Бушиву къакIулли дунияллул гъунттулу 1-мур ЦIувкIратусса Аьрасатнал лайкь хьусса артист, Дагъусттаннал халкьуннал артист Ярагъи ХIажикьурбановлул кунмасса ляличIисса кулпат. Сагъну бунува бусалардавун багьсса учирчангу, къабяйкьинссара. Ванал арулвагу душ, Аьрасатнаву бакъагу, щаллагу дунияллий машгьурсса пагьламан душрур. Ларайсса цIардангу, наградарттангу лайкь хьусса цивппагу.

Дунияллул циркирал чаннацIукун ккаллисса, Аьрасатнал лайкь хьусса артистка, Дагъусттаннал лайкь хьусса артистка, Москавлив Аьрасатнал паччахIлугърал циркирал компаниялий зузисса ХIажикьурбанова-Медникова ПатIимал оьрмулул биографиягу аьратталсса сюжет дусса кинораву кунмасса бур. ПатIима 12 шинал оьрмулуву циркирал артисткану зий байбивхьуну бур. Багьайкун захIматрал книжкагу бувну.

Ванил нину Ттуплислив дурну дур, цуппагу польшанал ва оьруснал миллатирттал оь хIала бувхсса инсан бивкIун бур. Бакуй гастрольлайсса Ярагъинан (ва таний Киеврал циркираву зий ивкIун ур) циркирайн бувкIсса ваний ябавцIуну, цанма щарну бувцуну бур. ПатIимал оьрмулул ххуллу, мунил цила бусаврийн бувну, дахьва хьхьуттай къавтIутIисса, тяхъа-шадсса хьуну бакъар. Нину-ппу личIи шайхту, нинушивугу, ппушивугу буттал дурну дур.

ПатIиман ва акробат Александр Медниковлун цаннан цаннах эшкьи хьуну дур. ПатIимащал зуншиврул Медниковлул, акробатика кьариртун, хьхьуттай гьунарду буллан лавхьхьуну бур, ваная дунияллий ца яла хьхьичIунма пагьламан хьуну ур. Ссурвал ХIажикьурбановахъащал зий ивкIун ур ва Никулиннул циркираву. Вайннал трюкру уникальныйссаннун ккаллину бур циркирал тарихраву, вайннан чIявусса билаятирттайн гастрольлайн оьвтIий бивкIун бур, кинордавунгу оьвтIий бивкIун бур.
ПатIима гьуртту хьуну бур машгьурсса балайчитурал, Алла Пугачевал ва Валерий Леонтьевлул, клипирттаву. ХIакьинусса кьинигу «Соло для слона с оркестром» тIисса машгьурсса кинораву яла яргмур лахIзалун ккалли бувай ссурвал ХIажикьурбановахъул ва вайннул ласру, АхIмад Абакаров ва Александр Медников, хьхьуттай гьунарду ккаккан буллалисса лахIза. Ва совет циркирал ца яла язимур номергур. ПатIимал ва Александрдул гьунардая хIайрансса американал импресариол вайннайн Американавун зун оьвкуну бур. Лас-Вегасрай мина дирхьуну дур вайннал. Амма хар-хавар бакъасса бала- апатIрал ласука бувхIуну личIан бувну бур: Александр, агьну, цIунцIия хьуну дур, 13 шинай шанийн агьну ур.

ПатIимал циркиравусса даву кьариртун дур ласнал чIарав бикIаншиврул. Ва ччарча ттучанчину, ччарчагу цайми, учиннуча, захIматсса ттуккул давурттай зий бивкIун бур. ХIакьинусса кьинигу ванил даврил уртакьтал хIайранну бур ПатIимал ласнайнсса дакI тIайлашиврий, танаха бувсса хIурматрай.
ХIакьинусса кьини Дагъусттаннал агьалинал, къадагъусттанналминналгу зумату щяв къадишай Аьрасатнал боксёр МахIаммад Аьбдуссаламовлул кулпатрал Баканайл цIа. 2013 шинал Американаву, Кубанал машгьурсса боксёрнащал иллай унува, цIунцIия хьуну, ва шанийн агьссия. Ванал кулпат Баканай, чIарату хIура къавхьуну, захIматсса цIунцIияртту хьусса лас ччаннай ацIан уванмуних бур хIакьинугу. Лащан буллансса чарабакъашиву дакъар, амма Баканайл кунмасса гьунаргу, чувшивугу ссавурданий дурну дур ПатIималгу. Ххишалдаран, маэшатралссагу буллай. АхIвал кIюла бувксса ужагърай.

