«Дагъусттаннал аьдатру»

Сентябрьданул 15-нний, Дагъусттаннал халкьуннал цашиврул кьини, жулла республикалий хьунни личIи-личIисса шадлугъру.
Дагъусттан Республикалул Культуралул министерствалул ва Халкьуннал творчествалул къатлул сакин дурну, МахIачкъалалив, Яруссаннал театрданул хьхьичIсса майданнив, хьунни аслийсса культуралул «Дагъусттаннал аьдатру» тIисса Республикалул форум. СахIналийн миллатирттал лаххиярттаву бувккунни республикалул 25 райондалиясса коллективру. Вайннал ккаккан дунни цимирагу аьсрулул лахъишиврий цIакь хьусса культуралул аьдатру.

«Ттул Дагъусттан»

МахIачкъалалив Р. ХIам­затовлул цIанийсса Национал библиотекалий тIиртIунни «Ттул Дагъусттан» цIанилусса фотовыставка.
Ва сакин дурну дия Республикалул Культуралул министерствалул ва Халкьуннал творчествалул къатлул. Выставкалий ккаккиялун дирхьуну дия чIяву миллатру бусса Дагъусттаннал багьу-бизулул, культуралул аваданшиву ккаккан дуллалисса, Халкьуннал творчествалул къатлул архивравасса 200 сурат.
Выставка тIитIлатIисса ихтилат бунни Дагъусттан Республикалул культуралул министрнал хъиривмур, Халкьуннал творчествалул къатлул директор Марита МухIадовал:
– Ва хъанахъиссар ляли­чIиссара проект. Ванил Дагъусттаннал халкьуннал цашиврул байран чIюлугу дуллалиссар, ва байран куртIсса мяъналул дуччингу дуллалиссар, цанчирча культуралуву, творчествалуву дуну тIий халкьуннал дакI-къюкI, гуж ва цашиву. Жун кIулли гьарцагу накьичрал, гьарцагу балайлул ва къавтIаврил махъ душиву цимигу аьсрулий салкьи хъанай диркIсса жула буттал буттахъал аькьилшиву. Жул агьаммур мурадгу вай циняв аьдатру дуруччавур.
Ва выставка даврил агьаммур мурадгу, жула авадансса культуралул ирс ккаккан баврицIун, махъа нанисса жагьилтураву ва лахьлансса, ябуллансса гъирагу гьаз бавур, ваниясса пахру бутавур, – увкуна ванил.

Жагьилсса гвардиялул чулуха

Дагъусттаннал Халкьуннал цашиврул кьинилул иширттавух гьуртту хьунни щалагу Аьрасатнал «Молодая гвардия Единой России» партиялул Дагъусттаннал региондалул отделениялул активистъталгу.
Вай Фазу Аьлиевал скверданийсса инсантурайх дачIлай бия Дагъусттаннал ттугълил лиссурду, буслай бия ванил тарихрая. Мюрщи оьрчIай дуллай бия жулла республикалул ттугълийсса рангру дусса аквагримгу.
Мукунма ва кьини скверданий хьуминнаща бюхълай бия Дагъусттан Республикалул карта дусса пазллу батIавривух гьуртту хьунгу.
Ва журалул шадлугъру чIявусса жагьилталгу гьурттуну гьар шинах шайссар.

Лажин хIадур дурссар
Бадрижамал Аьлиевал