ХIакьсса шаэр, шаэр-гражданин чIявуну лащан уллан бикIай миллатрал цIуцIи кIиссураха. Му мукъул тIимургу бавхIусса бур миллатрал вив хIасул хъанахъисса ца яла буруккин хъуними ишру, заралну бацIлацIими затру щиннияргу хьхьичI мунанни асар шайсса
тIисса мяъналуцIун, мунал дакIницIунни ми щилан бикIайсса тIисса пикрилуцIун.
Муна мукунсса «цIуцIи кIиссану» тай ххишала дакъа захIмат-жапасса 90-ку шиннардий ттун чIалан бикIайва жула лакрал литературалувун бувкIсса жагьилсса 4 игит, Маяковскийл мукъурттийнугу учин, цала кIунттихьсса кьалан сайки ччалану ишла буллалисса чичулт: Казбек Мазаев, Сулайман Мусаев, ХIасан КIурухов ва Руслан Башаев.
Ми мукьагу цаннаяр ца яргсса «мушкитертурава» циваннив ляличIинува ттул дакIнил лавсун икIайва, хIакьинугу ур, Руслан Башаев — цала чаймунил ва чичаймунил дунияллий сайки энциклопедиялул зумунусса диапазон дусса инсан. Му цахъи ухьурчагу ххишалану даши излазаврил хъунмур сававнугу духьунссар мунал цаявасса пахру-ххара бувагу бакъашиву, мудангу хьхьичIун урувгун къуццу тIисса ушиву ва захIмат ххирасса ушиву, цалва оьрмулул ва мяърипатрал позиция чув-бухьурчагу буручлачисса ушиву.
Ва ттула хъун бакъасса мукъуву на личIисса чIурчIав къадулланна ванал художествалул творчествалул аспектрай, мунил хIакъираву тIий бур, чичлай бур ттуяргу за бувчIусса гьалмахтал. Амма кIицI къабувну кьабитан къахьунссар Русланнул оьрмулулгу, элмулулгу, художествалулгу ца хъуннасса виричушивуну ккалли хъанахъисса лу – «Ттул Буттал улклул чарттай чаннацIуртти» тIисса, щилкIуй бакъачIинсса щедевр. Ва так ца поэзиялул произведение бакъар, ва бур поэзиялул мазрай чивчусса, хъинну куртIну ттиривкIусса этнографиялул мяъдан. Ва ттун ссаха лащай учирча, лащай жулла эра дучIаннин 1-мур векрай яхъанай ивкIсса хьхьичIазаманнул Румуллал философ ва шаэр Карло Лукрецийл «Жунна чIалачIимунил тIабиаьт» тIисса захIматраха. ЛичIи-личIисса затирттал тIабиаьт дурчIин дуллалисса му трактат Лукрецийл чивчуну буссар, бизаршиву ххисса элмулул мазрай бакъача, ккалай щакъалиххайсса поэзиялул мазрай.
ХIисав дара, цуксса захIмат бишин къабагьхьунссар авторнан, цара, кIира куну, 99 шяраваллил гьайбат жулла итталу дацIан даншиврул, гьарцагу шяраваллицIун бавхIусса тарихрал, лахьхьусса ва хIакьинусса кьинилул, багьу-бизулул сурат сакин дуваншиврул. Сакингу дурну, аьнтIикIасса поэзиялул миниатюралувун усттарну дакьиншиврул!
КьюлтI къабанна, вай Русланнул миниатюрарду лакрал альманахрай дахьа дуклан диркIсса чIумуя шиннай на ми, кьугу-кьукьлай, лачIунгу дуллай, ца ганзсса тетрадьрал вив цачIун дуллай уссияв, ххазиналул ххуллий. Утти тIурча мукунсса чара бакъашиву ялату дагьунни: цаппара шиннардил хьхьичI бувккунни дунияллийн урчIцIаллий урчIвагу сонет циву бусса ххаллилсса лу. Ттул библиотекалул тахчалий му луттирал бувгьунугу буссар ца яла хIурмат бумур кIантту.
Нава ттинин увкумур чансса бухьурчагу итталу бацIан бансса мурадрай, ваца кумагран кунма, буцин ччай ура кIива-шанма сонет.
