МахIачкъалалив хьунни Дагъусттаннал Халкьуннал цашиврул кьинилун хас дурсса хъуннасса шадлугъ.
Дагъусттаннал паччахIлугърал филармониялул Гъинттулмур площадкалул сахIналия ва Кьини барча тIисса махъ лавхъунни Дагъусттан Республикалул ХIукуматрал председатель Аьбдулмуслим Аьбдулмуслимовлул.
– Ва байран анжагъ календарьданийсса ятIулсса дата дакъар, ва жулва гужирал, жула ттаттахъал чивчусса тарихрал ва ялун нанисса никирттайнсса жулва аманатрал лишанни. Ва жулва гуж жулла цашивруву ва уссушивруву бушиврий жува пахрулий мукIру хъанахъисса кьинир…
Ттуршунния ливчусса миллатру бавкьуну ялапар хъанахъисса Дагъусттан хъанахъиссар уссушиврул, чIаххув-чIарахнащалсса хъиншиврийсса арардайсса ялапаршиндарал эбратну. Жулва буттахъал ва ттаттахъал диян дунни жучIанна уссушиврийсса миллатирттал кулпатравусса дакьаврил агьамшиврул аькьилшиву. Жунма кIулссар, талатавриву бакъагу, хъин-хъинсса мурадру щаллу бавривугу цачIу бикIан. ХIакьинусса жулва аьмсса мурадгу аьзизсса аьрщарал луртанну чIяру давур ва ванил ляличIишиву дуруччавур, – увкунни Аь. Аьбдулмуслимовлул.
Гихуннай жулла республикалул культуралул зузалтрал ккаккан дунни концертрал хъуннасса программа. Ванил лагрулий сахIналия баллай бия республикалул личIи-личIисса миллатирттал мазурдийсса балайрду. КъавтIаврилми коллективиртталгу ккаккан бунни ярг-яргсса номерду.
Ва кьини сахIналий ккаккан дунни Музыкалул ва театрданул постановкагу. Ваниву чIурчIав дурну дия Надиршагьлул аьрал ххявхния шиннай хIакьинунинсса, хасъсса аьралий операциялийннинсса, чIумуй жулла республикалул тарихраву хьусса агьамсса иширттай. Постановка сакин хьуну дия 4 бутIуя: 1741-ку шин – Надир-шагьнал аьрал ххявхсса; 1941-ку шин – Буттал кIанттул цIанийсса Хъунмасса дяъви байбивхьусса; 1999-ку шин – ярагъуннил балгусса къачагътурал кьюкьри ххярхсса; 2025-ку шин – хасъсса аьралий операция нанисса.
СахIналий мукунна ккаккан дуллай бия вай иширттацIун дархIусса суратру ва видео.
