Сентябрьданул 12-нний 85 хьунтIиссия машгьурсса художник, Дагъусттаннал магьирлугърал лайкь хьусса ишккакку Эдуард Путербротлун. Ва республикалул сайки циняв театрдащал зий ивкIссар, вайннувух Лакралмур театрданущалгу.
Увссар МахIачкъалалив Дагъусттаннал филармониялул директор Моисейл ва ТАСС-рал Дагъусттаннайсса корреспондент Александрал кулпатраву. ОьрчIнийва занай ивкIссар Пионертурал къатраву суратру дишин лахьхьин буллалисса студиялийн. Амма математикалухсса ччаву ххув хьуну, увхссар дуклан ДГУ-лул физика-математикалул факультетрайн. Ва къуртал бувайхтурив, Жамаллул цIанийсса худучилищалуву дарс дихьлан ивкIссар.
Художник хIисаврайсса ванал гьунар аьч хьуссар живописьраву, скульптуралуву, сценографиялуву, графикалуву. Ванал дукъавайсса давурагу къадиркIун дур: плакатру, графика, афишарду, эскизру. ОьрчIансса «ЧIавалачин» журналданул иллюстрацияртту. Гьанумур давумур диркIссар миллатирттал театрдавусса пьесардал декорацияртту.
Лакрал театрдануву Казбек Мазаев авторсса «БурцIурдил хъатIи» тIисса спектакльданул декорациярттугу магьирну ваналли дурсса. Шиккува кIицI лаганна, 2021 шинал лакрал чичу, прозаик, драматург Казбек Мазаевлул 70 шинал ва Эдуард Путербротлул 80 шинал юбилейрдан хасну, театрданул хъунама режиссёр, халкьуннал артист Аслан МахIаммадовлул «БурцIурдил хъатIи» цIу буккан бувшиву. Дусшиврийсса арарду дикIайва Казбек Мазаевлул ва Путербротлул. ДакIнийри 1993 шинал ва ичIува кьадарсса инсантурал оьрмулуцIа увсса иш бювххун, Казбеклул увкумур: «Эдуард кунмасса инсантал чIарав бавцIуний, мудангу хасият ххуй дуллан ччан бикIайва».
Тай шиннардий Лакрал театрданул директорну зий бивкIсса Качар ХIусайнаевалгу кIицI лагайва, гьунар бусса художник ивкIшивруцIун, эрудиция дусса, хъярч-махсара усттарсса, дакI-аьмал хъинсса инсангу ивкIшиву ва.
Эдуардлун культура, искусство, оьрму, инсантал ва, яла-яларив, Дагъусттан ххирану бивкIшиву кIицI лаглай буслай бур ванал творчествалия ва оьрмулул ххуллия бусласими. Сивсусса ивкIшивугу.
Цалчинмур галереялул директор Жамила Дагирова буслай бур, машгьурсса художник Халилбек Мусаясуллул цIа зумух ласуннагу къадагъасса чIумал, гьамин Эдуард Путербротлулли ванал цIаницIун дархIусса пахъдагьру чантI учин дурсса тIий.
Лакрал театрданувусса «Ревизор» спектакльданунсса ванал эскизирттангу художниктурал дунияллий лавайсса кьимат бишлай бур СМИ-лий.
Ххюра шинал хьхьичI, ванал 80 шинал юбилей кIицI лаглагисса гьантрай, МахIачкъалаллал музейраву ванал дирхьусса суратирттал выставка дуссия. Путерброт зий ивкIсса ряхва театрданул пардавртту дуссия музейраву. Яла махъ музейрал вакилнал учинтIиссия, Эдуард Путербротлул экспозициялул ккуруграй Дагъусттаннал театрду цачIунмай бувантIиссар куну.
1979 шинал ва лайкь хьуну ур ХIамзат ЦIадассал цIанийсса Республикалул премиялун, 1980 шинал лайкь хьуну ур ГДР-нал драматургиялул конкурсрал дипломран.
Ванал дирхьусса суратру Москавлив Бахрушиннул цIанийсса музейравугу, Дагъусттаннал музейрдавугу дур.
Ци давриха зурчагу, луттирдал иллюстрациярдаха, педагогикалул дарсирдаха, литературалул ва журналистикалул дунияллиймур давриха, телевидениялийсса лекциярдаха ( ва искусствалун хас дурсса передачартту дачин дурну икIайссия), Эдуард Путербротлул цува гьарца чулуха итххявхсса, гьунарду гьарзасса ушиву ккаккан бувссар. КIицI лаган аьркинни, ва цалчинма художник-авангардист хъанай ушивугу республикалий.
ПатIимат Рамазанова
