ЦIусса дуккаврил шин ЧIяйннал школалул дайдирхьунни ххаллилсса мероприятиялийну. КIулшивуртту дулаврил кьини шикку шадлугърал даражалий тIиртIунни ххаллилсса педагог, тарбиячи ва гьунар бусса каялувчи СултанахIмадов Аьбид МахIаммадовичлул цIа абад дуллалисса ула.
Мероприятиялий гьуртту хьунни Ккуллал райондалул бакIчи Шамил Рамазанов, Дагъусттаннал КIулшивуртту дулаврил ва элмулул министерствалул вакил Арсен Рамазанов, райондалул КIулшивуртту дулаврил управлениялул хъунама Жамалуттин Оьмариев, ЧIяйннал шяраваллил бакIчи МахIаммад Билалов, Аьбид МахIаммадовичлул учениктал, оьрчIру, гъан-маччами, дустал, даврил уртакьтал.
Аьбид МахIаммадовичлул оьрмулул ва захIматрал ххуллиясса ихтилат бунни школалул директор Альбина Гаммакуевал. Цинявппагу ва дакIнин утлатими кIицI лаглай бия учительнал захIмат ххирашиву, жаваблувшиву, тIайлашиву, инсаннан кумаг бан, чIарав ацIан анавар уккайсса ивкIшиву, буслай бия ванал хъунмасса захIмат бивхьушиву ЧIяйннал школалул ва щалагу Ккуллал райондалул кIулшивуртту дулаврил система хьхьичIуннай дан.
1947-ку шинал ЧIяйннал школалий 9 классгу къуртал бувну, ряхва зуруйсса оьрус мазрал ва литературалул курсругу бувккуну, Аьбид МахIаммадович зун ивкIун ур цал Къяннал, яла Хъусращиял школардай. 1962-ку шинал Дагъусттаннал университетрал физикалул ва математикалул факультет къуртал бувну махъ увкIун ур зун ЧIяйннал школалийн.
Ванал кIулшивурттал даражагу, каялувчинал гьунаргу кIулну, ивтун ур школалул директорну.
Аьбид МахIаммадовичлулгу цайнна дурсса вихшала зия къадурну дур. ЧIирисса чIумул дянив школалий чIярусса цIушиннарду ва ххуй чулиннайсса дахханашивуртту хьуну дур. Ччя-ччяни дайсса диркIун дур дуклаки оьрчIал кIулшивуртту куртI даву ва ми тарбия баву, оьрчIавусса гьунарду ялун личин баву мурадрайсса личIи-личIисса фестивальлу, конкурсру. ЦIакь дурну дур школалул цила аьдатру. Ванал каялувчишиву дуллалисса чIумал ЧIяйннал школалий бувну бур дуссукъатри, школалул клуб, байбихьулул классирттансса корпус, интернатрал къатри.
1971-ку шинал, ванал бюхъу-бажар чIалай, ивтун ур Ккуллал райондалул КIулшивуртту дулаврил отделданул хъунаману.Ва къуллугърай Аьбид МахIаммадовичлул 13 шин дурну дур. Вай шиннардий райондалул цаппара щархъаву бувну бур цIусса школарду, тIивтIуну бур школа-интернатру ва ясли-садру. Дакьин дурну дур цаппарасса школардал духсса къатри.
КIулшивуртту дулаврил сфералуву бакъассагу, производствалувугу ккаккан бувну бур Аьбид МахIаммадовичлул цала бюхъу-бажар.
ЧIяйннал колхозрал председательну ивтсса чIумал, махъун дагьсса колхоз кIира шинал дянив хьхьичIунминнул сияхIрайн дагьан дурну дур. ЧIаланну гьаз дурну дур дикIул, накI-нисирал, ппалул ва цаймигу шяраваллил хозяйствалул продукциялул производство. ЧIяруми ванал лайкьшивурттурив кIулшивуртту дулаврил ххуллийсса хьуну дур. Ва сфералуву бивхьусса захIматрахлу Аьбид МахIаммадович лайкь хьуну ур паччахIлугърал ларайсса наградарттан: «РСФСР-данул кIулшивуртту дулаврил отличник», «Дагъусттаннал лайкь хьусса учитель», «Дагъусттаннал халкьуннан кIулшивуртту дулаврил отличник» тIисса бюхттулсса цIардан, «ХIурматрал лишан» ордендалун.
Заннала учительну ляхъан увсса Аьбид МахIаммадовичлул цIа мудан дакIний дикIантIиссар ва хIурматрай зумух ласунтIиссар ванал учениктурал, коллегахъал, гьалмахтурал, шяраваллил жяматрал.
– Укунсса инсантал 100 шинай цалли ляхъайсса дунияллийн.Ттунма хъунмасса бахтти хьушиврун ккалли бара Аьбид МахIаммадовичлул каялувшиндаралу тарбия ласун кьисмат шаву. Чув, ци къуллугърай ухьурчагу, цала даву бюхттулсса даражалий дуллай, школалулгу, шяраваллилгу, райондалулгу цIа гьаз дурссар ванал. Ванал оьрмулул ххуллу яхI-къириятрал, ас-намусрал, узданшиврул ва чумартшиврул эбратну хьунтIиссар цала тарбия бувсса цимирагу никирал оьрчIан. Аьбид МахIаммадовичлущал ларгунни совет учительтурал щаллусса эпоха. Амма ми жунма тачIав хъамакъабитантIиссар, – увкунни цила ихтилатраву Альбина Гаммакуевал.
– ХIакьину школалий Аьбид МахIаммадовичлул цIа абад дуллалисса ула лачIаву ванал лайкьшивурттал мукIрушиннар. Ва цинявппагу учительтурансса, шяраваллил жяматрансса бахшишран ккалли дан бучIиссар. Ва тIааьнсса, чаннасса лахIзану дакIний личIувча хIакьину шикку гьуртту хъанахъисса дуклаки оьрчIан, – увкунни МахIаммад Билаловлул.
Аьбид МахIаммадовичлун хас бувсса цала шеърирду бувккунни Арсен Аьбдуллаевлул ва МахIмуд Аьлиловлул.
ОьрчIру кIулшивурттал кьинилущал барчагу бувну, цала коллега дакIнин увтунни МахIаммад Оьмаровлул.
Ахирданий ва ххаллилсса даврил сиптачитал хьусса школалул директорнахь ва учительтурахь, цала кьини хъун дан, чIарав бацIан бувкIсса цинявннахь дакIнийхтунусса барчаллагь увкунни Аьбидлул арснал, Дагъусттаннал лайкь хьусса строитель Ширванинал ва гъанчу Саид Апанди Бадруттиновлул.
Мероприятиялул кIилчинмур бутIуй Альбина Гаммакуевал бувсунни школалул ккаккиярттая. Бахшишру дунни хьхьичIунсса дуклаки оьрчIан ва учительтуран.
ОьрчIал дурккунни школалухасса, учительтурахасса назмурду.
Андриана Аьбдуллаева
