Майрал 30-нний Дагъусттаннал министртурал кабинетрал ДР-лул ХIукуматрал Председательнал кIанайма Рамазан Аьлиевлул каялувшиврулу дунни ярглий дакъасса совещание. Тикку ххал диргьунни региондалий эпизоотикалун хасну хьусса тагьар ва га цалийн дуцинсса давуртту.

Рамазан Аьлиевлул бувсмунийн бувну, Республикалий эпизоотикалун хасну къаххуйсса тагьар хьуну дур. Мунийн бувну Ветеринариялул комитетрал пишакартурал гьарца кьини ххал буллай бур, циняв хIаятирттавух буклай, къашавайсса ризкьи.
Ветеринариялул комитетрал председатель ВахIмурад Курчаевлул бувсмунийн бувну, 2012 шиная 2015 шинайн биянцIа циняв журардал хозяйстварттаву брюцеллезран хасну ххал бувну бур 5,5 млн. хъуни гъаттарал ва 2,7 млн. яттил хIайвандалул. Профилактикалун­сса иммунизациялун ва реиммунизациялун вакцинардал ххалаххив бувну бур 5,4 млн. хъуни гъаттаран, 32 млн. яттил хIайвандалун.
2016 шинал брюцеллезран хасну ххал бувну бур 253 азарва бакI хъуни гъаттарал (къашавайсса лявкъуну бур 445 бакI) ва 111,2 азарва бакI яттил хIайвандалул (8 бакI къашавайсса лявкъуну бур). Мура чIумал брюцеллезрал къашавайсса гъа­ттара бивкIсса 20 къушлий профилактикалул давуртту дурну ва мира давуртту дурну дур къашавайсса ятту бивкIсса 11 къушлий. Майрал 30-ннин республикалий бивкIссар хъуни гъаттара брюцеллезрал къашавайсса 18 къуш ва брюцеллезрал къашавайсса ятту бивкIсса 7 къуш. Гьашину сияхIрайн лавсун бур жинд­рал шаврил азарданул къашавай хьусса 9 иш. Мура азардануйн къаршисса вакцинардал ххалаххив бувну бур 13,2 азарва хъуни гъаттаран ва 500 бакI яттин.
Заседаниялул хIасиллайн хасну Рамазан Аьлиевлул цаппара тапшур бавуртту дунни Ветеринариялул комитетрайн.
Июльданул 1-ннийнин хIадур дуван аьркинссар Дагъусттаннал территориялий эпизоотикалул тагьар ххуй даву щаллу дансса паччахIлугърал программа хIадур даврил хIакъиравусса предложенияртту.
Шяраваллил хозяйствалул министерствалун тапшур бувну бур Ветеринариялул комитетращал цачIу ризкьи кIинтнил минардая зунттавунмай куч баврил давурттал ялув бацIаву дуван. Мукунсса тапшур бавуртту цаймигу органнайнгу дурну дур.
ХIадур бувссар
ХI. Аьдиловлул