Цалчинмур – лакрал щархъал дянив ца яла хъуннамурну хъанахъисса шяраваллин, ттула буттал шяраваллин, хас бувмур сонет. Ккулув хIакьину яхъанай буссар щалагу лакрал миллатрал мукьва бутIул ца бутIа. Явара, на шикку аьйкьлай акъассара: жула хъунасса Расуллул кусса куццуй, миллат салкьи буллалими халкь шяравур яхъанай бусса, шагьрулий яхъанахъими тIурча – гай «населенияр». Ккуллаха чивчуну бур ттинин ацIвахъул шеърирду личIи-личIисса автортурал. Амма миннувату, так ца Руслан Башаевлулсса бакъа, къакьамул бунни Ккуллал жяматрал цалва гимну. На нава чичав мунихунсса музыкагу. Цанна Русланнунгу дуллуссар «ХIурмат лавайсса ккуличунал» цIа («Почетный кулинец»). Шиккува учин, мукунсса цIа ттинин ларсминнаву Руслан Башаев хъанахъиссар культуралул аралувасса цалчинсса инсанну, гайми тIурча – циняв олигархталли.
Ккул
Лакку Ватандалул кьибла дагьани,
Кьудратрал ва чIумул чирчу кьиблама,
Душманнал турлил ххют
КьукIмайн дагьаннин,
Гьаз шайссагу бивкIссар кьисасрал лама.
Кьиблалий кьянкьану бавцIусса Ккуллал
Кьамул байсса бивкIссар цалчинсса ккулла.
Ккуллардал бакIрахсса душманнал аьрал
Буччин байсса бивкIссар
гьаттал аьрщарал.
Уттигу-шилагу азадсса улчай.
Ур чинсса чув усса чулданул кюруй.
Чувшиврул бувцIусса умматрал кьуруй,
ЛичIаннав вил гьайбат
пар-пар тIий зунчай.
Лакравугу лаксса, агь, Ккуллал жямат,
Къадукканнав тачIав зул дакIру кьянат.
КIилчинмур сонет – ттул щарссанил буттал шяраваллихасса, щарссанил дуния махъ, ттулмурнугу хъанахъисса (ина чассара кувкун, на ттигу щарсса къадуцав тIисса бакъарив лакрал лувлякъу).
Куми
Зунттуха ххал хьунни илагьий гьайбат,
Зивзунни итталух ккурмузул чани.
Ккур куну лавхъунни гьарцагу чарий
Хьхьемавхху алшилул хьхьемавхху мадад.
ВицIхъиял ханлугърай майшан ку махIла,
СунницIух кавусса ца камал-мухIлу,
Кай-кай-накьич хьусса кIи-шан кIичIиртту
Ххуттавух бишингу ссан къабучIир ттун.
ОьрчI-бакIуннал буцIлай вил БакIухалу.
Бух гьич къабукканнав алжаннул кIантту.
Ташурдал лахIланнав някI ссаврунналу
ЧIюйнахIаллийн бивхьу
вил чIюй-тавхантту.
Цал бунугу ина янин ххал хьуми
Вих эшкьи къархьуну къаличIай, Кумий.
Муна мукуна къаливчIунав нагу ванияр 50 шинал хьхьичI эшкьи къархьуну га аьнтIикIасса Кумиял шяраваллихгу, га шяраваллил жяматрал дянив ккаккияну хъунма хьусса ца кумиридушнихгу.
Шамилчинмурну тIурча, кIицI къабувну кьабитан къахьунссар Русланнул цала буттал шяраваллиха чивчумур шеъри-сонет.
Караши
Пашманшиву цира, бурхIай Караший,
Каши ххисса Заннал ттун буллу улчай?
Лагабургъил лавхъсса ссавнил щавщилий
Щалиххан къашайсса цири вил хъюлчай?
Ттул тавба вил суннайн, таваккул гьаннайн,
Суждалий бакъасса ша къаласара.
Шан-парчари хьусса къатрал эяллай
Шан-парчари хъанай дакI кьаритара.
Суннил иттацIантту гьаз дува ссавнийн,
ХьхьичIун мабичара ссувайсса яру.
Ххувзал мяшну уна вил ва ттул ччаврий,
МахIрум хьуну ливчIсса жува ссаяру?
Нажагь аьищурча, Заннайн хъа рашав,
Ттул рухI дучIантIиссар анжагъ Карашав.
Ххал дара цуксса азгъунсса ччаву дурив шаэрнал цала оьтту-ттурчIал минану хъанахъисса улклух, цуксса гужсса мякь бурив буттал аьрщарах ва щамарах, цуксса хъуннасса дурив эяллай дарцIусса шяраваллил хIасул дуллалисса къюву!
Ттун ххангума бикIай, аьмну хIисав дурну, ттинин цалва миллатрал тарихрангу, хIакьинусса кьинилунгу мюнпатну дурцири давурттайну, лакраву миллат зумунусса кIулши чантI учин дан бивхьуцири хIарачатрайну, Руслан Башаевлул цIа ялун дучIантIисса никирттан, шаэрнияргума ялттуну, тарихчи ва этнограф, социолог ва философ хIисаврай личIансса кунна.
ЦIуллуну итаннав ина, Руслан, кабакьиннав вил мурадирттацIун Заннал!
