Шахьував гьарца шинал август зурул кIилчинми бигьалагай кьинирдай кIицI лагайссар Шяраваллил кьини. Ваний гьуртту хьун бучIайссар жулла республикалул ва билаятрал личIи-личIисса кIанттурдай ялапар хъанахъисса шахьуйми ва хъамал. Мукунма гьашинугу.
ХьхьичIра шяраваллил кьини ссупралух щябикIаврийну ва балайрдайну-къавтIавурттайну щаллу шайсса диркIхьурчан, махъсса 6-7 шинал мутталий Шяраваллил фондрал жагьилтурал сипталийну бувайссар спортрал личIи-личIисса журардал бяст-ччаллугу. Вайннунссагу, шяраваллин мюнпатрансса цайми давурттанссагу чIун диял хьуншиврул, Шяраваллил байран дувайссар кIира кьини.
Байрандалул цалчинмур кьини хьунни лечаврил, тIанкI учаврил, скакалкалущал лечаврил, турникIрай кIункIу шаврил, пут личаврил, волейболданий буккаврил бяст-ччаллу. КIилчинмур кьини хьунни чIатIаракI ритаврилми бяст-ччаллу. ХьхьичIун ливчуминнан бахшишру дуллалисса батIаву хьунни шяраваллил хьхьичIсса майданнив.
Дунияллул гьавагу бавкьуну, ххуйсса даражалий, чIявусса инсанталгу бавтIун, хьунни спортрал бяст-ччаллу. Вайннуй ххув хьусса оьрчIан дуллунни бахшишру, жагьилминнан – арцущалсса конвертру. Ххув хьуминнан цинявннаннагу – шяраваллил суратгу дусса медальлу. Каспийск шагьрулий ялапар хъанахъисса оьрмулул 12 шинавусса Азиева Жамилял вай бяст-ччаллал шанма-шанма журалуву бувгьунни цалчинсса кIантту, лайкь хьунни шан-шанна медальданун, грамотарттан ва арцуйнусса бахшиширттан. Бяст-ччаллай гьуртту хьуну, кIилчинсса кIану бувгьунни ванил бутталгу – Вирттащатусса Артурдул. Ростов-на-Дону шагьрулий ялапар хъанахъисса Амина Ясулбуттаевал чIатIаракI ритавриву бувгьунни кIилчинсса кIану.
Шиккува кIицI лаган, спортрал бяст-ччаллавух гьуртту хъанахъими шиная шинайн чIяву хъанай бур, гъансса МахIачкъала, Каспийск шагьрурдайминная байбивхьуну, архсса Москав, Калининград шагьрулий ялапар хъанахъиминнайн бияннин.
Шяраваллил фондрал, хаснурив ванил активистътурал Аьбдул Аьлиевлул, Зураб Аьлиевлул, Руслан Жяъпаровлул хъуннасса даву дуллалиссар махъа нанисса жагьилтураву буттал шяраваллихсса ччаврил гьану бизавриву, вайннал дянив спорт ва цIуллу-цIакьсса оьрмулул кьарал машгьур давриву, вай цачIун бавриву. Шяраваллил кьинилул лагрулий дуллалисса ва журалул давурттаву оьрчIал ва жагьилтурал дянивсса дусшиврийсса арарду цIакь хъанахъиссар, чантIа тIиссар хъин-хъинсса давурттаву куннаяр кув хьхьичIун буккансса гъира.
Шинал мутталий фондрал дуван аьркинсса давурттал пландалувун дуртун дуссар Шяраваллил кьини. Шинал дянивгу фондрал активрал батIавурттай шайссар ва Кьини дувансса мероприятиярттал ялувсса ихтилатру. Чялишсса хIадуршинна цурда дайдишайссар ва кьинилийннин барз, барз ва бачIи ливчIсса чIумал: ларгсса шиналмур байрандалий лях лавгмур, багьайкун щаллу буван къавхьумургу хIисаврайн лавсун, аьщуйн щусса план, программа сакин дайссар. ХIарачат бувайссар гьарца шинал ва байрандалуву дахханашивуртту хьун дан, цIусса зат ххи дуван.
Вай бяст-ччаллай хьхьичIунсса кIанттурду бувгьуми циняв личIи-личIину кIицI лаглан къабюхъанссар, кIицI лаганна география гьарта-гьарзасса диркIшиву, билаятрал личIи-личIисса регионнай ялапар хъанахъисса оьрчIру, жагьилтал шярава лагайшиву ялуннинмур гъинттулнин биял хьунуксса асардащал.
Ва кьини дулайсса бахшиширтталсса буллай, аьркинмур ласлай, хъунмасса захIмат бивхьуссар Зураб Аьлиевлул, ванал кулпат Эльвирал, вайннал хъунмур душнил, бахшиш анжагъ дуллуну кьаритансса къадикIаншиврул, ци оьрмулул оьрчIан ци ххуй дизан най дурив, ссая мюнпат бикIан най бурив ххал буллай. Гьарцаннан бувчIлай бухьунссар ва кIиришивруву, шагьрулувусса пробкардаву укунсса даву дуллан бигьа бакъашиву, жунна аьркинмур ласунмагу кьатIу-шав буккан бигьа бакъасса чIумал.
Шяраваллил кьинилул ссупралулсса ва тяхъашиврулсса бунни СПК-лул, ванил председатель Мурад Сагидовлул ва, шайнал шаймур бувну, щарнил арамтурал. Гьашинусса байрандалул дукрардалсса, дишаймунилсса-дукьаймунилсса арамтурал цалвар бувсса, хъами хIала къабувхнува.
Шяраваллил кьини цалва балайрдайну авадан дурунни лакрал балайчи ХIабибуллагь Кьурбановлул.
Бадрижамал Аьлиева
