Хъусращиял шяраву Тахакьа АхIмадовлул цIанийсса школалий хьунни Чувшиврул ордендалул кавалер, АьФ-лул аьралуннал гужирдал чIавама сержант Алик Гъазиев дакIнин утлатисса батIаву.
Ватан ххирашивугу, ватандалул цIаний чувшиврий жанну дуллуминнал чулухунмайсса хIурматгу чантI учин баву хъанай бухьун­ссар цIанасса оьрчIру тарбия баврил агьаммур масъалану.

Украиннавусса хасъсса аьралий операциялий паччахIлугърал мурадру биттур буллай, Аликлул чувшиврий жан дуллуссар. Ванан хас дурсса Чувшиврул дарс дирхьунни шяраваллил школалий.
Ва батIаву хIадур дурну дия 11-мур классрал дуклаки оьрчIал, аьраличу увсса кьинигу хIисавравун ларсун.
Ваний гьуртту хьунни школалул директор ЩайхахIмад АхIмадов, учительтал, дуклаки оьрчIру, гъан-маччами ва жямат. Бусравсса хъамаллуравух бия Аликлул ссурахъу, СВО байбивхьусса гьантрая тIайла хьуну хIакьинунин тикку аьралий бурж биттур буллали­сса, Аьрасатнал аьралий гужирдал хъунама сержант, цIана отпускрай шавай увкIсса Тахакьа Тахакьаев, «Илчи» кказитрал отделданул хъунмур, ниттирссу Зулайхат Тахакьаева.
– Аьпалул хьуминнаяту ихтилат буллан хъинну захIматссар, аргъирай лавгсса жагьилтурая тIурча – хъиннува. Жула бурж гьарцагу виричунал дур­сса къучагъшиву дакIний дитавур. Гьарцагу аьраличу ялун нанисса никиран яргсса эбратри. Жува, вай дакIнин бичаву бакъассагу, вай батIавурттайну жула саллатIнал дакIурдивун гьавас бутлатиссару.Тайннан жулла чIарав бацIаву чара бакъа аьркинссар, тайннан асар хъанан аьркинссар жува мудангу чIарав бушиву, – увкунни школалул директорнал хъиривмур Нурижат АхIмадовал.
Шиккура ккаккан дунни Аликлун ва СВО-лий шагьид хьусса цаймигу Вирттавран цIа куну Зулайхат Тахакьаевал хIадур дурсса видеороликругу. Дуклаки оьрчIал балжину бувсунни аьраличунал оьрмулия ва аьралий ххуллия, дурккунни назмурду, ххал бунни школалул жанахIраву дирхьусса СВО-лий кьурван хьуминнал суратирттащалсса стенд. Хъирив аьралитал дакIнин бивчунни ца минутIрайсса пахъ багьаврийну.
Зулайхат Тахакьаевал цилагу, гъанчуналгу чулуха барчаллагь увкунни бавтIцириннахь ва сиптачитурахь.
– Цуксса хIайпнугу, цумур-цагу билаятрал тарихрал яла яргми чIапIив чичай Ватандалул язими арсваврал оь­ттуй. ДакIний дитияра, оьрчIрув, вай нур лархъсса ва чумартсса симанну, хъамамабитари вайннал ссахлу харж бувссарив жагьилсса оьрмурду – хъун хъанахъисса никирал чаннасса ялун бутIантIимунил ххуллий. Пахрулий зумух ласласира вайннал цIарду, дуруччара зула Ватан, – увкунни Зулайхатлул аьралийтурал суратирттал чIарахгу бавцIуну.
Шиккува Зулайхатлул, дипломру ва арцуйнусса бахширу дуллунни СВО-лул гьурттучитуран хас дурсса Алик Гъазиевлул аьпалунсса назмурдал конкурсрал номинантътуран.
Ахирданий ЩайхахIмад АхIмадовлул чIурчIав дунни Алик Гъазиевлул Ватандалул цIаний цайва бивхьусса бурж лайкьну биттур бувшиврий ва дуклаки оьрчIан мудангу дакIний икIантIишиврий.
ДакIнин бутанну, чIавама сержант Гъазиев Алик Багьауттиннул арс, 58-мур аьрмиялул аьралийчу, Владиккавкказуллал пехоталул минометрал хъунама наводчик, Чувшиврул ордендалул кавалер, Запорожскаллал фронтрай аьралий бурж биттур буллай июньдалул 11-нний 2022 шинал шагьид хьушиву.
Увссар Алик сентябрьданул 7-нний 1992 шинал Хъусращиял шяраву. Ванан дуссия 29 шин.

Аминат АхIмадова