ЧIявусса оьрчIру бусса кулпатравасса Артур Хункеров чIивину унува захIматрал кьадру буну тарбия хьуну ур. Хъуна хъанахъиссаксса, инсантуран хайр-мюнпат бусса давуртту дуллан чялиш увксса, дакI-аьмал аьчухсса жагьил ивкIун ур. Зий ивкIун ур личIи-личIисса давурттай, цал-цал кIива-шанма кIанай цал архIалгума зун икIайсса ивкIун ур.
2025 шинал апрельданул 27-нний Артурдун, хушрай аьралий операциялий гьуртту хьунсса контрактгу чирчуну, Ватандалул мурадру буручлан гьансса пикри хьуну бур. Тихун ачинсса хIукму бувшиву кьюлтI буллай ивкIун ур ниттия.
Гьай-гьай, бувчIлай бур хIакьину аьралийтурал ниттихъан хъуннасса хъар лахъан багьлай бушиву. Артурдул нинугу, хасъсса аьралий операциялийсса цинявппагу оьрчIру цIуллуну-сагъну зана хьуннав тIий, дуаьрду дуллай, Заннайн лабизлайнасса инсан бур.
ИчIува Артурдух ялугьлай бур кулпат ва кIива оьрчI. Ва ур ниттиха чIалачIин дакъасса арс, кулпатраха ва оьрчIаха аякьалийсса ппу ва лас. Дустурангу Артур вихшаласса ва дакI тIайласса гьалмахчу ур.
ЦIана Артур ур Запорожскаллал чулухунай дуки-хIачIия ва аьркинсса кьай-кьуй ххилай. Ванал бусаврийн бувну, хьхьичI ххуттай талатиминнан командованиялул чулухасса бигардугу кьамул бувну, ххишала бакъа ми явкIмулну бартбигьлан аьркинну бур. Бувсунни нигьачIаву дусса кIанттурдайсса аьралийтурачIан дуки-хIачIия диян дангу бигьану бакъашиву. Барчаллагь къучагъсса арс, хIакьсса патриот тарбия увсса нитти-буттан.
Цинявппагу аьралийтуран чIа тIий буру, лайкьну цала буржгу лавхъун, цIуллуну, сагъну цала кулпатирттачIан зана шаву.