Муния махъ бяст-ччаллай гьуртту хъанахъими ва хъамал ДР-лул БакIчинал цIанияту барча бунни Дагъусттаннал премьер-министр Аьбдулмуслим Аьбдулмуслимовлул.
– Жула улклул тарбия дурссар цимирагу ник хьхьичIунсса спортсментурал ва тренертурал. Республикалий дузал дурну дур яла лаваймур даражалул бяст-ччаллу буллансса цинярда шартIру. Дагъусттанлувтуран дакIнийхтуну ххирар спорт, ва хьуну бур жула халкьуннал культуралул ца бутIану», – увкунни премьернал.
Республикалул премьер-министрнал барчаллагь увкунни Спартакиада хIадур дурсса тренертурахь, сакиншинначитурахь, волонтертурахь.
Спартакиадалул гьурттучитуран чIа тIий ура дакI марцIну ччалли буккаву ва яргсса ххувшавуртту!» – увкунни ванал.
Спартакиада тIитIаврий махъру лавхъунни МахIачкъалаллал бакIчинал буржру бартбигьлагьима Жамбулат Салавовлул, Аьрасатнал Виричу, «Время героев» программалул гьурттучи Энвер Набиевлул, Олимпиадалул чемпион МахIаммад-ХIасан Абушевлул.
Яла паччахIлугърал гимнрахун хасъсса дяъвилул операциялул гьурттучитурал гьаз бунни Аьрасатнал Федерациялул ва Дагъусттан Республикалул ттугъру.
Мероприятие лахъи ларгунни музыкалул ва театрданул концертрайну.
ХIасан Аьдилов
