Муркъилинахъал ХIажи
Ниттил маз
Пагьмурдал назсса чIуну
Ниттил зумату баллай,
Ниттил накIлищал архIал
Оьтту-ттурчIавун бухлай,
Лявхъунни, хIасул хьунни
Ттул дакIниву ниттил маз,
Ляхъайсса кунна кIулши,
Ляхъайсса кунна адав.
Лахьхьин бунни ттун ниттил
Ттиркьюкьал пар бу махъру,
Лаххайсса кунна ххалуйх,
Ца-цаних тIий, кюрщантру.
Лахъан бунни дакIниву
ПасихIшиврул чирахъру,
Лахъайсса кунма хьхьувай
Ссавруннай чаннацIуртти.
Агь, ниттил маз, вил цIанил
МарцIшиву, гъилишиву,
Ужагърай лархъсса цIуну
Вил лишанну яданна.
Инархха ттун дуллусса
Ххира буттал чувшиву,
Зума нахIусса ниттил
Хъиншиву, чумартшиву.
Ина ттулла, ниттил маз,
Ттул кашира, ттул гужра,
Шадний чайсса балайра,
Къуманий чайсса угьра.
Ина ларгсса кьинира,
Буттал буттахъал чIура,
Ттул оьрчIал жавгьардаву
Пар тIисса цIусса чIунна.
Вил балай баллалийни,
Ттун багъру тIутIайх бичай,
Вил хъярчирал хъяхъаврий
Гьарзад хъяй чIалан дикIай.
Агь, ниттил маз, вил цIанил
МарцIшиву, гъилишиву
Ужагърай лархъсса цIуну
Вил лишанну яданна.
Мирза МахIанмадов
* * *
Уссияв на щугълурдай
Ца зунттул щаращучIа,
Сийлий бакъа бурхха тIий
Лакку маз арсваврачIа.
Щаращул щинал жюрлил
Цакуну ццах чин увра –
Лакку мазрай гъалгъа тIий
Щаращул жюржу бия.
МахIаммад-Загьид Аминов
Ниттил маз
Абадссар аьрщарай урттул маз – щурщу,
Абадссар мукунма щинал маз – чяр-чяр.
Ттул ниттил маз тIурча – нахIусса жюржу –
Гьунттийнин бухлавгун, бат хьунтIиссар
тIар.
Кьавкьсса чIапIив кунма мурхьирдаяту,
КьатI учинтIиссар тIар ттул ниттил
махъру,
Агь, на миннулъявхха гьаз увсса щяту,
Мирихха ттул дакIнил мяъна ва хъару!
Бусансса махъ бакъа, на чунна иян?
Махъ-яхха буттахъал къабивтсса дакIнин,
Ци миллатраясса унугу инсан,
Ас бусса ухьурча, ганахь уссай чин.
Бивзрув-бурув кувкун на лакку мазрай,
КъалякъинтIиссарив жаваб дулунма?
На ттула оьрчIахьгу, бахъ-бухъ тIий,
ацIлай,
КIиссурттахрав буслан, къюкIссаннахь
кунма?
Ниттил мазрах мякьсса ва ттул дакIнива
Кьамул бува, аьрщий, миннат-шикаят:
Маз къакIулсса шатрал увкуну ччива,
Ттула маз къакIулсса арсру ляхъаяр!
На аьтIий акъара. Зумувсса мазрайх
ЧIила ритарчагу, ци байссар мукьал?
Та вев учирчагу на ниттил мазрай,
Жаваб дулунтIиссар азгъунсса зунттал!
Юсуп Хаппалаев
Мааьз тIий ур
Зунттал шяраву увсса,
Шагьрулий хъуна хьусса
Зунттал чув жагьил Мааьз
ТIий ур: «Ччивахха лахьхьин,
Ссай лахьхьиви ниттил маз?»
На учав: – Дус, ххирама!
Му захIматсса зат бакъар…
КIуллив, жула буттахъал,
ХIалтIилух лагай чIумал,
Мазру лахьхьайсса бивкIссар
Бахьтта, бурттий, ххуллийх най…
Къюссух луглай, гъурбатрай
Шинну дайсса диркIнугу,
Заргалнал, дувссичинал,
ХарратIнал ва дургалнал
Хъамабитан къабувссар
Ниттил маз хIалтIуханнал…
ЧIаллил дай чIумал къурув,
Щюлли марщурдайн укку,
Лухччинияту ссавнийн
Ссалам лавсун гьаз хьусса
ВерчIичIулул санаърал
Мяъна дурчIайрив ххал да!
