Вай гъилисса августрал гьантрай, Дагъусттаннал агьалинангу, кьатIувгу ххуйну кIулсса альпинист, жяматийсса ишккакку, республикалул Транспортрал ва ххуллурдал хозяйствалул министерствалий отделданул хъунаману зузисса Зиябуттин ХIажимирзаев, «Дагестан» ГТРК-лий Лакрал редакциялул хъунмур редакторну зузисса Тамара Закаръяева ва журналистка Оксана Султанова гьаз хьунни ПпабакIу-Зунттул бюхттулнийн.
Зиябуттин зунттайн лахъаврил биялсса опыт бусса, дунияллул цIанихсса бюхттулшивурттайн гьаз хьусса альпинист ур. Тамара ва Оксана кIукун къабигьасса ххуллийн буккан сивсуну бур хиялданул хъирив. Инсаннал бюхъу ккаккан бувансса хъитлий. Тамарагу гиднал даврил биялсса опыт бусса, ца-цасса къумасса ва чарттарисса зунттал ххуллурду бивтсса инсан бур. ДукIу ва гидтурал кьюкьлущал Щуну-Зунттуйнгу гьаз хьуссия. Амма ПпабакIу личIири, лавгнал, кIулнал ххуллу къабигьасса бушиврий чIурчIав дувай.
«Ччянива хиял буссия ПпабакIуйн гьаз хьун, сант дагьлай дакъая. Зиябуттиннул ца батIаврий кIицI лавгуна, цува гьашину гъинттул кIийн гьаз хьун дакIний ушиву. Навагу ттулвагу мува мурад бушиву бувсъссия, Оксанагу жуцIун бавкьуна. Жу МахIачкъалалия кIюрххицIунмай бувкссияв Буршав ччяни биян. Буршату цахъис кIийнмайсса ххуллу битарду машиналий, хъамал кьамул бай къатрачIан ва форельданул хозяйствалучIан бияннин. КIикку машинагу кьабивтун, гьиву балчаннуйн рутарду. ПпабакIул ухнилун бияннин бахьтта ритарду 15 километра, караматсса тIабиаьтрал карах занай.
МаркIачIанмай бивнав жу. ПпабакIул ухнилу чятирдугу бивщуну, бигьалагансса ликказан дуварду. Яла цIан-чаннаву, ссят мукьунний, кофегу хIарчIун, бавчуру гьаз хъанай. Утти ПпабакIуйн гьаз шайсса ххуллу бигьа хьуссар тIий бур, кIийн гьаз хъанахъисса туристътурал шаттирдал ххуллу бувну. Бия ххяллайх гьаз хъанан аьркинсса кIанттугу. Зунттаву хъуна къавхьусса инсаннан захIмат-жапасса ххуллу бия. Сивсусса, савсъсса, зунххисса, чарттарисса ххуллурдайх занай аьдатсса инсантуран дакIнин багьарча, бан къашайсса ци бур. Учарухха, ххуллу наниналли битайсса. ПпабакIуйнсса къабигьасса ххуллугу», – увкунни Тамарал.
Зиябуттин ур душваврал кьянкьашиву ккаккан дунни, яхI бунни, балай учаврил гьунар бусса Тамарал ПпабакIуйсса Лакрал гимнрах вичIидишинсса тIайлабацIумур ччинал хьурдай учинсса лахIза бия, дакIний личIансса тIий. Зиябуттиннул ялагу бувсунни, цува барчаллагьрай ушиву цала шяравучу Малик ХIажиевлуйн, ПпабакIуя махъунмай нани ххуллий ххункI бивчуну, хъамалугу бувну, цIаннавух Буршав бияннин цивппа тIайлагу бувксса. Барчаллагьрай бия вай ПпабакIуйнсса ххуллий хьунабавкьусса лакрал жагьилтурайнгу, ци кумаг аьркинни тIий, хIурмат буван чялиш буклакисса бия тIий.
Ци журалул тема духьурчагу, ххуймуних вичIи дишин тIааьннугу бикIайхха мудан, дакIгу ххари хъанан дикIай. Нагу вай ттулва дустал барча буллай бура зунттурдаву ца яла авурмур ва бюхттулмур зунттул бакIрайн гьаз шаврищал.
Ххирассар тIар зунттурдангу сивсуми, савсми. Бюхттулсса хъачI-бакIайн гьаз хъанахъими. Гьарма гьаз хьун къаитайсса аьдатгу дуссар тIар зунттурдал. ПпабакIул ттул дустал бивтунни гьаз хьун, лайкьгу бувнутIий миннал му бюхттулшиврийн гьаз хьунсса мутта. ЦIуллушиврий битаннав зу, цIу-цIусса бюхттулшивурттал ва хъиншивурттал хъихъи битлай!
ПатIимат Рамазанова
