Сентябрьданул 8-нний МахIачкъалалив Дусшиврул къатлуву Дагъусттан Республикалул бакIчи Сергей Меликовлул гьурттушиндарай хьунни хасъсса аьралий операциялий ватандалул цIаний чувшиврий жанну дуллуминнан ва вайннал ниттихъан хас дурсса «Сильные духом» тIисса документал фильмрал презентация.
Шиккун бувкIун бия властьрал органнал зузалт, Аьрасатнал ПаччахIлугърал Думалул ва ДР-лул Халкьуннал Мажлисрал депутатътал, жяматийсса ишккаккулт, хасъсса аьралий операциялий гьуртту хъанахъими ва миннал гъан-маччами.
Проектрал сиптачи ва автор бур хасъсса аьралий операциялий паччахIлугърал мурадру буруччаврил ххуллий чувшиврий жан дуллусса Азим Муслимовлул нину Мехрибан, цувгу «Сила матерей» ккурандалул учредительтуравасса ца.
Проект дузрайн дуркссар ДР-лул бакIчи Сергей Меликовлул ва Аьрасатнал ПаччахIлугърал Думалул депутат Султан ХIамзаевлул кабакьаврийну.
Проектрал агьамшивугу кIицI ларгун, республикалул бакIчинал лавайсса кьимат бивщунни пикри дузрайн буккан бувминнал даврин.
«Ва проект хьуссар Ватандалул ххуллий жанну дуллусса вирттаврал хIурмат цукун буруччин аьркинссарив щалагу билаятран ккаккан буллалисса эбратну. Жура ххал дарду фильм, циву дургьусса рольлу дакъасса, гьарца аьралийчунал бувтсса гьантта ккаккан буллалисса. Заннал зул оьрмурду лахъи баннав, жу тIурча мудан зул чIарав буссару», – увкунни Республикалул бакIчинал аьралийтурал гъанчунахь.
– Дяъвилул чуллу чIявуссар, миннувасса ца – аьрая архну къинттуллух буссар, — ххи бунни Сергей Меликовлул.
«Ва вирттаврал ниттихъаясса ва хъанниясса хIакьмурди. Дагъусттаннал халкьуннал шаэр Фазу Аьлиевал мукъурттийну учин: «Ттупанг чув битарчагу, ккулла ниттил къюкIливухри буккайсса. Му къюкIливур жула бучIантIимур бусса. Оьрму, мяйжаннугу, кIибавчIунни: арс дунияллий унийсса ва арснацIа хьуну махъсса. АрснацIа хьуну махъсса вайннал оьрму жува буржлувссару ххуйгу, чаннагу буллан, жуятува лавгминнал аьпалун», – увкунни ванал.
Мехрибан Муслимовал бувсунни ва агьамсса проект хIасул шаврия.
КIицI лавгунни фильмраву бувсун бушиву, вирттаврая бакъасса, вайннал ниттихъаягу, дакIнил кьуват ххисса ва чумартсса хъанния.
«На пахрулий бура хIакьсса вирттал тарбия бан бювхъусса, къирият дусса Дагъусттаннал душваврая.
ДакI дарцIуну бура ва фильмрал урувгманал дакIниву ликъаххайсса аьш кьаритантIишиврий. Гьарца цIа абадлий личIан аьркинссар халкьуннал дакIурдиву, аьпалуву», – ххи бунни ванил.
Мехрибан Муслимовал барчаллагь увкунни Республикалул бакIчинахь ва Султан ХIамзаевлухь аьралий бурж биттур буллай ливтIуминнал гъанчунахсса хIурматрахлу ва къулагъасрахлу.
Султан ХIамзаевлул барчаллагь увкунни Сергей Меликовлухь проект чулийн дуккан дансса кабакьулухлу.
«Художествалул кино ласун бигьассар, гиву бюхълай бур цукунсса-дунугу сипатру ляхъан дан, миннуйн рангру ххи дуван. Ва тIурча дур документал кино, укунсса кино ласун хъинну захIматссар.
Ва сурат цурдагу хьунни дагъусттаннал хъамитайпалул лишанну, – увкунни депутатнал
— Яла кIицI бансса зат – фильмраву дакъар дакIних лархьхьусса калимартту. Шиву бур жула ватанлувтурал ва вайннал ниттихъал оьрмулувасса ишру», – ххи бунни ХIамзаевлул.
Депутат дакI дарцIуну ур документал фильм чIявусса илданун ккаккан дан багьлай бушиврий, цанчирча шиву аьч дурну дунутIий дагъусттанлувтурал хасъсса аьралий операциялухсса бургаву. КIицI лавгунни цува чIарав ацIан дакIний ушиву фильм федерал даражалий ккаккан даншиврул.
Документал фильм хIадур дуллай лавгун бур ряхва барз, му ларсун дур республикалул ацIния кIива шагьрулий ва райондалий. Ларсун дур Ватандалул ххуллий жанну дуллуминная бусласисса ттуршра ссятрайсса видеоматериал – ичIаллил архиврава ва хасъсса аьралий операциялийсса лахIзарду. Вайннува документал фильмраву ккаккан бувну бур ацIа виричунал кьадар ва вайннал ниттихъащалсса интервью.
Киноленталул аьч дуллай дур вирттаврал оьрчIшиврия, хасиятрая бусласисса ниттихъал сипатру. Бусласимуниву ниттихъал хаснура къулагъас дурну дур арсваврал оьрмулул мяънану Ватан язи дугьаврий.
Фильм ххал дурну махъ ва хIадур давриву гьурттушинна дурцириннан Республикалул бакIчинал буллунни Барчаллагьрал чагъарду.
«Пахрулий ура хIакьину зущал ва залдануву ушиврия, цанчирча шиву хъанахъимунин кьимат бищун захIматри, кьиматгу аькьлу-кIулшилул бакъача, дакIнил бишлай буну тIий. Жува шиккун батIаврил сававгу тIайламуних вичIидишавур. Му тIайламургу ниттихъал зумуври бусса, экрандалий ккаккан дурсса ацIра ниттил бакъача, хасъсса аьралий операциялий ватандалул ххуллий жан дуллусса цума-цагу виричунал ниттил, ми Дагъусттаннай цикссагу буссар», – увкунни Республикалул бакIчинал.
Презентациялий гьуртту хьуми кIицI лаглай бия ва документал фильм ххал дан аьркинну бушиву жула оьрчIал, хасъсса аьралий операциялий жанну дуллуминнал виричушивурттая кIулну бикIаншиврул.
Зулайхат Тахакьаева
