Августрал 30-нний Цуссалакрал райондалул администрациялул къатраву хьунни кIулшивуртту дулаврил ххуллий зузиминнал совещание.
Ва дайдирхьуна Аьрасатнал ва Дагъусттаннал гимнру учаврийну. Хъирив экрандалий ккаккан дунни Аьрасатнал кIулшиву дулаврил министр Сергей Кравцовлул кIулшиву дулаврил зузалтрайнсса оьвчаву. Видеообращениялуву министрнал бувсунни гьашинусса шинал кIулшиву дулавриву хьусса хьхьичIуннайшивурттая ва дахханашивурттая.
Совещаниялий гьуртту хьунни ЦIуссалакрал райондалул бакIчи МаматIи ХIамзатов, ДР-лул Халкьуннал Мажлисрал депутат Артур Исрапилов, ЦIуссалакрал райондалул бакIчинал хъиривчу Арсен Гъазиев, ЦIуссалакрал райондалул КIулшиву дулаврил управлениялул хъунмур Светлана Къудаева, райондалул КIулшиву дулаврил зузалтрал профсоюзрал председатель АьбдулхIамид Нахаев ва райондалул кIулшивуртту дулаврил идарарттал каялувчитал.
Совещание дайдихьлай, МаматIи ХIамзатовлул барчаллагь увкунни ялун нанисса ник тарбия давриву ва кIулшивуртту дулаврил ххуллий хъунмасса захIмат бихьлахьисса педагогтурахь. ЦIусса дуккаврил шин барча дуллай, чIа увкунни цIуллушиву, давриву хъунисса хьхьичIуннайшивуртту.
– Ялун нанисса никиран кIулшиву ва тарбия дулаврия хъар хъанахъиссар жула бучIантIимур. КIулшиву дулаврийну гьашиву къадурну, жагьилсса ник ас-намус буну тарбия дуллан аьркинссар. Машгьурсса химик Дмитрий Менделеевлул увкуну бур: «Тарбия дакъанна дуллусса кIулшиву – му ахIмакьсса инсаннал канихьсса турди», – куну. КIулшиву дулаврил даража гьаз баву бакъассагу, чялиш дуккан дан аьркинссар тарбиялулмур давугу, – увкунни МаматIи ХIамзатовлул.
– Учительная хъуннасса тIалавшинна дуссар дуклаки оьрчIан тарбия дулавриву. Билаятрай хъунисса дахханашивуртту хъанахъисса ппурттувугу учительнал биялалийсса иш бушиву чIалай бур ялун нанисса ник Ватан ххирану тарбия даву. Ва тагьарданувугу чул бищун багьлай бур учительтурайн, – увкунни Артур Исрапиловлул.
Ларгсса дуккаврил шиналсса хIасиллая ва цIусса дуккаврил шинал учительтурал хьхьичI бивхьусса агьамсса масъаларттая бусласисса доклад бунни Светлана Къудаевал.
«Деятельность команды проекта «Навигаторы детства»: итоги и перспективы» тIисса цIанилусса ихтилат бунни ЦIуссалакрал райондалийсса оьрчIал жяматийсса суккушиннарттащалсса тарбиялул даву дачин дурсса ПатIимат Аьбдулмуслимовал.
Хъирив ихтилат бунни ЦIуссалакрал райондалийсса «Движение Первых» тIисса суккушиндарал каялувчи Жамиля Мусиевал. Ванил балжину бувсунни оьрчIру тария баврил ххуллий дурсса даврия.
Совещаниялул ахирданий МаматIи ХIамзатовлул Барчаллагьрал чагъарду ва 50 къуруш дусса сертификатру дуллуна давриву хьхьичIунсса хIасиллу дусса педагогтуран.
Имара Саидова
