Августрал 19-нний Ккуллал райондалул администрациялул бакIчи Шамил Рамазановлул каялувшиндаралу хьунни террорданийн къарщисса комиссиялул заседание.
Ваний гьуртту хьунни райондалул АТК-лул члентал, ихтияр дуруччай органнал, райондалул администрациялул зузалт, кIулшиву дулаврил идарарттал каялувчитал ва шяраваллал администрациярттал бакIчитал.
Ххал бигьлай бия «Интернетрал» ва телекоммуникациялул сетьрайхчIин терроризмалия ва экстремизмалия мюхчан хьунсса чаранну. ТIалав бунни кIулшиву дулаврил, культуралул, спортрал идарартту ва чIявусса инсантал бавтIсса кIанттурду террорданул иширттая буруччаврил даража лахъ баву.
Заседаниялий жаваблувсса къуллугъчитурал бувсунни КIулшивуртту дулаврил кьини ва БувчIавуртту дуллалисса гьантрай агьали террордануща мюхчан баву мурадрай кьамул бансса ххуллу-чаранная. БатIаврий ихтилатру бувминнах вичIи дирхьуну махъ, комиссиялул кьамул бунни цаппара хIукмурду: ялун лирчусса диялдакъашивуртту духлаган даву ва кIулшивуртту дулаврил идарартту террорданул иширттаща мюхчан баву.
Шамил Рамазановлул кIицI лавгунни къачIявусса гьантри ливчIун бушиву дуккаврил шин дайдишин. МуницIун бавхIуну анаварсса мутталий къуртал дан аьркиншиву цаппара школардай най диркIсса ремонтрал давуртту.
Ахирданий Шамил Рамазановлул шяраваллал администрациярттал бакIчитурайн, идарарттал каялувчитурайн тапшур бунни АТК-лул ва пландалийсса мероприятиярттал экстремизмалийн ва терроризмалийн къарщи буккаврил хIукмурду бартбигьаврил ялув бацIаву гужлан дуван.
Имара Саидова
