Вай гьантрай МахIачкъалалив хьунни Дагъусттаннал региондалийсса «Справедливая Россия – За Правду» партиялул отделениялул ирглийсса пресс-конференция. Ва хас дурну дия миграциялул политикалул масъаларттан.
Пресс-конференциялий гьуртту хьунни «Справедливая Россия – За Правду» партиялул отделениялул Советрал бюрорал председатель, ДР-лул Халкьуннал Мажлисрал председательнал хъиривчу Камил Давдиев ва партиялул Советрал бюрорал председательнал хъиривчу Марат Аьлияров.
Республикалий ва щалагу билаятрай хIасул хьусса миграциялул масъаларттая балжину бувсуна Марат Аьлияровлул.
– ХIакьинусса кьини Дагъусттаннай хъинну тIалавну бур мигрантътурал захIмат. Хаснува тIалавну бур строительствалул ва шяраваллил хозяйствалул давурттаву. Шикку хIисавравун ласун аьркинссар канил пиша бусса, цала даву усттарну дан кIулсса инсантурая зарал бакъашиву. Аммаки чIявуну хьунабакьай цукунчIавсса пиша бакъасса, закондалул ххуттава бувкссагу. Вай ишру хIисавравун ласун аьркинссар мигрантътуран квотарду итадакьлакьийни. ЖучIава зун увкIсса мигрант кулпатгу, оьрчIругу цала Ватандалий кьабивтун учIан аьркинссар, – увкунни Аьлияровлул.
Руслан Шавлухъовлул цала ихтилат байбивхьунни Совет билаятрал тарихрая. ДакIнин бувтунни мигрантътал цIакьсса дахIавуртту диркIсса уссурвалшиврийсса билаятирттаясса граждантал хъанахъишиву. Мунийн бувну, жула халкьуннал ва мигрантътурал дянив социал масъалартту, миллатрал мюхчаншиву тIайлану дуруччин аьркиншиву.
«Справедливая Россия – За Правду» партиялул вакилтурал ва масъала хъин чулий дузрайн буккан баву мурадрай хьхьичIун лавсунни цаппара ххуллу-чаранну: МВД-лул биялдарайн хъар дакъасса Миграциялул политикалул министерство хIасул даву, мигрантътал вахталул методрай тIалавгу бувну, махъунмай тIайла буккаву, гьарица жучIана увкIсса мигрантначIа медициналул страховка хIасул даву, медициналул, кIулшиву дулаврил, транспортрал, фармацевтикалул давуртту так Аьрасатнал инсантурайн дакъа вихшала къадаву. Му бакъассагу, ихтиярданува увксса мигрант ва мунал щалва кулпат депортировать бан аьркиншиву.
Журналистътурал суаллахьхьун жавабру дуллай, Камил Давдиевлул бувсунни инсантурал оьрмулул шартIру къулай даву партиялул хьхьичI бивхьусса агьамсса масъаларттавасса ца хъанахъишиву.
Бувсунни дукиялул багьри ва ЖКХ-лул тарифру гьаз шаврийну агьалинал ахIвал-хIал кIюла хъанахъишиву. Хаснува пенсионертуран ва чIявусса оьрчIру бусса кулпатирттан ялапар хьун захIматну бушиву.
Вай иширттацIун бавхIуну партиялул вакилтурал хъирив лавну ххал диргьуну дур инсантурал багьу-бизу гьаз бансса экономикалул шартIру.
– ЦIанасса ппурттуву анаварсса бущилий гьаз хьуну най бур дукия-хIачIиялул, ЖКХ-лул тарифирттал, къатта-къушлил, интернетрал, мобильный связьрал ва цаймигу кьай-кьуйлул багьри. Укунсса ишру хьхьичIва-хьхьичI асар хъанай бур ахIвал кIюласса кулпатирттан, пенсионертуран, студентътуран. КIицI лавгсса масъалартту хъар хъанай бур экономикалул багьу-бизулийн. Инсантурал доходру инфляциялул бущилул хъирив лаллай дакъар. Агьалинал оьрмулул шартIру ххуй даву мурадрай, СРЗП-лул ХIукуматрал хьхьичIун ларсъссар кIицI ларгсса сиптарду, – увкунни Камил Давдиевлул.
Пенсионертуран, дуклаки оьрчIан, аьралийтуран, ахIвал кIюласса кулпатирттан мюнпат бусса социал тариф личIи даврин, ЖКХ-лунсса субсидияртту булаврин ва цаймигу къулайшиннарду кIицI лагаврин хас бувсса ихтилат бунни Марат Аьлияровлул.
– Жул сипталийн бувну сукку бувну буссар агьалинал налогру харжираха лархьхьуну дулаврил масъала. КъатIайлассар хъуннасса доход дусса инсанналгу, чIивисса харж буманалгу цара ца налог дуллалаву. Лагьсса харжи бусса инсантурал налог дурагу дулун къааьркинссар. Зузисса пенсионертуран 2016 шиная шинмай пенсиярттал индексация даву тIалав буллай ур партиялул вакил Сергей Миронов. Укунсса иширттал хIакъираву тIайламур бацIан бан хIарачат буллай, жу Аьрасатнал президентнайн буккару, – увкунни Камил Давдиевлул.
Имара Саидова
