Сентябрь зурул 7-нний Москавлив, 16-мур библиотекалун халкьуннал шаэр Расул ХIамзатовлул цIа дирзун шин хъанай духьувкун, ва даталунгу, шаэр увсса кьинилунгу хас дурсса мероприятие хьунни. Ва хIадур дурну дия Дагъусттаннал Постпредствалул сипталийну ва хIарачатрайну.

Шадлугърал дайдихьу дуллалисса махъ лахълай, Постпреднал хъиривчу ХIажимурад Къажлаевлул бувсуна шинал лажиндарай библиотекалий шаэрнал оьрмулул ва творчествалул ххуллу лахьлахьисса тамансса мероприятияртту хьушивугу, Москавуллал агьалинал Расул ХIамзатовлул творчествалух хъуннасса къулагъас душиву аьлтта чIалай бушиву.

Постпредствалул агьалинащалсса дахIаврил отделданул хъунаманал хъиривмур Зоя Хановал бувсуна 11 шинал оьрмулуву назмурду чичлай айивхьусса ХIамзатовлул оьрмулул ххуллия, творчествалия.

«Согласие» тIисса Кулпатрал центрданул тарбиячитурал ва педагогтурал, Расул ХIамзатовлул мукъурттийсса балайрдугу увкуну, цалва гьунарду ккаккан бувна.
МГУ-лул студентка Багинат АхIмадовал бюхханну бувккуна «Ттул Дагъусттан» ва «Ябувара ниттихъул» тIисса шеърирду.
Расул ХIамзатовлул мачча-гъанналгу бувсуна ганал оьрмулуву уттинин къакIулну бивкIсса иширттая.

КIицI лаган аьркинхьунссар библиотекалий бушиву шаэрнан хас бувсса мурцIу, Дагъусттаннал колорит ккаккан дуллалисса, миллатрал лаххия, ичIаллил кьай-кьуй, тIахни-кIичIу, шаэрнал ичIувасса архиврава ларсъсса суратру дусса.

Зоя Хановал кIицI лавгунни библиотекалул хъамаллурал мудангу «ХIамзатовлул ужагърах» къулагъас дикIайшиву, гъан хъанай, суратру ришлан бикIайшиву.
«Ва яруссаннал чIири тIювагу Дагъусттаннал агьалинал культура, багьу-бизу ва Расул ХIамзатовлул творчество машгьур дуллалисса кIанур», – увкунни ванил.

ПатIимат Рамазанова