Дагъусттаннал Халкьуннал цашиврул кьинилул хьунийн Дусшиврул къатлуву ДР-лул ХIукуматрал хъунама Аьбдулмуслим Аьбдулмуслимовлул хьхьичIунсса дагъусттанлувтуран дуллунни хIукуматрал наградартту.
Наградартту ларсминнавух бия А. Къапиевлул цIанийсса Лакрал паччахIлугърал музыкалул ва драмалул театрданул артистътал Адам ХIайдаев ва Зульфия Архилаева. Вайннан дуллунни Да­гъусттаннал ХIукуматрал ХIурматрал грамотартту.

Зульфия Архилаева ва Адам ХIайдаев тамашачитуран кIул­ссар ярг-яргсса рольлайну бакъасса, пагьму-гьунар ххисса балайчитал хIисаврайгу.
Зульфия Архилаева тамашачитуран кIулссар Богдан Петкаиннул бивхьусса У. Шекспирдул «Гамлет» спектакльдануву (Офелия), Аьрасатнал лайкь хьусса артист Аслан МахIаммадовлул бивхьусса «Ккурккуллал Щаза» (Щаза) спектакльдануву дургьусса агьамми рольлайну. Офелиял рольданухлу актриса лайкь хьуссар Къабардин-Балкьарнал Республикалул ХIурматрал грамоталун. «Ккурккуллал Щаза» спектакль ххув хьуссар «Воспевшие Дагестан» тIисса республикалул Театрдал конкурс-фестивальданий.
Вай дакъасса, актрисал творчествалуву яргсса рольлуну ялагу хьуссар Апанни Къапиевлул аьралий чичрурдаясса «Невыплаканные слезы» (Наталья Капиева), У. Шекспирдул «Тарс мютIи баву» (Катарина), ЦI. Камаловлул «Хан-Муртазааьли», Абасил МахIаммадлул «Камалул Башир», Ф.Г. Лоркал ­«Оьсса кьадар» спектакльлаву дургьусса агьамсса рольлу.

КIицI къабувну къахьун­ссар Архилаева артистнал гьунардануцIун, балайчишиврийгу лапва усттарсса бушиву. ЩихачIав къалавхьхьусса чIунил ва такьвалул заллу бушиву.
ДакIнин бутан багьлай бухьунссар 2019 шинал Грозный шагьрулий хьусса Дунияллул халкьуннал дянивсса «Золотые Россыпи талантов» тIисса VIII-мур фестивальданий ванил ларсун диркIшиву кIира Гран-при:
Рамазан Фаталиевлул макьандалийсса халкьуннал балайлухлу ва Уитни Хьюстоннул репертуарданувасса ингилис мазрайсса балайлухлу «Эстрадный вокал на иностранном языке» номинациялуву, «Ккурккуллал Щаза» спектакльданувасса балайлухлу лайкь хьуссар «Серебряный голос» титулданун, аьралий-патриотический балайлул номинациялувугу бувгьуссар цалчинмур кIану.

Му бакъассагу, Зульфия гьуртту хьуссар дунияллул халкьуннал лагрулийсса чIявусса цаймигу конкурсирттай.
Адам ХIайдаев тамашачитуран кIулссар С. Кьасумовлул «Ччаву ва макь» (Бархъаллал Маллай), ЦI. Камаловлул «Хан-Муртазали» (Хан-Муртазааьли); С. Кьасумовлул «Оьтту ва макь» (Патааьли), Ф. Г. Лоркал «Оьсса кьадар» (Леонардо), «Ф. Вебердул «Нядуку» (Жан), А. Островский «Сунчи» (Паратовлул) спектакльлаву дургьусса агьамми рольлайну.
ДакIнийхтуну барчагу буллай, чIа тIий буру жула жагьилсса артистътуран цIуллушиву ва тIайлабацIу.

Зулайхат Тахакьаева