Дагъусттаннай дайдирхьунни аьдатравун дагьсса щаллагу дунияллул халкьуннал дянивсса «КIяла кьурукьирттал» фестиваль. Гьашину сентябрьданул 8-мур кьини Аьрасатнал президент Владимир Путиннул баян бунни Аьрасатнал Халкьуннал мазурдил кьини хIисаврай кIицI лагавантIишиву. Ва ишгу хIисавравун лавсун, гьашинумур «КIяла кьурукьирттал» байран цIусса байрандалунгу ккаллину дия.
Дагъусттаннал бакIчи Сергей Меликов хIалану кIюрххила байрандалийн бавтIцириннал тIутIив дирхьуна Расул ХIамзатовлул гьаттацI. Меликовлул кIицI лавгуна машгьурсса шаэрнал гьану бивзсса ва байран лахъа-хъун дан Москавлия, Санкт-Петербурглия, Татарсттанная, Чувашиянава, Донбассрая ва цаймигу регионная чIявусса чичулт, творчествалул зузалт бучIайшиву.
Гихуннайсса мероприятие Лениннул Комсомолданул цIанийсса паркраву хьуна.
ХIукуматрал хъунама Аьбдулмуслим Аьбдулмуслимовлул, 39-чинсса фестивальданул дайдихьу дуллалисса махъ лахълай, бувсуна мероприятие поэзиялул хъуннасса байранну ва Аьрасатнал чIяву миллатирттал литература гьаз дуллалисса ишну хъанахъишиву. ЧIурчIав дурна ХIамзатовлул творчество интернационал зумунусса душиврий, так Дагъусттаннал дакъагу, щалагу билаятрал лишанну хъанахъишиврий.
– Ва фестивальданул кьимат чIумулгу, ссалчIавгу лагь хьун къабитантIиссар, интернационал журалулгу дуну тIий. Жува ва кьини Хатыннай ва Хиросималий, Грозныйлий ва Каспийскалий, Нью-Йорклив ва Москавлив, Багъдадрай ва Бесланнай ливтIуми дакIнин бичайну тIий, – увкунни премьернал.
Вара кьини Поэзиялул театрдануву «Бюхттулсса Ххувшаврил Кьурукьру» тIисса цIанилу хьунни Аьрасатнал поэзиялул вечер.
Хъирив кьини хъамал Дагъусттаннал чичултращал бивунни Хъунзахъиял, Гъуниннал районнайн ва Дарбантлив. Шиккугу кIанттул агьулданущал хIала-гьурттусса, унгу-унгусса байранну хьунни.
Расул ХIамзатов увсса кьинилун хасну МахIачкъалаллал Централ библиотекалийгу дунни Ниттил мазурдил цалчинсса фестиваль. Ниттил мазру ябаврил агьамшиврий чIурчIав дуллалисса ихтилатру бунни шагьрулул Культуралул управлениялул хъунама Фарид Абалаевлул, филологиялул элмурдал доктор Разият АхIмадовал.
Дуклаки оьрчIал Дагъусттаннал халкьуннал 14-вагу мазрай бувккунни «Кьурукьру» тIисса шеъри.
ПатIимат Рамазанова
