Сентябрьданул 10-нний «Дагестан» РИА-лий хьунни МахIачкъалаллал бакIчинал хъиривчу ХIажимурад Муртузялиевлул пресс-конференция.
Муний ххал бивгьунни жяматийсса транспортрал система цIу дуккан даврил, ххуллурду бакьин баврил, ремонтрал давуртту даврил планнал ва цаймигу масъалартту. Ванал мукунма бувсунни агьамми масъалартту дузал баврил чIуннаятугу.

ХI.Муртазялиевлул тIимунийну, ми циняв давуртту бакIуйн дуккан даврил мурад хъанай бур жяматийсса транспортрал пассажиртурал аьркиншин бартдигьаву лавайсса даражалийн дуцаву. Шагьрулул властирдал цIу дуккан дуллай бур жяматийсса транспорт, личIи бувантIий бур миннунсса ххуллурду, зузи дантIий бур ххуллухсса багьа карточкардайну булаврил система (безналичная оплата проезда). Шинал ахирданийнин хIадур дувантIий бур транспортрал инфраструктура лядуккан даврил цачIусса план.
«ХIакьинусса кьини шагьрурул бакIчинал жул хьхьичI масъала бивхьунни цалчин ярглий жяматийсса транспортрал даража лавай буван. Мунияту жу цIу дуккан дуллай буру пассажиртурал транспорт. Яла жу личIи буллай буру пассажиртурал транспортрансса ххуллу, му тарихраву ттинин къабивкIсса затри. Яла жу зузи дуллан най буру ххуллухсса багьа карточкардайну булайсса система», – увкунни ХIажимурад Муртузялиевлул.

Ванал тIимунийну, транспортрал захIматсса масъалартту системалийну дузал баву мурадрай заказ дурну дур транспортрал инфраструктура лядуккан даврил цачIусса план, мивун духлай дур транспорт ва инфраструктура лядуккан даврил комплексрал программа ва ххуллийх заназаврил сакиншиндарал схема. Ми документру хIадур хьунтIий бур шинал ахирданийнин ва ми хьунтIий бур дахханашивуртту даврил гьануну. Маршрутрал сетьрал оптимизация даврил лагрулий пландалий бур шагьрулул дязаннив чан-чанну тIий маршрутрал таксирдан («Газеллан») кIанай занази буллан хъунмур ва дянивмур классирдал автобусру. ЧIивимур классрал автобусру зунтIий бур шагьрулул зума-къирагъирттайсса маршрутирттай.