ХIухчалтрал яттикъушайн,
Дааьйн, зунттавун насу,
Лаччи, ххункI, ини ва вит
Буки миннащал архIал,
ТIабиаьтрал гьайбатрал
Савда къаарав ххал ба!
ОьрчIру шанаши буллай,
КIанттугу гьуркку буллай
ЛуллурбайтIи ниттихъал
Балайрдах вичIи диша,
Гай мукъурттил дакIнин ццихь
Къабюххайрив ххал бува.
КIинттул дуссух бавтI хьхьурдай
ВичIи диша бавахъал,
Ттаттахъал чай балайрдах,
Аькьилтурал мукъурттих –
Магьрах ва лувлякъурдах…
Му чIумал, ттул дус Мааьз,
ЛахьхьинтIиссар ниттил маз,
Ччан хьунтIиссар зунттал халкь.
Вийвагу бищунтIиссар
Лиххан бан къабюхъайсса
Ччаврил мугьру вай зунттал!
Абачара ХIусайнаев
Лакку маз
ЛяличIину нахIурхха
Зунттал уртту-тIутIал кьанкь:
ДикIайча ца тIааьнну
Лакку мазрава ришлан.
Лакку мазрал чIурдаву
Лакку бургъил чани бур,
КIа бургъил гъилишиву
КIа лакку мазраву дур,
Бурча маз авадансса:
Бусан шай учин ччимур.
КIа аваданшивруву
Щаращул жюржугу бур.
Мазру цинявппа ххуйссар,
Ххуйссар ттул лакку мазгу.
Мазру циняв пасихIссар,
ПасихIссар лакку мазгу.
Лахьхьияра пасихIну
Гъалгъа тIун лакку мазрай:
Душманнащал – кьянкьану,
Дустуращал – адаврай.
Бадави Рамазанов
* * *
Хьхьирил зуманицIух
Нажагь ачирча,
Хьхьирил щатIал чIурдах
ВичIи диширча,
Гива баллан бикIай
Аьзизсса балай,
Аьзиз буттал кIанай
Щаращал чайсса.
Аьбдул Мирзаев
Ниттил маз
Ниттил маз…
Ттун кIулсса маз…
Маз чIивисса миллатрал,
Цимигу бара уссар
Ина ттун ххирашиврул,
Цалчинма бара – нину,
Ина ттун лахьхьин бувсса,
КIилчинма бара – балай,
Ттула дакIнил учайсса.
Дуллан икIара хIисав
Вил лавгсса оьрмулулгу,
ДакIнийн бутлан икIара
Вил бакIрачIан бувкIмургу.
Щуну дур къуннагъ вийнгу,
Вил цIа ххит дуккан дуван,
Бувну бивкIун бур чIира,
Вил оьрму дуснакь буван.
Цайми мазурдин кунма,
Вин чансса къаккавккунни,
Циксса ккаклай бунугу,
Кьюкьала къадуркIунни.
Ина дуснайн дус кунни,
Душманнайн душман кунни,
Инава маз бушиву
Гьарцаннан бувчIин бунни!
Салимат Кьурбанова
Агь, лакку маз, ниттил маз
Агь, лакку маз, ниттил маз,
Вил тIааьншиву цири,
Караматсса рангирдай
Пар-партIи ссурулккурттай.
ЯхI бусса буттахъая
Бивсса мусил ххазинай,
Кьуват бусса арсваврал
Бюхттулну гьаз був къалай.
Вил гьану чарвитулли,
Лекьан бан къашайссари,
Чаннан дарцIан дай цIарай
БавцIуну бувтIуссара.
Му талихI бусса мазрай
На гьарца даву дурссар,
Бюххансса балай куссар,
Шад шеърирду чивчуссар.
Я ттул оьрмулул аят,
Ина чIивиссар щил тIар?
Жулаксса щилли бусса
ЦIарду бюхттулсса вирттал.
Муртазааьлил мазри,
Чаннан кунма кьянкьасса.
ПартIу-ПатIимал махъри,
ЦIараяргу кIирисса.
Жул виртталгу чIявуссар
Дунияллийх цIа ларгсса,
Хъамигурив къачанссар
Оьттуву цIу лахълайсса.
Лакрал улклуй бунутIий
ЦIурттаяр лахъсса миллат,
Лакку мазрал антенна
ЦIурттай гъалгъатIи дурссар.
