ДукIу, Шяраваллил кьинилул байран дувайхтура, 1-мур ЦIувкIуллал Жяматийсса советрал хIукму бувна, гьар шинах август зурул цалчинмур нюжмар ЦIувкIуллал нюжмарну баян бувну, шагьрурдая бучIан шайми бувкIун, шяраву субботникру дуваван, гъаргъмур, лирмур дакьин дурну, цIу дуккан дурну, шаймур буваван.
Икьралданийн бувну, чIявусса агьлу бувкIунни вай гьантрай шяравун. Шяраваллил зума-къирагърай буссар культуралул мероприятияртту, хъатIив, хъиншивуртту дайсса, бигьалагайсса кIану. Мурчал магъигу ппив-ххив дурну, къаххуйсса тагьарданий бия та кIану. Дайдихьугу дурна магъи зехлай, конструкция цIу дуккан дувансса давуртту дуллай. Гужсса кIиришиву Лаккуйгу духьувхьун, баргъ кIири баннин, цIан-чаннавува бувккун зий. МарцIсса гьавалий бавкьуну, нахIуну давугу дурну, ца урцIух ахттайнссагу дуркуну, ялагу даву щирикIин дурна маркIачIаннай.
Вайва гьантрай цаппара чиваркIуннал, оьрчIругу хIалану, мизитравугу, лагма-ялттусса кIанттурдайгу дунни субботник.
Бувккунни ккурчIа бакьин буван, лазилакьи буван. Совет Союзрал кIийла Виричу АхIмад-Хан Султаннул гьайкал дусса кIанугу лакьин.
Субботникрайн бувкIцириннал пикри бур, шяравун буххай ххуллийсса бигьалагай кIану бакьин байхту, тиккува оьрчIансса площадкагу дуван, мурхьругу бувгьуну, чIиви-хъунсса сквер буван. Шагьрурдая гъинттул бувкIсса оьрчIангу цачIун батIавансса бигьалагансса кIану хьуншиврул. Мукунма мизитрал чIирттал облицовка дуван.
Вай циняр давуртту дузал дуван, гьай-гьай, арцуйнусса кумаг-гу аьркинни. Шяраваллил жямат дакI дирсса кумаг буллай бур, уттигу буллан хIадурнугу бур буттал шяраваллил диц-куц, чIалачIин ххуй даву мурадрай. Вай давуртту муданнагу гъинттул чIун-чIумуй дуллансса икьралгу дуссар. Ххуйра-ххуйсса, караматсса тIабиаьт дусса, ратIру, щаращив авадансса кIанайсса ппухълуннал шяравалу марцIнугу, цайминнан эбратнугу ядувансса ният душиву – мугу жулва лавгмунил хIурмат бушиврул лишанни. Ва бучIантIимунийсса дакI цIуцIавугур.
ПатIимат Рамазанова
