Дагъусттан Республикалул Халкьуннал Мажлисрал председатель Заур Аскандаров гьуртту хьунни вай гьантрай Волгоград шагьрулий «Сталинградская битва» тIисса музей-панорамалул майданнив хьусса ЮРПА-рал (Южно-Российская Парламентская Ассоциация) 43-мур коференциялий.
Волгоградрайнсса аьрххилул лагрулий Заур Аскандаров Аьрасатнал субъектирдаясса цалва уртакьтуращал ивунни Мамаев кургандалийсса «Героям Сталинградской битвы» мемориал комплексрайн. Шиккусса Аьралий Славалул залдануву тIутIивгу дирхьуну, вайннал минутIрайсса пахъ багьаврийну аьпа кунни Сталинград буручлай бивкIминнал. Мукунма ххал бунни «Родина-мать-зовет!» монумент. Конференциялул давривух гьуртту хъанахъиминнал тIутIив дирхьунни Совет Союзрал маршал Василий Чуйковлул гьаттацIгу. Дагъусттаннаясса делегациялул мукунна тIутIив дирхьунни Мамаев кургандалийсса «Вечная память Героям – солдатам Дагестана, павшим в боях за Сталинград в Великой Отечественной войне» лишандалуцI.
Шиккува кIицI лаган, Мамаев кургандалул цIанийсса талатавуртту най диркIссар 135 гьантлий. «Героям Сталинградской битвы» мемориалданул лахъишиву дур 820 метра, «Родина-мать-зовет!» монументрал лахъшиву дур 85 метра. Мемориал комплексрал аьрщарай увччуну ур 34 505 аьраличу.
ЮРПА-рал председатель, Волгоградуллал областьрал Думалул председатель Александр Блошкиннул цалва ихтилатраву кIицI лавгсса куццуй, Бюхттулсса Ххувшаврин 80 шин хъанахъисса чIумал, Аьрасатнал Президентнал Ватан дуруччайманалну баян бувсса шинал конференция бувансса кIануну душманнаща лахIан буван къавхьусса шагьру язи бугьаву лишандалунсса ишну хъанахъиссар.
Гихунай Заур Аскандаров гьуртту хьунни ЮРПА-рал Советрал заседаниялийгу, конференциялул пленар заседаниялийгу.
Шикку ххал бигьлагьисса личIи-личIисса масъаларттавух бия ва организациялун 25 шин шаврийн бувну ванил лишан дуккан даврицIун, «Заслуженный парламентарий Юга России» бусравсса цIа дуккан даврицIун бавхIусса.
– Ххал бивгьуссар гихунмай закондалул статус ласун бюхъайсса 82 масъала. Шикку агьаммургу хъанахъиссар жува агьалинан аьркинмур хIисаврайн ласлай бушиву, – увкунни Заур Аскандаровлул.
ЮРПА-рал ирглийсса конференция хьунтIиссар 2026-ку шинал интту Севастополь шагьрулий.
