Сентябрьданул 15-нний Сочилий дайдирхьунни «Вся Россия-2025» тIисса уттизаманнул журналистикалул 29-мур форумрал даву. Ва Аьрасатнал Журналистътурал союзрал сипталийну бувсса форумрай гьуртту хъанай бур Дагъусттаннал делегациягу.

Форумрай гьарца регионнал экспозициярттугу дур. Дагъусттанналмур стенд тIитIлатIисса шадлугърай гьуртту хьунни Аьрасатнал Журналистътурал союзрал хъунама Владимир Соловьёв. Стендрал гьануми темарду дия Ватан дуруччултрал шинацIун ва МахIачкъалаллан 168 шин шаврицIун дархIусса. Дагъусттаннал Информациялул ва печатьрал агентствалул хъунама Арсен Юсуповлул бувсунни республикалул СМИ-лул СВО-лул тема аьч дуллалисса проектирдая, ватандалул мурадру цIусса регионнай буручлачисса вирттаврая-дагъусттанлувтурая бусласисса луттираха зий бушиву.
Дагъусттаннал Журналистътурал союзрал хъунама МахIаммад Ибрагьимовлул бувсунни Республикалул бакIчи Сергей Меликовлул сипталийну бартдигьлагьисса «Доблесть гор» тIисса проектрая.
Форумрал цалчинсса кьини жагьилсса режиссер Ислам Сатыровлул «Авдарыс» тIисса документал журалул киносуратгу ккаккан дунни. Ва Нугъайнал халкьуннал хъамабитала хьусса спортрал журалия, дучрайсса талатавриясса дур.
Дагъусттаннал экспозициялухгу, делегациялухгу медиафорумрай хъуннасса къулагъас дур. Подмосковьелул Журналистътурал союзрал хъунмур Наталья Чернышовалгу лахъсса кьимат бивщунни республикалул стендрангу, проектирдангу.

ПатIимат Рамазанова