Дагъусттаннал Халкьуннал цашиврул кьинилун хас дурсса мероприятияртту хьунни Лакрал райондалул школардай, детсадирттай ва магьирлугърал идарарттай. Цал мураднугу бия дуклаки оьрчIаву ватандалухсса ччаву, Дагъусттаннал тарихрахсса, магьирлугърахсса ва аьдатирттахсса хIурмат тарбия бансса.

Гъумучиял школалий 1-10-мий классирттаву лакку мазрал учитель Роза Бавасулаймановал хIадур дурну дия «Дагъусттаннал гуж – халкьуннал цашиврувур» тIисса дарс. Цила докладраву ванил бувсунни байрандалул тарихрая.

Дагъусттаннал Халкьуннал цашиврул байран кIицI ларгунни Гъумучиял детсадрайгу. Му дайдирхьунни Аьрасатнал ва Дагъусттаннал гимнру руцаврия.
Миллатирттал лаххиялуву мюрщултрал ккаккан дунни Дагъусттаннал миллатирттал къавтIавуртту, дурккунни халкьуннал дянивсса дусшивриясса назмурду, увкунни балайрду, цавугу аьч бунни лакку билаятрал авадансса тарих, аслийсса магьирлугъ, аьдат-эбадатру ва Лакрал район даимгу диркIшиву чIаххувсса миллатирттащал дусшиврий ялапар хъанай.

Дянивмур группалуву дирхьунни Дагъусттаннал миллатирттал дукиялун хас дурсса дарс. ОьрчIал ниттихъал хIадур дурну дия миллатирттал хьхьичIарасса дукраду.
Детсадрал хъунмунил хъиривмур Ума Аьлишаевал кIицI лавгунни Аьрасатнал цIакьшиврул ва кьуватрал гьануну гьарзаманнай диркIшиву миллатирттал цашиву.

Зулайхат Тахакьаева