КIанттул цилакаялувшиндарал органнавунсса депутатътал бувчIавриву чялишсса гьурттушинна дунни Лакрал райондалул агьалинал.

«Ххарину ура райондалул оьрму ххуй баврил ххуллий зун сипталийсса жагьилтал бувчIавурттавух чялишну бушиву чIалай. Жула оьрчIал райондалул ялун бучIантIимур язи бугьаврил ххуллий гьарцаннал бикIан аьркинссар цала чIу», – увкунни райондалул бакIчи Юсуп МахIаммадовлул, агьалинайн чIурду булун оьвтIий.
Буттал шяраву Гъумук чIу булун увкIун ия ДР-лул шяраваллил хозяйствалул министр Зураб Куччаев.

– ЧIурду булун аьркинссар агьалинал буруккинтту бувчIайсса, жула шяраваллал оьрму хьхьичIунмай баврил ххуллий зун хIадурсса жаваблувсса ва хIарачат бусса инсантурахлу. Мунийну жущава бюхъантIиссар жула щархъал ва райондалул ялун бучIантIимуниву гьурттушинна дуван», – увкунни министрнал. Ванал кIицI лавгунни чIу хасну Гъумук булаврил агьамшиву – му буттал аьрщаращалсса, агьалинащалсса дахIаву хъанай душиву.
Гъумук чIурду булун бувкIун бия хасъсса аьралий операциялул гьурттучитал – «Память гор» тIисса жяматийсса организациялул Лакрал райондалийсса отделениялул хъунама Юнус Эфендиев ва аьралий мурад биттур буллай, щаву дирну увкIун, хъин хъанахъисса Альберт Шяъванов.
ЧIурду булун бучIаврийну вай ккаккан дуллай бур цалла жаваблувшинна. Лакрал райондалул собраниялувун увчIин тIий ур 39 депутат: муниципалитетравун духлахисса ацIния мяйра шяраваллил администрациялия кIи-кIия, Гъумучату – шама.

Зулайхат Тахакьаева