Щалагу республикалий кунна, кIанттул цила каялувшиврул органнавунсса бувчIавуртту Ккуллал райондалийсса 14-рагу участокрай ларгунни цукунчIавсса низамрава бувксса кIанттурду къавхьуну. Участокрайн бучIансса мажал бакъаминнаща бюхълай бия Госуслугарттайхчин, ЦИК-рал сайтрайхчин чIурду булун.
БувчIавурттая жу цIухху-бусу бувссия Ккуллал райондалул ТИК-рал председатель МахIаммад АхIмадовлухь. Ванал бувсунни, гьашину чIявусса инсанталгу гьуртту хьуну, лавайсса даражалий ларгшиву бувчIавуртту.
– Инсантал хъинну жаваблувну букIлай бия бувчIавурттайн, райондалул агьалинал чялишсса гьурттушинна дунни, цала граждан позиция кьянкьану ккаккан бунни. БувчIавуртту шанма гьантлий най душивриягу агьалинан ва бувчIавурттал участокирттай зузалтран хъуннасса къулайшиву дия.
Ва ххуллухьсса бувчIавурттай чялишсса гьурттушинна дунни райондалул идарарттал зузалтрал. Вай шанмагу гьантлийн хъар хъанай бия халкьуннал багьу-бизулул бучIантIимур, – увкунни МахIаммад АхIмадовлул.
Ванал бусаврийн бувну, Ккуллал райондалий яла чялишну чIурду буллусса бувчIавурттал участокран ккаллину дур 1-мур ЦIувкIуллал шяравумур.
МахIаммад АхIмадовлул мукунма бувсунни гьашинусса бувчIавурттай чялишну гьуртту хьушиву хасъсса аьралий операциялул гьурттучитал ва миннал кулпатру, ниттихъул, ссурвал.
Имара Саидова
