Аьрщарай оьрму хIасул хьуния махъ инсаннал, кIусса ссихIгу бивгьуну, «Агь, заманай!…» цимигу азарийла увкухьунссар ва уттигу учинссар цимийлагу. Амма банд лаган бувунну жува ттигъанну кIива жагьилсса хъамитайпалул, чак буллай бунува, лавмартну махъа бувккун, шяравущарсса диркIусса хаварданул.

Циван, ссал цIаний? Ганиха арцу-муси дациншиврул. Хъамитайпа Аллагьу Тааьланайн лабизлай, чак­лий бавцIусса лахIзалий ганийн ка гьаз дувансса хъами жулва дянив бушиву – му чун нанисса зат­ри?! ЦIуххара бавахъахь, оьлил, ттуккул бурхIайнгума цIун хьунну щяпа лаян буван дакI къадияйва тIийри бусса. ОьхIалсса ккаччил хъап куну бивкIлакIисса аьнакIул ссурссулух чIила дишин къархьу­ссар, махIлалий чув акъасса ппур­ттуву тIийри бусса. Арцу-муси инсаннал оьрмулияр хьхьичIунсса заманагу мусиват лива-ливксса заманар.
Ца цамургу хавар. МахIач­къалаллал пулансса школалий 8-мур классравусса оьрчIайн ка гьаз дурну тIийри тIий, му оьрчIал ссил ва ниттил оьрмулул 45 шинавусса учительница азарханалийн багьанну бавттун бур. ОьрчIайн ка ларну къабикIан. Мяйжан­ссар, оьрчIал нитти-буттал учительница судрахьхьун буллуну бур. Школалийн учительница баттан гьаннин бакIрайва циван къачивчуссар? Щил- бунугу чичара увкуну, бакIрай бацIан бувхьун­ссар. Дакъассар учительницахьгу оьрчIайн ка гьаз дансса ихтияр, цуксса вяйливсса, къавкъинсса ухьурчагу. Амма дуклаки оьрчIал хьхьичI нитти-буттахъал учительтал батларча, ми нигьачIакул булларча, щинни микку хIаз хьунтIисса, щинни микку кьартIа хьунтIисса?
Хъинну лагьну дур хIакьину дурагу учительнал сий. Мунил тахсиргу, хьхьичIва-хьхьичI цадакьалул лагрулийсса харжру учительтуран буллалисса хIукуматрайгу бухьунссар. Учительнал сий дакъасса школалул кьимат цир? ХIукуматран сан акъасса учитель нитти-буттахъан ягу дуклаки оьрчIангу мукссава санну къаикIайхьунссар. Санну уния, къахъанантIиссия кIукунсса ишру.
Утти личин дуванна ххаришиврулмур гургагу. Вай гьантрай МахIачкъалалив Советский РОВД-чIах нанисса транспортран ххуллу бавхIусса чапарду дуркьунни. Ххуллу гьарта хьунни. Чапардая ихтилат багьувкун, дуркьунни МахIачкъалалив хъунмайданнивсса, ХIукуматрал къатрал хьхьичIсса чапардугу. Хъинмунийн хьуннав. Авур хьуну, баххана хьуну най бур МахIачкъала. ЦIусса паркру, скверду ххи хьуну бур шагьрулул кIичIирттаву. Гьай-балики, жулва шагьругу щюллишиврувун бахьлавгсса, лазилавкьусса, аьнтIикIасса шагьру хьун. Курорт­рал статус цIакь дурсса шагьру хьун. Учарухха, хияллу буллалаврия зарал бакъассар, зарал бу­сса хиял бан къакIулшивриятур куну. Хияллукьай, хияллу!