«Циркиравусса даву кьаритан багьуна, кIира шин жущалгу дурну, арсгу Чикаголийн дуклан лавгуна. Сашал дарурттах чIярусса арцу дулун багьлай бия, ттунгу чил квартирартту, офисру лакьлан багьуна. Жу ххассал хьунав Клинтоннул бала-апатI хьусса иширттаву страховка дулайсса хIукмулий къулбас дувайхту. Мяйжанссар, американал хIакинтал бия ттухь Саша аппаратрая уцан уван маслихIат буллай. ТайнначIа гъан-маччанахь ихтияр дуссар мукунсса хIукму буван. Нарив, «зува Зал-Идавстал ххай бурув, зунма цуксса оьрму буллуну буссарив зун къакIулссархха» тIий, аьтIун бикIайссияв. Бия, хьхьувайсса клубирттаву къавтIий, бигьану арцу лякъин маслихIат буллалиссагу, мукун тIутIиминнахьгу: «На Заннайн вихсса инсанна» учайссия. ЧIявуссаннан къабувчIлай бия карьера гьаз хьуну нанисса ппурттуву, циркгу кьабивтун, ттуя Сашах буруглагисса сиделка шаву. Ттуннив та акъасса циркгу, дуниялгу ччай дакъая. Сашал шанийн агьну 13 шин ва барзгу, 3 гьанттагу бувна, амма ва дунияллия лагайхту на, дуниял левкьссаксса хьуну, оьккину дакI гъаргъун буссияв, гьарзатрава дакI дурккун, – дакIнин бутлай бур ПатIима.
Ча кIулхьунссия Саша лагаву цIусса иширал тарихрал дайдихьу хьунтIишиву.

Американаву «Дю Солей» циркраву зузисса Константин Агунович тIисса артистнаща бювхъуну бур цаярва 30 шинал хъунмасса ПатIима цанма щар хьун аьркиншиврий мукIру буван. ПатIима та цIанихсса циркираву костюмиртталсса буллай зий бивкIун бур, Константиннунгу тикку ябавцIуну бур ваний, амма ва лахъину къарязи хъанай бивкIун бур, циркирал цIуку Константиннул цаламур бацIан бувну бур. АцIния ряхра шинава ПатIима зана хьуну бур циркиравун. Константин рязину вай Аьрасатнавунмай зана хьуну бур. ПатIимал дакIничIан ххуллу ласун бювхъусса Константин Александрдул дувайсса трюкру дуллан ивкIун ур. Александрдул аьпалун вайннал коллективрал цIа ядурну дур «Пагьламантал Медниковхъул». ПатIима буслай бур чурххал къалипрума Александрдул ва Константиннул цалавхьхьусса бушиву, кIизгу чIяйсса Костя Медниковлул костюмгу ларххун хьхьуттайн гьаз шайхту, Медников утта увксса кунма бивзун, цуппа хIал бивну багьавай ливчIшиву.
Шиккува бусан, ПатIимал арс Филиппгу «Дю Солей» циркираву зий ур, ванал кулпатгу гьаваллал гимнастка бур.
«Ттун, гьай-гьай, арснал душгу хьхьуттайн гьаз хьуну ччива, пагьламантурал династиялул дазу-зума хьуну къаччива», – тIий бур ПатIима.
«Ттун ина танива язимур ва хьхьичIунмур артисткара, мяйжаннугусса Халкьуннал артисткара. Дазу-зума дакъа хIайранну бура вил гьунар бюхъаврий, дакI хъиншиврий ва бакI-чурххал ххуйшиврий», – тIий чичлай бур Наталия Стихановская вания.

13 шинал лажиндарай шанийх ивхьусса ласнахасса ПатIимал хIурмат, аякьа асар хьуну ванил чулухунмай хIурмат багьми буслай байкъалитIавай бур социал сетирдайгу, кказит-журналлайгу ПатIимал дакIнил чаннашиврия, захIматсса ишираву ччиссаннайн хиянат къашаврия. Исвагьину оьрму бутлай аьдатсса аьнтIикIа (Аьрасатнал лайкь хьусса артистнал душ, цIа ларгсса артисткахъал ссу! ) ччимур даврия махъаллил къашаврия. АцIра шин шавай дур ванил Константиннул хъаралу, ласнал аьпалул хIурматран коллективрал цIагу «Медниковхъулла» риртун. Фамилиягу даххана къадурну дур ПатIимал.
«На пахрулий бура ттула ппу, халкьуннал артист Ярагъи ХIажикьурбанов цIувкIрачу ушиврия. Буттащал цимилагу бивссара ЦIувкIравгу», – увкунни ПатIимал.
Жугу дакIнихтуну чIа тIий буру цIувкIуллал цIанихсса пагьламантурал наслулиясса ПатIима ХIажикьурбанова- Медникован цIакьсса цIуллушиву. Ва хIакьинусса кьинигу Аьрасатнал шагьрурдайхгу буклай бур дуклаки оьрчIан хьхьуттайсса магьирлугърал мастер-классру ккаккан буллай.

ПатIимат Рамазанова